Myen gaw KIO gabaw hte hpung sara ni hpe kahtap shaga hkrum na

Jinghpaw mungdaw na Jinghpaw Wunpawng (J.W) Hkristan nawku hpung sara ni hpe Myen hpyen asuya a Dingdung Daw Daju Taimu (Dap-up) Du Daju Soe Win gaw, Wunpawng Mungdan Shanglawt Hpung (KIO) ginlam hte seng nna, hpawt de kalang bai shaga hkrum na re lam, chye lu ai. Ndai zuphpawng gaw Taimu hku nna hpung sara ni hpe alak mi shara hkrum ai lamang rai nna, zuphpawng hpe Myitkyina mare, Awng Nan Yik Ta na Hkahtaw Lik hpung a St. Columban nawku jawng e jahpawt hkying 9 hta galaw na re lam, nawku hpung shiga lawk kawn chye lu ai. Zuphpawng hta Myen Taimu Soe Win hku nna KIO a n mai byin ai hpyi shawn ai lam hpe sanglang dan na hte, hpung woi sara ni KIO hpe aten dep hpaji jaw la na lam ni hpe tsun lajin wa na masa nga ai lam, Myitkyina mare na Hkalup hpung sara ni kawn chye lu ai. Lai wa sai April shata hta Myen gaw KIO a laknak hpai dap rai nga ai, Wunpawng Mungdan Shanglawt Hpyendap (KIA) hpe dapdung madang Jarit Sin Hpyendap (Border Guard Force, BGF) galai na matu, tara shang matsun wa sai re. Ndai zawn KIA dap hkrang galai na matsun wa ai gaw, KIO gaw Myen hpyen asuya shi myit ra ka ai Mungdan a Gawda ai Tara Kanu hpe lai wa sai 2008, May shata hta tsepkawp madi shadaw kau sai hte maren, ya na zawn, dai Gawda ai Tara Kanu hte maren KIA hpe BGF galai na matsun wa ai lam sha re lam, hpung sara ni kawn chye lu ai. Raitim, ya hpang jahtum gaw KIO mung shi byin mayu ai lam hpe hpyen asuya de hpyi tawn sai re. Dai gaw, du na shaning ralata poi ngut nna pru wa na Jinghpaw mungdaw asuya n'nan a magam dap shagu hta KIO salang ni ading tawk shanglawm na lam hte, KIA dap hpe mung, Jinghpaw hkrai sha san san re ai Jinghpaw Ginra Makawp Maga Dap (Kachin Regional Guard Force, KRGF) hku hkrang galai nga na lam re. Bai nna KIA npu na Local Guard Force (LGF) ngu ai Mare Sin Dap ni hpe mung mi na hkrang hte raw nga lu na lam ni re lam, KIO Tingnyang-up Malai 2 Dr. Manam Tu Ja kawn chye lu ai. Hpawt de na zuphpawng de Myitkyina, Waimaw, Manmaw, Mugawng, Munyin, Kamai, Danai hte Hpakant mare ni hta nga ai, Hkalup, Hkahtaw Lik, Anglican hte Shanglawt Hkristan nawku hpung ni a woi awn sara ni, marai 100 jan hpe saw saga tawn ai lam, nawku hpung shiga lawk kawn chye lu ai. Zuphpawng shaga laika hpe, Taimu Soe Win a hpyi lajin ai hte maren, Myitkyina Hkristan Kongsi (Myitkyina Christian Council, MCC) a ningbaw Rev. Zung Kyang a lata masat hte July 22 ya nhtoi hte "Myen laika" hku saw shaga ai re lam, zuphpawng shaga hkrum ai Hkalup hpung sara ni kawn chye lu ai. Dai re majaw, Manmaw Ginwang Hkalup Hpung na lit nga hpung sara langai gaw, Taimu a zuphpawng de shanglawm na matu, dai hpawt shata zuphpawng galaw shara Myitkyina de rawt sai lam, Manmaw shiga lawk kawn chye lu ai. Lai wa sai June 27 ya hta mung, Taimu gaw KIO hte seng nna, Myitkyina e nga ai J.W nawku hpung hkum hkra na hpung woi sara marai 17 hpe Myitkyina mare na Dingdung Daw Daju (Ma Pa Hka), Mali Hka Yik Ta e shaga hkrum wa sai re. Dai hta J.W Hkalup Hpung Ginjaw (KBC) a amumadu dingsa hte simsa lam tam lapran salang mung rai nga ai, Rev. Dr. Lahtaw Saboi Jum mung shanglawm sai lam, chye lu ai. Dai zuphpawng hta Taimu wa tsun ai gaw, "KIO gaw tinang KIA hpe BGF hku hkrang n galai yang gaw, du na shaning ralata poi ngut ai hpang gaw, Da-bung (Gumlang Hpung) hku sha, tai mat sana re majaw, nanhte kanu kawa hpung woi sara ni hku nna KIO hpe aten dep hpaji jaw la mai ai" nga nna hpyi lajin wa sai lam, zuphpawng lawm hpung sara ni kawn chye lu ai. Ndai zawn, Myen Taimu Soe Win a hpung sara ni hpe alak mi matut manoi shaga hkrum ai lam n'tsa, buga kata na dinglun ai ni tsun ai hta, Myen gaw KIO/A hpe shi npu de shang mat wa hkra, gumwai hku nna, nawku hpung sara ni hpe n-gup shap tsun shangun ai sat lawat sha re, nga ai.