KSPP pati gaw Jinghpaw mungdaw e jau ralata poi zinlum nga

Ndai laman, Jinghpaw mungdaw kata jau ralata poi zinlum ai lam hpe, Myitkyina-daju Jinghpaw Mungdaw Rawt Jat Pati (KSPP), galaw nga ai lam, chye lu ai. Madung, mungdaw a me ginra kaba dik rai nga ai, Myitkyina hte Manmaw ginwang hta Kachin State Progressive Party (KSPP) salang ni sa zinlum nga ai re lam, dai ginra lahkawng na buga masha ni tsun wa ai. Lai wa sai bat kawn Myitkyina, buga shara shagu de J.W mungshawa ni hpe htaning Myen hpyen asuya woi galaw na ralata poi hta KSPP pati shang shingjawng lawm na lam n'tsa, zinlum ai re lam, buga salang langai KNG de tsun wa ai. Dr. Manam Tu Ja, KIO tingnyang-up malai 2 dingsa hte Jinghpaw Mungdaw Rawt Jat Pati (KSPP) ningbaw Bai nna, Manmaw Ginwang de mung ralata poi hte seng nna KSPP hpung langai sa du zinlum nga ai gaw, ndai Oct. 22, lai wa sai bat hpang mali ya shani kawn ya ten du hkra re lam, buga masha ni kawn chye lu ai. Oct. 22 kawn 24 ya laman, Manmaw mare e zinlum ai hta, buga salang ni hku nna KSPP salang ni hpe ninghkap ga san ni law law bai htang san mat wa sai lam, chye lu ai. Ga san ni hta, 2010 ralata poi gaw Myen hpyen asuya shi myit ra ka ai Mungdan Gawda ai Tara Kanu n'nan hta ningpawt nna galaw na re majaw, dai kaw "KSPP shang shingjawng lawm tim, pati a mungmasa bandung gaw lu na n re lam" san mat wa sai lam, Manmaw buga salang ni hpe lakap let chye lu ai. Ndai hpyen asuya woi galaw na ralata poi shang na yaw shada let, Jinghpaw mungmasa pati KSPP ngu ai hpe Jinghpaw Mungdaw Pran Wan Komiti (Kachin State Interim Committee) kaw na dai ning shaning n'nan ten hpaw ninghtan dat ai re. Ndai Pran Wan Komiti hpe madung, KIO, NDA-K hte Myitkyina e daju ai Wunpawng Amyusha Mungbawng Rapdaw (WMR) ni jawm madi shadaw ya ai n-gun hte maning 2008, June shata 20 ya hta Myitkyina e hpaw dat ai, rai nga ai. KSPP gaw tara shang pati gaw n byin shi tim, hpyen asuya ahkang jaw ai hte tara shang pati byin lu hkra shawk shawn na re lam, chye lu ai. KSPP hpe Pran Wan Komiti ningbaw hte KIO a Tingnyang-up Malai II dingsa, Dr. Manam Tu Ja woi ningbaw ai re. Ya ten, J.W laknak hpai simsa lam hpung ni hta Myen a Jarit Sin Dap de n gale ai sha, shingtai ngam nga ai KIO/A gaw, shi a jahtum tang madun laika hpe hpyen asuya chyam tari dukaba Than Shwe hpang de ndai shata praw e tang dat sai re. Dai laika hta, "hpyen asuya hku nna, Myen ningbaw Dukaba Awng San hte bum nga Sam, Hkang, Jinghpaw ningbaw ni, Mung Hpawm Myen Mungdan hpe jawm gaw de ai ningpawt Panglong Ga Shaka hte de a myit jasat hpe hkapla, hkan sa na rai yang, KIO/A gaw Jarit Sin Dap n gale ra ai, laknak yawng ap kau na lam," tang madun tawn ai, rai nga ai. Raitim, dai lam ntsa Dukaba Than Shwe a htang shana ai lam, ya ten du hkra n nga ai lam, KIO salang ni kawn chye lu ai. Dai re majaw, ndai Jarit Sin Dap manghkang kawn Myen hte KIO/A lapran majan bai byin wa chye ai hpe Jinghpaw Mungdaw hte Lahta Sam mung na buga masha ni myit tsang let, maja let nga nga ai re. KNG