Uru Sengmaw Ga e Myen hte KIA lapran, ganoi gap hkat

Lai wa sai bat lahkawng ram hta Jinghpaw mungdaw, Hpakan Uru Seng Maw ga e Myen hte Wunpawng Mungdan Shanglawt Hpyendap (KIA) lapran, ganoi noi gap hkat wa madung du wa sai lam, Hpakan shiga lawk kawn chye lu ai. Seng Ra e jung ai KIA dapdung 6 hpe Hpakan Byuha na Myen hpyenla ni wa wang ai hpe KIA hpyenla ni bai kahtap wang tawn ai mabyin hta, gap hkat na ri ri rai sai ten, KIA Dap Awng Daju Du Daju Gunhtang Gam Shawng ahkang n jaw ai majaw, majan hpe koi yen lu ai re lam, dap 6 hte ni nawn ai shiga lawk kawn chye lu ai. Ndai mabyin hta, KIA dapdung 6 hpe Dap-up Major Yawngba Shawng woi awn nna, Myen hpyen hpe gaw Hpakan Byuha-mu Col. Than Aung woi awn ai hte, Myitkyina de na Myen hpyenla ni mung n-gun jat lawm ai lam, Hpakan buga masha ni kawn kahtap chye lu ai. Ya ten KIA hpyenla ni hpe shawnglam de moi gap hkap ten na zawn gawan hkawm na matsun tawn tim, tinang shawng sinat n kapaw hpang na matsun tawn ai lam, KIA shiga lawk kawn chye lu ai. De a shawng e sha, KIA dapdung 6 hte Hpakan byuha-mu lapran, "July praw 4 hte 5 ya shani byin ai, Uru Hka Mawru hte Ga Sharut Gyi ai mabyin" hpe lungseng company ni hpe lam jasan jaseng shangun na gabaw n'tsa, tsawm ra mi ga dang rang hkat wa sai lam, chye lu ai. Mabyin gaw, ga gyi, hka mawru byin ai hpang shani hta, KIA Dap 6 dap-up wa hte malawm ni gaw, "Mawdaw lam bai jasan jaseng na bungli hpe seng ang ai lungseng company ni hpe galaw shangun ga" ngu, byuha-mu hpe sa bawngban yang, "Lahta matsun n nga ai nga nna, ningdang" kau ya ai majaw re lam chye lu ai. Dai majaw, KIA dung 6 dap-up wa hte malawm ni gaw, Hpakan-Seng Tawng lapran na 'Tit Tong Long' lungseng company rung daju de sa nhtawm, lam jasan jaseng na matu sa tsun ai shaloi, byuha-mu ahkang n jaw ai nga nna ningdang wa ai majaw, sinat shaw jahkrit dan ai lam, galaw wa sai hpe sagawn chye lu ai. Ndai zawn KIA dung 6 ni Tit Tong Long company de sa nna lam jasan jaseng na matu sinat shaw jahkrit mat ai mabyin hpe company hku nna byuha-mu hpe tang madun ai majaw, dai lam a ntsa dap 6 hte byuha-mu lapran nhtoi bat mi ram na hkra dang rang hparan hkat wa sai lam, Hpakan buga masha ni kawn chye lu ai. KNG