Myen Shingkang Shingna Kaba Ai ,Jinghpaw Mungdaw Rapdaw Byin Na Hkyen

KTG(USA)

2010 ning, ra lata poi ngut ai hpang, Myen daru magam shingkang shingna kaba ai Jinghpaw mungdaw rapdaw byin pru wa mai ai majaw, rawt malan hpyen hpung ni gaw, grau shagrit shanem hkrum na madang de du mat na re, nga nna, mung masa ninghkring ni maram nga ma ai.

Ra LaTa poi hta , shanglawm shingjawng na matu ,Wunpawng Salang ni nau wa myit n lawm nga ma ai hte, rap daw datkasa ( Amat) lata hkrum na ahkaw hkang mung yak hkak na masa nga ai lam, Pranwan komiti shiga lawk kawn chye lu ai.

Hpa majaw nga yang, Pranwan komiti salang marai (47) kaw na, marai (90) du hkra jat wa ai raitim, salang shada da ningmu, n bung, shawng shai hkat ai hta hkan nna , salang nkau mi komiti malawm kaw nna pru hkring sa mat ai lam ni a majaw re lam, Komiti salang langai, Kachin Today de tsun ai.

Maga mi de mung, Sutdu ni hpe ning htan shing gyin nna, “Amyu Sha Ningbaw Ni” ngu ai mying shakap ya ai hte, Wunpawng amyu sha ni a lapran hta,hpung shalaw nna, amyu sha hpung shada da myit nhkrum nra byin hkra, myen hpyen du ni zai ladat shaw galaw nga ai, nga nna, dai komiti salang matut tsun ai.

Du na ra ai lata poi hta, Jinghpaw mungdaw ting hta, Me jaw na gaiwang (18 ) masat ya na rai nna, gaiwang langai hta Amat (2) hpra hte, yawng Amat (36 ) shara a matu shanglawm shingjawng ra na raitim, Jinghpaw masha jahpan grai shau wa nga ai majaw, myen Amat ni hpe dang na matu n loi ai nga nna, mung masa salang ni maram nga ma ai.

Jinghpaw mungdaw hta masha jahpan Wan 1.5 nga ai hta na, Wunpawng masha jahpan Sen 6, Myen Sen 5, hte ngam ai gaw, laga amyu sha ni re lam, Myen asuya a hpang jahtum yuptung jahpan hpe lakap nna chye lu ai.

Wunpawng amyu sha ni law malawng nga ai shara ni gaw, Sumprabum, Putao, Machangbaw, Hkawbute, Chihpwi, Sawlaw, N-Jang Yang, gaiwang ni rai nna, Myen, Miwa, Kala hte ,Gawrahka amyu sha ni mung, lani hte lani grau grau law htam wa nga ai re.

Ya ten hta, Wunpawng mung masa parti langai sha byin tai hkra yaw shada let, woi awn zinlum nga ai, Jinghpaw Mungdaw Pranwan Komiti hta ,rawt malan hpung na datkasa ni, WMR hte mung shawa datkasa ni yawng shawnglawm ai rai nna, Dr. Tu Ja ningbaw hku nna woi awn nga ai re.