Mandalay J.W dakkasu jawngma ni htunghking hkaw tsun hpawng galaw lu

Lai wa sai bat laman, htunghking hkaw tsun hpaw hpe Mandalay dakkasu na J.W Laili Laika hte HtungHking Hpung (JLH) jawngma shayi shadang sha ni woi awn let Mandalay, Aung Pyin Lay na Lawu Ga Ginwang Hkalup Hpung wang hta galaw lu sai re. Ndai hkaw tsun hpawng hpe July 24 hte 25, lahkawng ya tup galaw ai hta, Mandalay J.W Hkalup ramma ni hte rau, Mandalay JLH hte de a lakung ni rai nga ai--- Mongywa JLH, Magwe JLH hte Mikhtila JLH na jawngma shayi shadang sha ni yawng marai 100 shanglawm wa sai lam, jawngma ni kawn chye lu ai. Sara Pungga Ja Li Hpawng a gabaw hpe "Globalization hte daini na Wunpawng Htunghking" ngu nna, lakjet ni hpe Sara Pungga Ja Li hku nna “Myu Wunpawng sha ni a num wawn num la” hte seng ai gabaw rai nna, Sara Hprup La San gaw “Shachyen shaga lam hta ra ahkyak ai lam” ngu ai gabaw re lam, chye lu ai. Ndai hkaw tsun hpawng a yaw shada lam gaw, J.W dakkasu ramma ni tinang a htunghking hpe grau nna manu shadan, akyu jashawn jai lang makawp maga chye na matu hte J.W dakkasu ramma ni shada da gahkyin gumdin let amyu a matu daw jau lu na matu re lam, Mandalay JLH kawn chye lu ai. Ndai zawn re ai htunghking a lam hkaw tsun hpawng gaw, J.W dakkasu jawngma labau hta shawng n'nan galaw ai mung re nga nna, Sara Pungga Ja Li tsun wa sai lam, chye lu ai. Mandaly JLH gaw, dai ning, Jinghpaw mungdaw mare daju Myitkyina, Shatapru Manau Wang e galaw lu ai, "61 ning hpring Jinghpaw Mungdaw N'htoi", htunghking manau poi kaba hta mung, garum gahtau dawjau hku nna shanglawm sai zawn, KIO/A daju Laiza e galaw wa sai, dai ning na, Rawtmalan Poi, 48 ning hpring, 49 lang na Ninggawn Shadip Manau Poi kaba hta mung wu wu di di sa du lawm wa sai, rai nga ai. Sa du lawm ai J.W dakkasu jawngma ni Mandalay dakkasu a 2008-2009 hpaji ladaw, J.W dakkasu jawngma n'nan hkap hkalum lamang hpe mung, Mandalay LJH woi awn let lai wa sai February shata 21 ya shani, Pyin Oo Lwi (Memyu) e galaw wa sai re. Lai wa sai, June shata hta mung, Manmaw dakkasu JLH ni mung, dakkasu J.W jawngma ni a myit hkrum lam hpe yaw shada let, Robert masat Hkalup nawku jawng wang e, amyusha myit sharawt mahkawn ni hpe mahkawn ka/ hkawn ninghkrin ni hpe shaga nna, Yungwi Pinra hpe awngdang ai hte galaw wa sai lam,chye lu ai. KNG