WUNGPAWNG SHA NI A NUM WAWN NUM LA HTUNG LAILEN HTE PRAT NINGNAN

By Gauri Zau Seng, Mai Ja Yang

Mungkan ntsa e dingsa mat wa ai hte ningnan ningnan galai wa ai ngu ai shingra tara gaw, moi prat, ya prat, htawm hpang prat, galoi rai tim, anga nga na rai nga ai. Arung arai amyu magup ni dingsa mat wa, si mat, hkraw mat, hten run tsam mat wa nna, ningnan ningnan ni galai wa nga ai. Shinggyim uhpawng hta shinggyim masha ni a htung lailen maka kumla ni mung, dingsa mat wa ai hte ningnan ningnan galai shai wa ai lam ni byin nga ai.

Wunpawng amyu ni hta e, laklai nna sari rawng manu dan la ai, mayu, da-ma, kasa, janghtung, hpu ja hpaga hte num wawn num la ai htung lailen lu ga ai. Rai yang, ndai htung lailen mung, mungkan ntsa kaw na shingra tara a mabyin masa hte maren, dingsa mat wa ai hte ningnan ningnan galai wa ai lam ni byin nga ai hpe mu lu ai. Myit yu, dinglik yu mai ai lam rai nga mali ai.

MOI NA PRAT

Moi prat hta Wunpawng amyu ni gaw bum ring bum ga, nam kahtawng ni kaw hkarang yi hkyen hkai lu hkai sha nna nga pra ai. Pa layang myo mare kaba ni de n nga ai. Hpaga yumga dut lu dut sha galaw nra ai hte maren, hpaga yumga dut lu dut sha mung nchye ai. Hkarang yi hkyen hkai lu hkai sha nna nga pra ai re majaw, grau lu lawm ai ni mung, grau nlu nlawm ai jahkrai gaida ni mung, yawng gaw shada da jawm garan lu garan sha nna, nta dinghku kaba langai mi zawn sha nga pra lai wa ai prat rai nga sai.

Kasha kashu ma kaji ni mung, jawng lung laika sharin, hpaji hparat shing jawng hkat mung nra ai, laika sharin jawng mung nnga ai prat rai nga ai. Dut lu dut sha, hpaga yumga, ja gumhpraw lu sut lu su shing jawng hkat mung nra ai prat rai nga ai.

Dai prat hta e, Wunpawng amyu a htung lailen num wawn num la mayu, da-ma, hpuja hpaga lam hta e, gumhpaw hte mari nra ai, gumhpraw manu tawt sawn mung nra ai, nhtu, htu nawng, nri, ri nawng, ri lap, miba sanat, htunghpau sinat, bau, aga hkachyi gaili, shawa nang hkachyi gaili, langhpau palawng, magwi kawng, nga wuloi ni hpe ja hpaga shatai jaw ya hkat nna, mayu, da-ma, num hpyi, num ya, hkungran poi galaw, dinghku rawn nna nga pra mayat maya hkrat wa ai rai nga sai. Mayu, da-ma, kani, katsa, kajum kaji, kashu kahkri, kahpu kanau ni yawng gaw, kasa janghtung hte jawm dung jawm hpawng, jawm chye lawm let, sakse sakgan tai ya, ja hpaga arung arai ni hpe garan ang ai garan jaw hkat nhtawm, mayu, da-ma a lapran, jawm shangang shakang ya lawm rai nga ma ai.

Hkungran num hte hkungran la a lapran lani mi n htuk hkat wa ai, manghkang nga wa ai rai yang mung, hpu ja hpaga garan sha lawm ai makyin jinghku ni gaw sakse tai nna, hparan shangang ya ai, shing nrai mayu hte da-ma a lapran hta jahtuk hparan ya ai lam galaw ya ai rai nga ma ai. Grai htap htuk ai, sari sadang nga ai htung lailen rai nga ai. Dinghku num, dinghku la a lapran sha nrai, kasha prat, kashu prat, ban hte ban aru asai makyit mahkai shangang shakang ai manu dan la ai htung lailen rai nga mali ai. Ja hpaga lu lawm ai ni mung tinang lu lawm ai hku hpu ja hpaga jaw ya hkat ai, ja hpaga nlu n lawm ai ni a matu mung, htung hking maka kumla shagu nna shamying shaman hte mayu, da-ma lapran hpu ja hpaga lam shangut nna kun dinghku de ya nga ma ai. Gumchying gumsa du magam lailen lang ai ni a matu mung, dai hte shabung ai hpu ja hpaga hpe jaw ya hkat nna, kun dinghku de ya ai lam galaw nga ma ai. Moi na prat dingsa aten hta grai htap htuk manu ai, Wunpawng amyu ni a num wawn num la htung lailen rai nga mali ai.

