Lahta Sam mung de sinat mahku ngoi pru wa sai

Myen mungdan, Lahta Sam mung de Myen hpyendap hte Kokang hpyendap ni lapran, dai hpawt jau kawn gap hkat hpang wa sai lam, chye lu ai. Ndai August 24, lai wa sai bat Langai Ya shana hta pyada hking hpun ai Myen hpyenla ni gaw Kokand daju Laogai (Law Kai) hpe 'sinat pala mi' mung n kapaw ai sha zing madu la wa sai hpang, masum ya du yang, uhpung lahkawng lapran gap hkat hpang wa ai re lam, Kokang shiga lawk kawn chye lu ai. Dai hpawt hkying 8 ram hta, Myen ni zing da ai Miwa ga jarit makau na ahkyak ai Nansan gate hpe Kokang ningbaw Peng Jiasheng a dap ni sa htim gasat la ai kawn majan byin wa ai re lam, Kokang dap hte ni kahtep ai shiga lawk kawn chye lu ai. Ndai mabyin hta, Kokang dap kawn pyada hking dagraw ai Myen hpyenla marai 20 ram hpe lu rim nna, Myen hpyen nkau gaw Miwa hkran de hprawng shang mat sai lam, matut chye lu ai. Dai hpang, shana de pyen 4 ram hta kalang bai, Kokang dap ni bai zing la ai Nansan gate de Myen hpyen ni htu lung wa ai majaw, uhpung lahkang lapran gap hkat poi bai byin wa sai lam, lamu ga jarit shiga lawk kawn chye lu ai. Bai, daina de hkying 6 hta gaw, Tsa-Ka-Hka masat 1 npu na Myen hpyen ni hte, Wa Mung Myithkrum Hpung (UWSA) lapran gap hkat hpang wa sai lam, ga jarit shiga lawk kawn matut chye lu ai. Ya ten, Myen hpyen asuya a Kaichyan Dap (Tsa Ya Hpa), dap up Lt-Gen Ye Myint mung, majan byin nga ai Kokang ginra de hkyak hkyak sa du nga ai lam, ga jarit shiga lawk kawn chye lu ai. Ya majan byin nga sai, Kokang hte Wa shara ni gaw, KIA Dapba (4) hte Sap Hkung (Tan Lwi Hka) hka sha din ai re majaw, KIA ba 4 mung, Myen hpyen ninghkap gasat na jin jin rai nga sai lam, Jinghpaw mungdaw KIO/A daju Laiza na du salang ni kawn chye lu ai. Ndai ten mung, KIO/A ningbaw ningla ni gaw, lahta na lam n'tsa tinang uhpung kata "ra ahkyak zuphpawng" shaga galaw nga ai zawn, maigan nga J.W amyusha ni kaw mung hpaji hpyi nga sai re. Lama majan byin yang, Myen hpe jawm ninghkap gasat na matu, KIO/A gaw hpunau Kokang, Wa, NDAA-ESS hte SSA-N (Sam) rawt malan hpung ni hte myit hkrum tawn sai re. Kokang ginjaw hpe Myen ni pyada hku shang nna sa zing madu ai mabyin zawn KIO/A e mung n byin hkra, KIO/A gaw tinang Ginjaw ginra Laiza de Myen hpyen ni hpe jashawn, n jashawn lam hpe, sung sung myit sana re lam, Laiza daju shiga lawk kawn chye lu ai.