DUM NGA AI MYITSU NI HPANG DE

1. Hkungga let, WP mungdan hte Myu a magam gun DU share shagan ni (KIA/KIO) hpang de, kraw lawang hta hkam sha ai lam hpe madun dat mayu n-ngai law. Anhte maigan ga nga ai WP Myusha ni gaw, Share shagan ai Magam gun ni a majaw sha gara mungkan mi du hkawm raitim Jinghpaw Mungdan nga ai ngu nna grai arawng la nga ga ai. Ndai lam gaw kaja wa rai nga ai. Dai majaw share shagan ai ni hpe chyeju dum let, n-gun mung grai lu ai. Raitim..dai ni na Myen mungmasa a lam hta Yawn hpa tai wa na hpe grai tsang ai. N-gun jaw mayu ai lam gaw Israel ni labau lam hpe bai yu ga ngu mayu ai. Ndai lam ni gaw STORY sha n-re, kaja wa byin lai wa ai hte naw byin nga ai re hpe dum ga. Kalang lang gaw myit na re, gara hku na Myen hpe dang na, shanhte gaw hpyen n-gun, Laknak n-gun law ai. Raitim ndai Chyum Mungga hpe hti yu ga: PRUMAT Wa Ai Laika (Numbers) 13:30 hte 14:9, 24, 30..hta kaja wa Karai hpe kam ai ni Awngdang lam lu na re. Mai byin yang gaw Prumat Wa Ai Laika Daw kaba 13 hte 14 hpe hti yu ga. Share shagan ni hpe sha anhte maigan nga ni mung grai kamhpa nga ga ai re. Gara hku mi raitim, MYU W.P sha ni a matu hte Mungdan a matu gam maka tsawm htap hkra woi awn na gaw nanhte Share Shagan ni a lit hte Lata hta sha rai na re hpe kam ai. Anhte Myu W.P sha ni gaw hpang hkan kaja ni rai na ga ai.

2. Hkungga let, WP Myusha hte Maigan nga ni hpang de, Kraw lawang hta hkam sha ai lam hpe shaw madun mayu n'ngai re. Anhte maigan nga ni hte Myu W.P sha ni mung Share Shagan ni hte (KIA) ta gin dun nna shakut na aten rai sai. N-gup aga hte sha n mai sai ngu mu lu ai. Makam masham hta ta tut magam bungli lawm ra ai zawn, dai ni Myusha lam hte Mungdan a matu mung ta tut magam bungli hte shanglawm ra sai ngu mu mada ai. Share shagan ai (KIA) hpe sha mara shagun, lit ap nga yang gaw shanhte mung masha re majaw shut shai wa chye ai gaw teng sha rai na re. Dai ni Anhte maigan nga MYU W.P sha ni mung, KIA hpe sha Pressure (kamyet n-gun/mara shagun) jaw nga n mai na sai. Share shagan ni gaw ta tut, hkum hkrang, atsam marai hte shanglawm nga sai hta anhte maigan nga ni gaw Ja, Gumhpraw (DOLLAR) ni hte atsam marai htum hkra shanglawm ra na hpe ga saw let, n-gun jaw, shadum mayu n'ngai re. Tingkyeng sut masa lam sha tam nga yang gaw Jinghpaw amyu mat wa na loi nga ai hpe mu lu ai.

3. 8th June, 09, RFA-Jinghpaw Radio hpe la kap let, tsun mayu ai gaw.. DR. Manam Tu Ja a n-sen hpe na ai majaw grai na tsang ai hte n-gun n-lu ai. Hpa majaw nga yang, KIA/KIO hte SPDC ni Ceasefire galaw tawn ai gaw 15 ning jan wa sai. Ndai ram galu la ai ladaw shaning ni hta pyi hpa langai mi mung n-lu jahkrup shi ai Myen wa ra ai hku hta lai nna daini n-dai aten hta gara hku mung lu jahkrup na n re hpe mu lu ai. (shanhte ni (Myen) mung chyinghka hpaw nga ai. Dai hpe jahkrup la na re nga ai, Dr. Tu Ja a ga) hpe gara hku kam lu na law?????? Du Kaba La Awng hte Du Kaba Gam Shawng yan a ga hpe grai na n-gun lu ai. Dai gaw magrau grang ai la (sh) magam gun kaja re ngu mayu ai.

Kaning re masa (situation) mi raitim Anhte kamsham ai Karai Kasang gaw Dang Di lu ai wa re hpe kam ga.

Kam sham let, Ta tut Magam bungli hta shang tsap ga...... YEHOWA nang hte rau re hpe Hkum Malap ngu mayu ai.

Hti ai ni yawng a n-tsa hta Karai Wa (Yesu) bau sin ai hte Awngdang ai lam lu la u ga !

Myitjin let shadum dat ai...

All the best

Myu Tsaw Langai

Australia