Taimu Soe Win gaw 'simsa lam' hpe matut garawt na lam KIO hpe ga hpaw

Jinghpaw mungdaw Taimu Du Daju (Maj-Gen) Soe Win gaw mani July 31 ya shani, Wunpawng Mungdan Shanglawt Hpung (KIO) daju Laiza de sa du ai shaloi, uhpung lahkawng maga simsa lam hpe matut garawt ra ai lam, KIO salang ni de ga hpaw tsun wa sai lam, chye lu ai. Taimu Soe Win hte KIO salang ni lapran, Laiza Manam Jarawp (Hotel) e hkying 10:30 a.m. kawn shani gaang du hkra hkrum shaga ai hta, Taimu wa shawng aten minute 15 ram ga shaga nna, dai hpang KIO ningbaw kaba Lanyaw Zawng Hra hte ningbaw malai Dukaba N'ban La Awng yan mung aten minute 10 ram hpra ga shaga wa sai lam, KIO salang ni kawn chye lu ai. KIO Daju Laiza Muklum, Myen-Miwa ga jarit, Jinghpaw Mungdaw Myen Taimu wa tsun ai hta, simsa lam hpe uhpung lahkawng maga matut shagrin tawn na lam hte, KIO a KIA dap hpe Ga Jarit Sin Dap (Border Guard Force – BGF) hku hkrang galai kau shangun ai lam gaw, hpyen asuya chyawmtari Dukaba Than Shwe a "shawang tsawra myit kaba" hte tsun ai re nga ai lam, zuphpawng lawm KIO salang ni kawn chye lu ai. Bai, KIO ningbaw kaba hte ningbaw malai yan Taimu hpe tsun ai gaw, "KIO a hpyen asuya de hpyi ai lam gaw, KIO a ra sharawng ai lam sha re. Dai hpe shada bawngban jahkrup la mai ai", ngu ai lam, KIO salang ni kawn kahtap chye lu ai. Ya hpang jahtum, KIO a Myen hpyen asuya de hpyi tawn ai lam gaw, htaning na ralata poi ngut nna pru wa na Jinghpaw mungdaw asuya hta KIO salang ni ading tawk shanglawm na lam rai nna, KIA hpe Jinghpaw hkrai sha san re ai, Kachin Regional Guard Force (KRGF) hku hkrang galai hpaw na lam re. Ndai Myen hte Shanglawt (KIO) a Laiza zuphpawng hta shada tsun jahprup hkat ai lam ni hpa n nga ai sha, uhpawng lahkawng a ningbaw ni ga shaga ngut ai hpang, "shada da lapran na manghkang hpe tinang hte seng ai mungchying masha ni hpe chye na hkra sanglang dan ga" ngu myit hkrum let zuphpawng shangunt ai lam, matut chye lu ai. Dai hpang shaning ga-ang e shani shat jawm sha ngut ai hpang, Taimu Soe Win gaw Laiza na laika sharin jawng hte tsirung ni de sa du gawan nhtawm, shana de hkying 3:30 p.m. ram hta Jinghpaw mungdaw mare daju Myitkyina na Dingdung Daw Daju (Ma Pa Hka) de bai nhtang wa sai lam, chye lu ai. Ya na zawn, Taimu wa Laiza de sa du ai ten lak lai ai lam hku nna, Wunpawng Mungdan Shanglawt Asuya ngu ai KIO npu na magam dap ni a lithkam ni hpe shanhte a aya hte hkrak shachye ya ai lam re lam, chye lu ai. Dai magam ni hta--- KIA Dap, Hpaji Dap, Hkamja Dap, Sut Gan Dap, Sut Masa Dap, Buga Gaw Sharawt Dap, Maling hte Hkai Rem Dap, Ginjaw Tara Dap hte, Htunghking hte Laili Laika Dap ni shanglawm ai lam, KIO salang ni kawn chye lu ai. Ndai Taimu Soe Win a Laiza hkrunlam hta yawn hpa langai gaw, shi a lam seng (snr lam shawng) mawdaw langai gaw, Laiza makau, Nam San Yang mare na Awng Ja Kadawng yu ai lam hpunggaw e masha htaw Toyota Hilux mawdaw langai hpe sa adawt nna, marai masum hkala hkrum ai hta, marai langai gaw shi a Shingbyen nra (clavicle bone) daw mat sai re.