Mungkan hta mu mada ai num nai ni yawng
Ninghkraw jan n-sam hte hkra, Shingnip shingna ni byin pru wa
Ngai a salum kata ajan ngu ai mung n-lu, shingnip ngu ai mung n-mu
Raitim lam mi bai sumru, Nu yan Wa a chyeju
Asak apart hkum sai shan, Ap nawng shangai chyinghkai ten kawn
Makawp maga sharin wa yak hkak jam jau lam ni lapran
Atsam htum hkra htoi tu ai...
Nu gaw san tsawm shata hkawn, Wa gaw htoi san ning hkaw jan
Daini brangtung brangla ten du hkra, lam woi jasat ai sharin ga
Prat a lachyum woi shaleng ya, tsawm shingnip de woi sa ai sharing mung ga
Ninghkaw jan a n-sam shingna langai hpa, ngai a salum kata lwi shang wa
Shaloi salum shingni ....
Aw... chyeju madu nu yan wa, nan a chyeju shadawn shadang mung n-nga
N-htum hkayan langai zawn, ading sha lwi ai majaw mung
Chyeju dum n-na shakawn shagrau n-hpra n-ngai oi….
Shinggyim maka pru n-na, Nu a hkri tung hta sa pra
Wunpawng bum hta shangai, Wunpawng shadang ngai nan rai .
Nu gaw shinggyim machyi kadau, chyinghkai wadi Karai makam hpe jahtau
Ngai shadang hpe aw law ai, mare masha yawng zim lum sai.
Hpaw goi hpawtsu she gashai, jahtawng japhtu mung n-hprai.
N-baw n-nyeng yawng makai, yu hkrat tsa hku yu nga shan mung yawng hkum sai
Htung hkring maka hte hkrang raw, K’rai mungga hte dai daw
Labang ma Naw Lat ngu mying jaw
Jahtawng htu daidaw shangai poi, shingran dat yang kabu n-ngai oi ..
Lak lai htunghkring jaw ya ai, Karai Wa hpe chyeju dum ai.
Mung masa n-tsawnm ai, sut masa n-nga ai
Htaw shagawng bum ling bum lang ni a lapran
Chying hkai nu a madoi chyuhpang hpe lu n-na pra
Chyinghkai wa a shinglum tsaw myit hta nga kaba
Machyi makaw tsi hpaw jaw
Sharu shayak hkrap aput oi ye nu sha nga ba shayu
Ngai kasha shayak ai, Nu pyi gawng run sai.
Yup gan gan hkam maza ran, yup mang pyi n-mu n-htoi htoi
Yup su yupma yuptung shana ni law law lai, aten ladaw mung wai
Shangai chyinghkai ladaw mung kashai
Chying hkai nu a madoi chyu hpang hpe rap, laika sharin jawng de kap
Sa-up la ai n-lum ten du, Nu a layit gaw bungsoi jaw ya lu
Nu a hkum la salat chyu,
Lanam marang ni htu abya yi awn magam mung shakut ra
Ngai gaw n-ta kaw alum sha
N-rut n-ra pyi ga abrep na zawn nga, katsi la ai n-shung ta wa
Nu jahpum ai hpajawng hte ngai lum nga
Hkuwawt na bungshi ni Nu a hkum hku hta adawt nga
Shingra tara hpyen ni yawng Nu yan Wa hpe hkum hput di
Aw... ngai kasha shinglum lu hkra, Nu yan wa n-de mi jam jau hkam ahka
Kaji ten hpe myit dum yang, pasi ni dang pai hpe grau dum ai.
Nu a dingsin maka grai tsawm ai, Wa a dumsum pyi ngawn dik sai.
