Mali Hka mahkrai kawn ma hkrat si law tim, asuya ahkyak n la

Myen mung a dingdung daw, Jinghpaw mungdaw, Myitkyina mare, Balaminhtin Mali Hka mahkrai kawn lani hte lani ma kaji hkrat si jahpan law wa tim, seng ang ai mungup Myen hpyen asuya gaw hpa ahkyak n la shi ai lam, chye lu ai. Madung ma kaji ni hkrat si shara gaw, Mahkrai ntsa, Mawdaw hte Masha lai lam hpe san san garan da ai hta, lam lahkawng a madin, hpri shadaw lapran ni kaw rai nna, dai kaw nyem tawn ai bilat pa hpe n chye na gabe hkrup jang, hkrat si wa ai lam, Myitkyina buga masha ni kawn chye lu ai. Sumla (1): Mali Hka mahkrai hkrat si ai Zen Nu Nu Mai, asak 5 ning. Lai sai bat mi jan, July 18 ya shani, shana de hkying 8 hta sha, Myitkyina mare, Zen Computer seng madu Salang Labang Naw Zen Awng hte jan Hla Hla Thet (snr. Marip Ja Mai Lu) yan a kasha, asak 5 ning sha re ai, Zen Nu Nu Mai (snr. Myint Myat Thet Paing), hkrat si mat sai lam, kanu kawa ni hpe lakap let chye lu ai. Zen Nu Nu Mai gaw, kanu kawa yan hte rau Mali Hka mahkrai de lam hkawm chyai ai shaloi, ndai zawn, Mawdaw hte Masha lai lam lahkawng a madin ni sadaw ni lapran, dinghkrem rai nyem tawn ai bilat pa langai hpe gabe hkrup hte akajawng hkrat si ai re lam, chye lu ai. Sumla (2): Ndai mu lu ai mahkrai shadaw lahkawng lapran na bilat pa hpe n chye na gabe hkrup ai majaw, ma kaji ni hka hkrat si ai re. Myitkyina buga masha ni tsun ai hta, ndai Balaminhtin Mali Hka mahkrai hpe lai wa sai 1998 ning hta galaw ngut ai rai yang, ya ten du hkra, Zen Nu Nu Mai mabyin zawn, hka hkrat si ai ma kaji ni marai 4 lahta du nga sai re, nga ai. Raitim, hpyen asuya ahkaw ahkang lu ni gaw, mahkrai pawt lahkawng maga lai hprang mawdaw hte masha ni kawn gumhpraw hte mayun kumhpa sha hta sha nga nhtawm, mahkrai kawn ma kaji ni matut n hkrat hkra, lama ma dingga pat tawn ai lam snr sadi jaw laika shakap ai zawn re ai lam ni mung, tsepkawp n galaw ai lam, KNG kawn sagawn chye lu ai. Sumla (3): Myitkyina-Waimaw hpe matut ya ai, Balaminhtin Mali Hka hpunggam mahkrai Ndai Balaminhtin Mali Hka Hpunggam Mahkrai gaw, Myitkyina hte Waimaw mare kaba lahkawng hpe matut mahkai ya nga ai mung re. Ya ten Myitkyina e, ya hpang jahtum Mali Hka mahkrai kawn Zen Nu Nu Mai hkrat si ai mabyin a majaw kanu yan kawa grai yawn hkyen hkrum nga ai zawn, htingbu hte jinghku jingyu ni mung myit n pyaw lawm nga ai lam, buga masha ni kawn chye lu ai.