KIO a magam dap jahpan, Myen hpyen asuya de tang madun sai

Wunpawng Mungdan Shanglawt Hpung (KIO) gaw tinang uhpung a magam dap jahpan ni hpe, Myen hpyen asuya de August 12, mani bat masum ya shani tang madun dat sai lam, KIO shiga lawk kawn chye lu ai. Ndai jahpan hta KIO npu, ya nan kri nga ai magam dap 10 jan a jahpan ni hpe tang madun ai rai nna, dai tang madun laika hpe Jinghpaw mungdaw mare daju Myitkyina e jung ai hpyen asuya a Dingdung Daw Daju (Ma Pa Hka), Dap-up, Du Daju (Taimu) Soe Win hku nna hpyen asuya a Naypyitaw ginjaw de tang madun dat ai re lam, KIO daju Laiza shiga lawk kawn chye lu ai. Laiza daju na KIO salang langai tsun ai hku rai yang, ya, Myen de tang madun sai magam dap jahpan hta--- Mungchying Uphkang Dap (DGA), Wunpawng Mungdan Shanglawt Hpyendap (KIA), Balik Dap, Masha Pru-Shang Gawn Hkang Dap (Immigration), Hpaji Dap, Hkamja Dap, Maling hte Hkai Rem Dap, Buga Gaw Sharawt Dap, Sutgan Dap, Sut Masa Dap, Ginjaw Tara Dap, Htunghking hte Laili Laika Dap hte Ahkun Hkanse Dap ni shanglawm ai re, nga ai. Ya na zawn KIO magam dap ni tang madun ai yaw shada lam gaw, KIO ntsa hpyen asuya atsun nga ai "dabung (gumlang hpung)" n re sha, asuya hkrang hku, magam dap law law hte hpaw ninghtan tawn ai uhpung she re lam hpe, hpyen asuya atsawm chye na hkawn hkrang lu na matu tang madun ai lam re nga nna, Laiza daju na KIO salang langai KNG de sanglang dan wa ai. Bai nna KIO salang ni tsun ai gaw, KIO gaw lai wa sai 1969 ning kawn KIO npu asuya hkrang hku, magam dap ni law law hpaw nna tsap mat wa ai re, nga ai. Ya ten, Myen hte KIO gaw, tinang byin mayu ai lam shada da tang hpyi hkat tim, kadai wa mung ahpraw-achyang mahtai naw n jaw shi ai ten, ndai zawn KIO gaw tinang a magam dap jahpan hpe hpyen asuya de tang madun dat ai re. Myen gaw, KIO hpe lajin ai lam gaw, tinang KIA dap hpe "Border Guard Force (Jarit Sin Dap" galai na matu re. Bai, KIO hku nna Myen de hpyi ai gaw, KIA hpe "Kachin Regional Guard Force" mahtang galai mayu ai lam hte htaning 2010 ralata poi galaw lu nna, Jinghpaw mungdaw asuya n'nan pru wa yang, dai kaw KIO masha ni ading tawk shanglawm na lam re. Maga mi de, KIO gaw hpyen asuya hku nna tinang hpe htu gasat wa yang, rau sha ninghkap gasat na matu mung, Sam mungdaw na hpunau amyu bawsang simsa lam hpung 3 hte shada "chye na myit hkrum ga sadi" galaw ngut sai re. Dai simsa lam hpung 3 gaw, Kokang simsa lam hpung, United Wa State Army (UWSA) hte Mungla daju ai National Democratic Alliance Army-Eastern Shan State (NDAA-ESS) ni re. Lai wa sai lahkawng ya hta sha, Myen gaw mungdan a democracy ningbaw slgj. Awng San Suu Chyi ntsa 'dum nta sharen ari' hpe shata 18 bai jat dat sai re. Ndai lam a majaw, hpyen asuya gaw mungdan ga daga asuya ni hte mungkan ningbaw ningla ni a laja lana "pawt, dinglun ai lam ni" hpe hkrum katut nga sai re.