“Laiza Myen Wang Sai” Ngu Ai Shiga Mawng Nga

KTG(USA) KIO laksan uphkang ginra Laiza muklum hpe Myen hpyen dap wang shing grup da sai, nga ai shiga, maigan du Wunpawng amyu sha ni a lapran ndai laman ram ram tsun kajai taw nga ma ai. Laiwa sai bat lahkawng jan daram kaw nna, Manmaw ginra de, myen hpyen n-gun hte laknak kaba ni htaw sit shang bang wa ai a majaw, majan bai byin wa na hpe Wunpawng mung shawa ni ram ram myit tsang nga ai aten ladaw hta, ya na zawn, “Laiza myen wang sai” ngu ai shiga pru wa ai re. Dai shiga gaw, n teng, n man ai lam hte buga masha ni mung, hkrit tsang ai lam ni n nga ai sha, shawai na hte maren galaw lu, galaw sha lam gaw dingyang rai nga ai lam, Laiza buga masha ni kawn chye lu ai. “Laiza- Manmaw mawdaw lam dingyang, myen hpyen mawdaw car ni hpe mu lu ai, lu sha htaw ai mawdaw gaw malawng re, talabat hte kaup da ai majaw, kata de hpa rawng ai hpe gaw, atsawm n chye ai, hten nna, lam makau hkan jahkring da ai hpyen mawdaw ni mung, law law re” nga nna, hpaga la langai Kachin Today de tsun ai. Mai Ja Yang mare masha langai tsun ai gaw, “Myen hpyen ni shamu shamawt nga ai hpe mare masha ni chye ma ai raitim, alak mi hpa laklai ai mabyin gaw, n nga shi ai, Miwa hpaga dap hte Shanglawt ni Wan bai jaw nga sai majaw, hpaga ga ai Miwa ni mung bai law wa sai”, nga ai. October shata hpang jahtum da nna, Ga Jarik sin hpyen dap galai na matu, myen hpyen matsun da ai lam hpe, si mani ai zai ladat hte KIO ninghkap nga ai majaw, maga mi hku nna, myen hpyen ni, laknak n-gun hte jahkrit shama ai lam galaw ai madang sha rai na re nga nna, KIO salang ni tsun nga tim, byin wa mai ai hpyen masa a matu mung KIA dap hpe shajin da sai lam, KIO shingwang kawn sagawn chye lu ai. Jinghpaw mungdaw hta1994 ning kaw, myen hpyen dap, Dap Hkup (26) sha nga ai kaw nna, 2006 ning hta myen hpyen Dap Hkup ( 41) du hkra jat wa ai lam, Kachin Devolopment Networking Group (KDNG) a mung htawn laika hta mu lu ai.