Myen Taimu a 'lam seng' mawdaw, masha 3 hpe kahtap adawt hkala tawn

Myen hpyen asuya a Jinghpaw mungdaw Taimu (Dap up) Maj-Gen Soe Win a 'lam seng' mawdaw gaw, Wunpawng Mungdan Shanglawt Hpung (KIO) daju Laiza de sa wa ai, Myitkyina-Laiza mawdaw lam lapran, masha htaw madaw langai hpe sa adawt nna, marai 3 hkala hkrum mat ai lam, myi-chyaw-mu masha ni tsun ai. Ndai mabyin gaw, dai hpawt jau hkying 6:30 a.m ram hta byin ai rai nna, shara gaw, Laiza makau, Nam San Yang mare na, Awng Ja Kadawng yu ai hpunggaw kaw re lam, myi-chyaw-sakse ni tsun wa ai. Hkala hkrum ai masha 3 hta, langai gaw Shingbyen nra (clavicle bone) daw mat ai lam, matut chye lu ai. Dingdung Daw Daju (Ma Pa Hka) Dap Up Du Daju (Maj-Gen) Soe Win Ndai zawn hkala hkrum ai masha ni hte galau dagup mat sai mawdaw hpe, Taimu a masha ni hte seng ang ai mare hpyen asuya ahkaw ahkang lu ai ni hku nna ahkyak hkye mawai ai lam n la ya ai hpe, Nam San Yang buga masha kawn chye lu ai. Myi-chyaw-sakse ni tsun ai rai yang, ndai masha htaw mawdaw Toyota Hilux hpe sa adawt ai, Taimu a lam seng mawdaw gaw, nsam achyang hte Toyota 4-Wheel hpan rai nna, mawdaw nambat gaw 1/hka-3085 (hpyendap mawdaw laisin nambat) re, nga ai. Ya na zawn, Taimu Soe Win hku nna KIO daju de sa du ai lam gaw, hpyen asuya de KIO hpyi tawn ai--- 2010 ralata poi ngut nna pru wa na Jinghpaw mungdaw asuya hta KIO salang ni ading tawk shanglawm na lam hte, KIA dap hpe Kachin Regional Guard Force (KRGF) hku hkrang galai na lam ni hte seng ai lam, KIO salang ni kawn chye lu ai. Lai wa bat manga ya, July 24 ya jahpawt hkying 7 hte 8 lapran hta mung, Taimu Soe Win a mawdaw, Toyota Landcruiser mung, Waimaw hkran, Balaminhtin Mali Hka mahkrai makau, Mung Na mare mawdaw lam makau na Jinghpaw num marai 4 hpe adawt ai hta, asak 45 ning re ai Jauhpa Dai Nyoi gaw kalang ta si mat sai lam, Mung Na (snr Mai Na) buga masha ni kawn chye lu ai. Hpang shani hta, slgj. Dai Nyoi a moimang hpe Myitkyina, Nawng Nang, Jaw Bum J.W Hkristan Lupding Lupra e lup makoi kau sai hta, dai lasu su poi hte lupwa manu yawng a hkrat ang ai gumhpraw hpe Taimu wa jaw ai lam, matut chye lu ai. Dai hta sha n ga, kanu si shakam kau sai asak 10 ning sha re ai ma num sha Tsai Naw a hpaji sharin jarik nga nna mung, Tsai Naw a mying hte Myen Kyat sen 10 hpe Myitkyina mare na hpyen asuya a Myanmar Economic Bank e Taimu hku nna gumhprw mayu bang tawn ya ai lam, n nga mat sai Dai Nyoi a jinghku ni hpe lakap let chye lu ai. Ya ten, ningma sawng hkala hkrum mat ai num hpaw mi 3 hpe gaw Myitkyina, asuya mungshawa tsirung kaba de sa tawn ai lam, KNG kawn sagawn chye lu ai.