Ndai bat laman, KIO gaw Naypyitaw dukaba langai hte hkrum na

Shada bai gap hkat ra na masa de shanawng nga ten, Wunpawng Mungdan Shawnglawt Hpung (KIO) gaw Naypyitaw mungdan daju na Myen dukaba langai hte, ndai bat laman Laiza daju e hkrum shaga na re lam, Laiza shiga lawk kawn chye lu ai. Shada hkrum shaga na gabaw gaw, lai wa sai bat laman, lahta Sam mung na Kokang simsa lam hpung a ginra hpe Myen hpyen ni maja zing madu la sai hpang, KIO hte Myen lapran, bai gap hkat na zawn, shada shachyen hkat nga ai masa hte seng na re lam, Laiza na KIO salang ni hpe lakap let chye lu ai. KIO salang ni tsun ai hku rai yang, Myen Kaichyan Dap (Tsa-Ya-Hpa) Lithkam hte amyu bawsang simsa lam hpung ni hte jahkrup jahkrum ningbaw Lt-Gen Ye Myint hte, September praw 6, du na Laban Ya shani hkrum na re, nga ai. Naypyitaw dukaba hpe, KIO de na Ningbaw malai Lt-Gen N'ban La Awng hte Tingyang-up Malai 1 Lt-Gen Gauri Zau Seng yan hkap la hkrum na masa nga ai lam, KIO shiga lawk kawn chye lu ai. Dukaba Ye Myint hte n hkrum shi ai, lani mi jau nna, September praw 5, Bat Kru Ya shani hta, KIO ningbaw ni gaw Jinghpaw mungdaw shara shagu de na, saw shaga tawn ai buga salang ni hte shawng 'hkyak hkyak hkrum shaga na' hkyen lajang tawn ai lam, KIO du salang ni kawn chye lu ai. Laiza na buga masha nkau KNG de tsun ai gaw, ndai buga salang ni hte hkrum shaga ai zuphpawng hta KIO gaw Myen hpe "bai gap na, n gap lam" hpe bawngban dawdan wa na masa nga ai, nga ai. Maga mi de rai yang, Myen gaw Kokang ginra hpe gasat la ngut sai hte de a makau, dingda de nga ai, Wa Mung Myithkrum Hpyendap (UWSA) a uphkang ginra ni de hpyen n-gun, laknak kaba ni hte commando hpyenla ni jat bang nga sai zawn, Kokang ginra a dingdung de na Loikang de daju ai KIA Dapba 4 ginra de mung, Myen hpyen ni shani bang nga sai lam, Myen-Miwa ga jarit shiga lawk kawn chye lu ai. Bai nna, Mongla (Mai La) e daju ai National Democratic Alliance Army-Eastern Shan State (NDAA-ESS) a ginra hte de a makau Mai Hpyat mare ni de mung, tank mawdaw ni, myawk kaba ni hte hpyen n-gun ni jat bang nga sai lam, myi-chyaw-sakse ni tsun dan wa ai re. Ndai ten, simsa lam hpung ni a shiga lawk hku chye lu ai rai yang, Myen hpyen asuya a nambat 2 chyawmtari dukaba Maung Aye gaw Myen-Miwa ga jarit na laknak hpai hpung yawng hpe gasat shamyit kau na matu, lai wa sai Laban Ya shani, tinang hpyendap ni de aming jahkrat dat sai re, nga ai. Dai re majaw, Myen hpyen ni matut nna Wa mung hte KIO/KIA ginra ni de shani bang wa tik tik rai wa yang gaw, majan bai byin wa na gaw lata layung daw hti sha rai sai lam, Wa hte KIO/KIA shiga lawk kawn chye lu ai. KNG