Maigan mungdan de du nga ai manang wa Myu Tsaw hpang de shagun laika
Tsaw ra hku hkau dik ai manang wa Myu Tsaw hpang de ndai laika hte
hkrum shaga dat lu n ngai. Manang wa Myu Tsaw ngwi pyaw hkam kaja ai hte seng
ang ai magam bungli ni hpe gun hpai shakut shaja nga na hpe kam ai. Anhte buga
de nga ai Myu Sha ni yawng mung ngwi pyaw hkam kaja let sha, tinang hte seng
ang ai magam bungli ni hpe n hprai ai sha gun hpai nga ga ai.
Manang wa Myu Tsaw e, Manang wa a Myu hpe tsaw ra ai myit, Mungdan hpe
tsaw ra ai myit ni hpe chye lu ai majaw na chying wa kabu myit dik la n ngai, n
gun mung lu ai. Manang wa a Myu tsaw, Mung tsaw ai myit masa ni, Manang wa a
Myu hte Mungdan n tsa mu mada ai ningmu ni hpe Internet website hkan ya sha sha
mu lu ai, grai kaja ai lam ni re.
Rai tim Manang wa Myu Tsaw e, Manang wa a Myu tsaw Mung tsaw ai myit
masa ni loi li shai taw nga ai hpe mung mu lu ai. Myu hte Mungdan hpe tsaw ra
ai myit nau kaba ai majaw rai na re shadu ai. Manang wa a Myu tsaw Mung tsaw ai
myit masa ni lam numshe de loi shang taw ai hpe mu lu ai. Dai hpe shading
sharai kau dat yang jet ai Myu tsaw myit majing byin wa na re hpe kam ai.
Mungdan kata Myu hte Mungdan a matu magam gunhpai shakut shaja nga ai
Ningbaw Ningla ni hpe hkrai mara tam shagun nga yang gaw anhte a Mungdan galoi
mung lawt lu lam mu na n re. Ta tut shakut shaja nga ai Ningbaw Ningla ni hte
magam gun ni yawng mung Myu hte Mungdan a matu nga n-na gun hpai ap nawng nga
ma ai hpe mu lu ai. Shanglawt nga hte maren Myu hte Mungdan lawt lu na lam hpe
n sim n sa shakut nga ma ai. Magam gun ni yawng mung grai chye, grai chyang dum
na gun hpai nga ai gaw n rai na ma ai, Myu Sha ni a matu Mungdan a matu myit
n-na, gun hpai shakut nga ai ni she rai na re hpe kam ai. Nang ngai zawn sha, shanhte
mung shinggyim masha re ai majaw ra rawng gawng kya ai lam ni gaw lata lahtum n
shut nga na ma ai. Shanhte a ra rawng gawng kya ai lam ni hpe tam na sha mara
shagun taw nga yang gaw hpa lachyum pru na n re. Anhte a Myu Sha ni hte Mungdan
mung lawt lu wa na n re.
Dai ni na aten, anhte a Myu Sha ni hte anhte a Mungdan lawt lu na lam
grai a hkyak nga sai re. N dai zawn lawt lu na lam hta myit hkrum gahkrin gum
din na grai nan ra a hkyak nga sai. N law la ai anhte a Myu Sha ni myit hkrum gum
din ai lam n nga ai sha nangshoi nangsha nga n-na shada mara shagun hkat nga
yang Myu Sha hte Mungdan lawt lu na lam hta grau grau hkrat sum wa maga de sha rai
mat na re. N dai zawn Myu Sha ni shada n ru n ra byin hkra mung Maigan ni
sumprat dawk bang taw nga ai hpe mung dum shai ra ga ai.
Dai majaw manang wa Myu Tsaw e, ta tut magam gun hpai nga ai ni hpe
htaw ra le ra nga mara n sha gun nga ai sha, gara hku galaw sa wa yang awngdang
na, gara masa, gara ladat hku galaw yang mai na ngu ai lam ni hpe mahtang hpaji
jaw la ga, garum shing tau la ga ngu mayu ai re. Dai rai yang she Magam gun nga
ai Ningbaw ni mung n gun lu nna Myu Sha lam hpe grau grau awng dang ai hte gun
hpai lu na re.
Manang wa Myu Tsaw e Myu Sha ni hte Mungdan lawt lu na lam hta shada
nangshoi nangsha n nga ai sha myit hkrum myit ra ai hte lahkrip ra ra jawm
shakut sa wa ga. “Myit hkrum ai gaw n-gun” re da. Dik na hpa mi n lu garum ai
rai tim tatut magam gun hpai nga ai ni a matu kyuhpyi ya ai hku nna garum
shingtau mat wa ga ngu tsun mayu ai re.
Hku hkau ai manang wa Myu Tsaw myit mang galaw sa wa ai lam ni yawng
awngdang lu u ga.
Anhte a Myu Sha ni hte anhte a Wunpawng Mung dan mung lawan lawt lu u
ga.
Manang wa,
Tawk Hkam
11 Sept, 2009
0 comments:
Post a Comment