NDA-K a gaw sharawt masing a majaw, N-wan Kawng Lisu ni nga yak

Myen hpyen asuya a 'Jarit Sit Hpyendap NDA-K' a Jinghpaw mungdaw Sinpraw hkran, Sadon ginra na "N-wan Kawng gaw sharawt masing" a majaw, dai ginra na hpunau Lisu ni a galaw lu galaw sha lam yak hkak hkrum nga ai lam, chye lu ai. Lai wa sai 2007 ning kawn N-wan Kawng e NDA-K a gaw sharawt masing shang wa ai hta, buga masha ni prat jinat galaw sha nga ai hkarang yi hte sun wang ni yawng hpe NDA-K dukaba ni kawn ja gumhpraw lu ai Miwa ni hpe dut jaw kau ai majaw re lam, buga masha ni kawn chye lu ai. Sadung Mare Ndai zawn, NDA-K du salang ni mying hkam ya ai hte Miwa lauban ni kaw dut jaw ai lamuga, kawng marawn ni gaw eka hkying lam re majaw, jauman Lisu buga masha ni a yi, sun galaw sha shara shamat kau ai re lam, buga masha ni KNG de tsun dan wa ai re. Miwa ni gaw NDA-K salang ni kawn mari la lu ai dai lamuga ni hta madung Rubber hte Maisak hpun ni hpe hkai tawn sai lam, chye lu ai. Ndai zawn dai madu la ai lamuga ni hta Rubber hte Maisak hpun sun ni galaw wa ai kawn mung, dai sun de shang ai buga masha ni a yam nga dusat ni hpe seng ang ai NDA-K hte Miwa sun madun ni bai majoi gap sat sha ya nga ai lam, buga masha ni kawn kahtap chye lu ai. N'wan Kawng buga masha ni gaw hkarang yi hte hkai sun ni madung galaw let kanbau ai ni re majaw, lamuga zing madu la ai lam ni matut n galaw ya na matu, seng ang ai NDA-K hte Myen hpyen asuya ahkaw hkang lu ni de tang madun yu sai raitim, ya ten du hkra, tsepkawp ahkyak n la ya ai lam, matut chye lu ai. Maga mi de, NDA-K Jarit Sin Hpung hku nna mung, ndai zawn galaw lu galaw sha shara shamat kau sai N'wan Kawng Lisu hpunau ni a matu, lama ma kanbau bungli tam ya ai mung n nga ai lam, chye lu ai. N'wan Kawng e Lisu ni dum nta htinggaw 500 jan nga ai hta, ya ten, dai shara ni hta yi galaw sha shara n nga wa ai majaw, buga masha ni law law gaw hkarang yi galaw sha mai ai shara de n-gaw htawt na myit nga ma ai lam, KNG kawn sagawn chye lu ai. Ya ten, buga masha ni lapran, ndai NDA-K a "N'wan Kawng gaw sharawt masing" a majaw tinang a yi galaw sha shara shamat kau ra mat ai lam ntsa, "grai myit n pyaw nga tim, garum la na kadai n nga rai" jam jau hkrum nga ai lam, KNG kawn sagawn chye lu ai. Ningbaw Zahkung Ting Ying woi awn ai NDA-K hpung gaw lai wa sai June shata hta sha, Myen hpyen asuya a matsun wa ai hte maren, "Lamuga Jarit Sin Hpyendap" gale na myithkrum ga sadi jaw sai, rai nga ai. Myen mung kata, NDA-K hpung hpe "mungmasa hpung" hta, tingkyeng akyu tam, "hpaga hpung" langai hku nna, grau mu mada masat tawn ai mung re. KNG