Tinang shara de shang wa ai Myen hpyen hpe gap na, KIA matsun

Mani kawn, Lahta Sam mung e Myen hte Kokang dap lapran gap hkat hpang wa sai hpang, Wunpawng Mungdan Shanglawt Hpyendap (KIA) mung tinang gaiwang de htu shang wa ai Myen hpyen hpe gap na matu, tinang KIA hpyenla ni hpe ahkang jaw matsun tawn sai re. Ndai matsun gaw Jinghpaw Mungdaw hte Lahta Sam mung nga KIA hpyendap ni yawng hte seng ai rai nna, dai matsun hpe Jinghpaw mungdaw, Miwa ga jarit Laiza daju na KIA Dap Awn Daju, Du Daju Gunhtang Gam Shawng kawn 'ra ahkyak' matsun wa ai re lam, Laiza shiga lawk kawn chye lu ai. Ya ten, grau nna, Kokang ginra hte Sap Hkung Hka sha din ai, Loikang e daju ai KIA Dapba 4 gaw, tinang gaiwang de shang wa ai Myen hpyen ni hpe ninghkap gasat na matu jin jin rai nga sai lam, dai ginra hte ni kahtep ai shiga lawk kawn chye lu ai. Dai hpawt rim rim ten kaw na mung, Kunlong lam maga, Sap Hkung Hka a sinpraw hkrang dingyang, Kokang ginra ni hta, ningbaw Peng Jiasheng a Kokang dap ni hte Myen hpyendap ni lapran, laja lana sinat kaba, amyawk kaba ni hte gasat hkat nga sai lam, shawnglam shiga lawk kawn chye lu ai. Peng Jiasheng maga gasat garum ai hta Wa Myithkrum Hpyendap (UWSA) a hpyenla ni mung shanglawm ai lam, Myen-Miwa jarit shiga lawk kawn chye lu ai. Ndai ten Myen hpyen n-gun law law mung, Sap Hkung Hka a sinpraw hkran maga hku nna, Loikang KIA Dapba 4 daju de man yawng htu lung wa ai hpe mu lu ai nga nna, myi-chyaw-sakse langai tsun dan wa ai re. Laogai makau, Munggu na Jinghpaw salang langai tsun ai gaw, "Myen gaw, Kokang hpe gasat dang la nhtawm KIA hte Wa ni de hpyenman gayin gasat na masing re. Hpa majaw nga yang, KIA hte Wa a matut mahkai lam hpe dan di kau mayu ai majaw, uhpung lahkawng madin hta nga ai, Kokang hpe shawng htim gasat ai lachyum re". Lai wa sai bat Langai Ya, August 24 ya shana hta, pyada hking hpun ai Myen hpyenla ni gaw Kokang daju Laogai de "kani sa jep na matu" ngu gabaw dat shang wa nhtawm, Laogai hpe maja zing madu la sai re. Myen hpyendap hpe madi shadaw ai Kokang ningbaw malai dingsa Bai Souqian hte hpyenma 80 jan mung, Laogai zing madu ai hta shang garum lawm ai lam, chye lu ai. Raitim, kade n na yang, hpyenma malawng gaw Peng Jiasheng maga de bai hprwng shang mat sai lam, ga jarit shiga lawk kawn chye lu ai. Kokang shiga lawk kawn chye lu ai hta, ya ten, Kokang ginra grup gra hta du nga ai Myen hpyen n-gun yawng gaw 7,000 ram rai nna, dai hta Laogai e hpyendap 5 hte dapdung 2 na hpyen hpung ni mung Sinli kawn kahtap lung wa nga ai re, nga ai. Dai hta Pa-an e daju ai Dap Nawng (Tat-ma) masat 22 hte Sagai Ywataung e daju ai Dap Nawng masat 33 na hpyenla ni mung shanglawm ai lam, matut chye lu ai. KIA, Kokang hte Wa laknak hpai hpung ni gaw, Myen hpyen hpe jawm ninghkap gasat na matu, myithkrum tawn sai raitim, ya ten du hkra gaw, KIA hte Wa gaw Myen hte dan dan leng leng gasat ai lam gaw, n nga shi ai re. KNG