YA NA PRAT

Aten shaning na mat wa nga ai hte maren, dingsa mat wa sai ni gaw, ningnan galai mat wa nga ai. Wunpawng amyu ni law malawng nga pra ai shara gaw bumring bum ga nam mare kahtawng ni n rai mat sai. Pa layang myo muklum mare kaba ni de yu hkrat nna nga pra mat wa nga sai. Kasha kashu ni mung jawng lung, laika sharin, hpaji hparat shingjawng hkat ai prat de du mat wa sai. Dut lu dut sha hpaga yumga galaw shingjawng ai, ja gumhpraw lu sut lu su shingjawng hkat ai prat de du mat wa nga sai. Moi prat na nga ginra n rai mat sai hte maren, moi prat na kan bau galaw lu galaw sha ladat mung n rai mat sai. Kan hkru jang kaga myit tsang nra ai, jawm garan sha, lu ai made hpe gam lu gam sha nna, nta dinghku kaba langai mi zawn jawm nga pra ai prat n rai mat sai. Kadai mung kade a asak hkrung lam, kadai mung kade a madang hte nga pra shingjawng ai, hpaji hparat laika dakasu degree shingjawng hkat ai, kung zet shingjawng hkat ai, hpaga yumga ja gumhpraw lu su shingjawng hkat ai, dut lu dut sha ja gumhpraw manu tawt sawn hkat ai prat de du mat nga sai. Ndai zawn ningnan galai wa ai prat hta hkan nna, Wunpawng amyu ni a manu dan la ai num wawn num la htung lailen mayu, da-ma hpu ja hpaga lam, kasa janghtung hte kahpu kanau, kani katsa, kaji kawoi, kashu kahkri, makyin jinghku lam ni mung, galai shai mat wa nga sai.

Hpu ja hpaga arung arai mahkra gaw, arung arai atawng apa a malai gumhpraw manu tawt sawn nna shimying lang ai hpe madung shatai mat wa nga sai. Ja gunhpraw lu su ai ni mung, shadawn shadang n nga ai sha ja gumhpraw arawng kaba a matu hpu ja hpaga hpe gumhpraw law law tawt sawn jaw ya hkat nga ma ai. N lu n su ai ni gaw, mayu, da-ma, kasa jahtung, kahpu kanau, kani katsa, kajum kaji, kashu kahkri makyin jinghku uhpawng hta myi man kaji hkrum ai prat rai nga sai.

Hpaga yumga ja gumhpraw prat rai nga sai hte maren, kahpu kanau, kani katsa, kajum kaji, makyin jinghku ni law law mung, gumhpraw manu tawt sawn nna, hpu ja hpaga, sharung kungdawn gun jaw gun ya nga ma ai hte, daw dap dung salang ni gaw, grau jan nna amyat lawm ai shadawn shadang hte kungdawn kungra ja hpaga ni hpe bai hpan n htang jaw dat ra wa nga masai. Madu sa gun jaw ai ja hpaga sharung shakau, kungdawn kungra hpe bai hpan nhtang jaw ai shaloi gumhpraw manu yawm ai hku nna daw dap dung salang ni hparan hkrup ai rai yang, shada myit npyaw hkat, shatan nhkan tsun jahpoi hkat, shing nrai dasang bai tsun hpyi jat la hkat re ai lam ni du hkra byin wa nga sai.

Mayu hte da-ma ni gaw, hpu ja hpaga hpe n hpyi hkat ai, myit tau chye na hkat ai, htung lailen hpe shamying shaman lami laman shagu ai daram hku sha galaw hkat mayu ai rai tim, mayu hte da-ma ni n chye ai sha, lapran kaw kasa janghtung hte makyin jinghku ni gaw, ja hpaga tsun hpyi ai lam, sharung shakau kungdawn kungra ni hte amyat lawm hkra sa galaw la ai lam ni byin wa nga ai.

Mayu maga hte da-ma maga hta mung, mayu ni shayi num sha hpe sharawt sha ai poi kaba hpe galaw ya shing jawng hkat ai htung lailen byin wa nga sai. Mayu maga shayi sharawt sha poi kaba galaw dat ya yang she da-ma ni a man hta arawng nga ai, shing nrai, da ma ni gaw shayi sharawt sha poi hta grau kaba hkik hkam ai hku nna, hkungran poi galaw ra ai ngu ai, poi kaba galaw shingjawng hkat ai htung lailen de byin wa nga sai.

Ndai zawn galai shai wa ai hpaga yumga prat htung lailen a majaw, mayu maga hte da-ma maga mung, shayi sharawt sha poi hte hkungran poi hpe poi kaba galaw shingjawng hkat ai lailen de byin wa sai. Arawng myi man n sum na matu dai zawn shingjawng hkat ai hta mayu maga mung shayi sharawt poi galaw ai hpang, shaning hti nna jai lang kau sai gumhpraw hka hpe bai tam sang wa shakut ra, da-ma maga mung, hkungran poi galaw ngut ai hpang shaning hti nna, jai lang kau sai gumhpraw hka hpe bai tam sang wa shakut ra re ai ni mung nga shajang ma ai. Kun dinghku ningnan de wa ai hpe jawm karum pawn ba sharawt la lawm ai hku, nre ai sha, kun dinghku ningnan de wa ai nga yang, mayu da-ma, hte kun dinghku ningnan a lapran e hpaga sa jawm ga sha ai htung lailen zawn byin wa nga sai. Manu dan sari sadang rawng ai Wunpawng amyu ni a mayu, da-ma, hpu ja hpaga hte num wawn num la htung lailen gaw, ndum shami hte hpaga yumga lailen de lam yit mat wa nhtawm, masha jahpan n law la nga ai Wunpawng amyu masha ni hta e, num wawn num la shangai chying hkai mayat maya masha jahpan law jat wa shangun na malai, num wawn numla kun dinghku ningnan de jat wa na matu, hkrit tsang mat wa shangun ai dingbai dingna htung lailen mahtang byin tai wa na hpe gaw, myit tsang hpa rai na mali ai law.