September shata praw 9 ya, ndai bat masum ya shani hta kalang bai 7 lang ngu na, Myen hte KIO ni, Jinghpaw Mungdaw mare daju Myitkyina e bawngban jahkrup wa sai raitim, mahtai kaja gaw n le ai lam, chye lu ai.
Zuphpawng hpe Myitkyina e daju ai Myen hpyendap a Dingdung Daw Daju (Ma Pa Hka) e galaw wa sai hta, shawoi na hte maren, Myen gaw KIO npu na Wunpawng Mungdan Shanglawt Hpyendap (KIA) hpe "Border Guard Force (Jarit Sin Dap) hku hkrang galai na lam" sha kahtap htap tsun wa ai lam, KIO datkasa ni hpe lakap let chye lu ai.
Ndai zuphpawng hta Myen datkasa ni hpe Kaichyan Dap (Tsa-Ya-Hpa) lithkam hte Naypyitaw jahkrup jahkrum ningbaw Lt-Gen Ye Myint woi awn nna, KIO datkasa hpung hpe Tingnyang-up Malai 1 Dukaba Gauri Zau Seng woi awn ai re.
Zuphpawng kaw shanglawm sai KIO datkasa langai KNG de tsun ai hku rai yang, Dukaba Ye Myint gaw "KIA hpe Jarit Sin Dap galai na gaw ahkyak dik rai na re lam" sung sung sanglang dan nna, ngam ai KIO tang madun ai lam ni gaw manghkang kaba n re ai hku" tsun wa sai re, nga ai.
Lai wa sai July shata kawn KIO kawn Myen de tang madun tawn ai lam gaw, tinang KIA dap hpe Kachin Regional Guard Force (KRGF) hku nga mayu ai lam hte, htaning 2010 ralata poi galaw lu nna pru wa na Jinghpaw Mungdaw asuya n'nan hta KIO masha ni ading tawk shanglawm mayu ai lam, rai nga ai.
Ndai lang galaw ai zuphpawng hta, KIO datkasa ni, Myen de bai jat tang madun ai lam gaw, uhpung lahkawng lapran na simsa lam hpe matut aten garawt na lam hte bawngban jahkrup ai lam ni hpe htaning na ralata poi kawn pru wa na asuya n'nan hte bai matut galaw mayu ai lam re lam, KIO shiga lawk kawn chye lu ai.
Zuphpawng hta uhpung lahkawng lapran mahtai kaja jaw hkat ai lam n nga tim, shawoi na hte maren, pru wa ai laklai ai lam hpe tinang uhpung hta bawngban la nna shada bai hkrum hkat na hku sha tsun hkat let, zuphpawng hpe shangut ai lam, KIO datkasa ni hpe lakap let chye lu ai.
Ndai ten, Myitkyina zuphpawng na KIO daju Laiza de du wa ai KIO/A a shiga dap de ga shaga na ahkang lu ai, Tingyang-up Malai 1 Dukaba Gauri Zau Seng hte Ninggawn Amumadu Dr. Lahkyen La Ja yan gaw, seng ang ai maigan daju shiga dap ni a san-htai galaw ai lam hpe n hkap la ai re.
Maga mi de mung, ndai zawn KIO ni Myen hte hkrum ngut sai hpang, ya ten, J.W mungchying mungshawa ni lapran "KIO gaw Myen hte matut bawngban na kun? snr Mahtai kaja n pru na zuphpawng hpe jahkring kau na kun?" ngu nna, KIO a shawnglam dawdan sa wa na lam hpe grai myit lawm nga ai, rai nga ai.
Bai, hpyen asuya chyawmtari Dukaba Than Shwe gaw KIO a tang madun ai lam hpe n hkap la ya ai sha n ga, KIO kawn Naypyitaw de dat ai Rev. Dr. Lahtaw Saboi Jum woi awn ai "mungmasha simsa lam tam hpung" hpe mung, hkrum na 2 lang tup ningdang kau sai re.
Ya na zawn, tinang hpyen asuya hku nna KIO hte bawngban ai lam mung, Dukaba Than Shwe hte mungdan hpyen asuya a "Tsawra shawang myit majing a majaw re" nga, tsun nga ai re. Hpa majaw nga yang, KIO gaw Myen hpyen asuya shi myit ra ka ai Mungdan a gawda ai tara kanu nhprang hpe maning 2008, May shata hta madi shadaw kau sai majaw re nga nna, hpyen asuya tsun nga ai lam KNG kawn sagawn chye lu ai.
0 comments:
Post a Comment