Miwa-Myenmung ga jarit lapran Miwa gunrai ni hpe rim zing, hkum pat ai lam grau grau jat wa nga

Miwa-Myenmung lamu ga jarit, Muse deng (105), gunrai htaw shalai ginra hpe Miwa kawn htaw bang nga ai gunrai ni hpe rim ai hte ja ja hkum pat ai lam ni myen maga na grau grau galaw nga ai lam chye lu ai. July shata (11) ya shani myen hpyen dap a numbat lahkawng kaba dik Maung Aye Miwa-Myenmung ga jarit de sa du ngut ai hpang grau grau hkum pat ai lam law wa ai. Moi shawng de tinang dang ai daram gunrai htaw shalai ai magam bungli ni hpe ahkaw ahkang jaw da ai hta Loi Je - Manmaw, Nam Hkam, Man Waing Gyi kawn Manmaw, hte Laiza - Manmaw - Myitkyina de sa ai lam hta Miwa maga na gunrai htaw shalai ai hpe hkum pat wa nga ai lam, rim ai lam ni hpe galaw wa nga ai lam hpaga la ni kawn tsun wa ai. Miwa-Myenmung Lamu Ga Jarik (Sumla: AFP) Laiza maga na Miwa gunrai ni htaw lung wa ai mawdaw ni hpe Lajayang gate kaw n shang shangun ai hta sha n ga, bu hkawm masha htaw ai mawdaw ni hta gunrai kaji kajaw htaw lung wa ai mawdaw ni hpe mung rim nga ai nga nna Laiza buga masha langai kawn tsun ai. "Ndai shata ka ang (July) kaw na mawdaw ni Lajayang gate kaw n mai lai mat sai. Gunrai n lawm yan gaw mai ai. Hilux, 4 Wheel ni zawn re ai mawdaw hkan moi na zawn gunrai kaji kajaw n mai htaw mat sai. Ndai shata laman grai yak nga ai. Dai majaw gunrai htaw sa htaw wa mawdaw ni grai yawm mat ai" nga nna buga masha tsun wa ai. Loi Je kawn pru wa ai mawdaw ni hpe mung Miwa gunrai htaw na ahkang hkum pat da ai majaw gunrai htaw mawdaw lai sa lai wa ka ang hkup daram yawm mat ai nga nna miwa mung de sa du chyai ai buga masha langai kawn tsun ai. “Mawdaw grai yawm mat ai. Miwa bu hpun palawng, tsi mawan hte kaga gun rai ni hpa mung n mai htaw shalai mat sai. Bu hkawn masha ni hkrai nga yang gaw mawdaw la ni na matu gumhpraw hpa n ngam ai. Shawoi nga yang myenmung hkan de na N-gu, Shing run, lusha gunrai ni hpe Loi Je maga de sa dut nna bai wa ai maga de Miwa rai bai htaw wa ai. Ya gaw dai hku n mai sai majaw mawdaw mung, hpaga galaw ai masha ni mung grai yawm mat ai” nga nna hpaga la langai tsun ai. Miwa-Myenmung ga jarit Nam Hkam hte Man Waing Gyi kawn Manmaw de sa ai lam hta Manmaw ginwang a hpyendu ni kawn Kai Htik mare du hkra sadu nna rim sha nga ai majaw dai lai lam hta hpaga galaw sha nga ai buga hpaga la ni jam jau nga ai lam dai hpaga la tsun wa ai. Miwa mung, Je Gau kawn Myenmung maga de tara n shang sengke htaw bang ai hpe rim zing, gumhpraw hpyi ai lam ni nga wa sai hta ndai July shata (27) ya shani deng (105) makau na hpyenla 2 gaw sengke carry galaw ai marai 10 hpe mayun gumhpraw hpyi sha ai hta manghkang byin ai lam nga lai wa sai nga nna Muse buga masha langai kawn chye lu ai. July shata praw kaw na Myitkyina-Laiza lam lapran gate ni hta shawoi na hta grau grau jep ai lam ni nga ai rai nna Lajayang gate hta hkawmsa hkawmwa masha ni hpe kata labu du hkra jep ai lam ni nga wa sai.