Kraw n-hkrat ai yulihku, Wa gaw jumju Nu gaw nai htu
Mayin machyawm yagyi shat, namchyim hkum ai mu dik sa
Nam nai tung the hkainu shat, ngai a matu gaw n-gun jat
Gwi wau u goi pyi n-mai,Nam kyem ngu ai gin ra dai
Machyu pala n-hkrit n-kang, ngai kasha kawsi hkum na she grau tsang
Goi... tsawra ai Nu yan Wa dai ten ni wa, kade she myitru tsang pu jam jau hkrum sa hka
Tsin yam soi hpa kaw na lawt lu hkra, woi shakut ai Nu yan Wa.
Htung hkring ningli, myutsaw katsi
Hpaji hparat makam masham shinggyim lai len magum sumhpa
Lachyum dan len htai tsun sara, jin ngu ai n-nga tsaw Nu yan Wa
Nu yan wa a ma tsun ga, uhpung kata akyu pru ra
Kyang tsawm ningja tai u nga, chyeju ning shawng prat ning shawng
Htoi san ning hkaw jan lagaw, gat dwi shingnip de woi sa
Nu yan Wa a chyeju gaw, dwi katsi ai hka nam tau langai hpa
Nu yan wa a la swi lasa, n-rut n-ra tsam marai yawng hkra
Ngai kasha a matu arang jaw ap nawng ya
Baw hpraw wa rum gawng shayun, mashi marung mung gakung
Gawng kung prat ra makung yu, daw hkrawng sumdoi hpe machyu
Prat pra magam yawng jin ngut ngai kasha hpe hpa lai magma ap ya sai
E Nu a chyeju hpe dum lu kraw sindai hta myi prwi pru
N-ja n-hpra la n-ngai, salum kata hkrap madai ai oi ..
Nu yan wa a chyeju, ngai kasha a n-tsa hpring kabrat
Aw....
Sumsing chyinghka e grin, gingding aga ing nga na sai le.
Nu a shakawn ga wa sharin ai shawnglam hkrang shingna tsawm pra dan leng wa lu hkra
Tatut hkrang shapraw na ngai kasha, ga sadi jaw n-ngai Nu yan Wa.
Wunpawng bum a gam maka, ngai shadang hta mung lit nga
Wunpawng annau ni mahkri jum maka rum, pri nem sindun wa lu hkra
Ning shawng tai na law law ra, amyu htung hkring makam masham
Laili laika prat dep masa rawt jat bawngring wa uga
Ngai shadang nan shang lawm nang
Umm .. shaloi she
Chyurum annau ni ngu ai hpum da du, majoi shingra a lachyum pru
Wunpawng bum mung kabu, Nu yan Wa mung kabu hkin lum lu .
Chyeju htang ai mahkrun pru, tsawm ai tsaw myit a chyeju
Tsawm marai kaba hpung rawng u ga law..
Aw ..Nu yan wa chyeju, ya sha ya sha sawn sumru
Shadawn ga yan ngai n-mu, sung htum tsaw htum ngai tsun yu tim
Hpun tang n-du ai zawn ngu htaw lamu gang hkau na shata shagan hta law htam ai
Nam muk dara hka pang lai, hking gau tam yang naw nga ai .
Nu yan Wa a chyeju ka shagawp yang n-ma, tsun jahta yang n-hpra
Dai ni nawku hpung kawn masat ai, July shata 26 du ra ai .
Sut ai mali shata n-htoi gu, kanu kawa shagrau poi kaba du
Shagrau kumhpa mung ngai n-lu, sut gan aja ngai n-su.
Shingni ga yan hpe machyu, Nu yan Wa shalat da ai kraw lawang lung pa hta tawk ka sai
Shingni ga yan she kapyawn, ninghpa manawng hte shakawn
Nu yan wa a chyeju hpe shakawn ai, salum gasi n-dai shagrau kumhpa sak jaw dat n-ngai
Ningmu kaja woi shalat ai, RVA hpe mung chyeju dum n-ngai
Nu yan Wa mung mani sum sai, kabu myitdik let hkap tau na sai
Asak galu ngwi pyaw chyeju, hpan wa karai shaman ya u ga lu...
Patrick Jawnghpawk Naw Lat
PLN
0 comments:
Post a Comment