Mali Zup madim n byin hkra, Hkalup, Hkahtawlik ramma ni arau akyu hpyi

Lai wa sai bat kru ya, Oct. 24 hta, Jinghpaw Mungdaw, Mali Zup madim n byin na matu, Myitkyina, Jaw Rap na Hkahtawlik hte Hkalup ramma ni shawng n'nan lang arau jawm akyu hpyi wa sai re. Ndai akyu hpyi lamang hpe, Hkahtawlik nawku hpung a Nhkai Bum lagaw Udang Bum e galaw ai hta, madung Lamung Zup mare hte Chyinghkrang mare, nawku hpung lahkawng na ramma n-gun 150 jan sa du sai lam, madu nan shanglawm sai ramma ni tsun wa ai. Lamang hta Karai Kasang Mungga hpe Hkahtawlik nawku hpung na Wa Jau lahkawng garan gachyan nhtawm, kaga hka madim hte seng ai lakjet ni hpe mungdan kata NGO, Shalom Foundation na mu gun nkau jaw sai lam, ramma ni hpe lakap let chye lu ai. Hka Mazup makau e tap gap nga ai Asia World Company. Buga ten jahpawt hkying 9 a.m. kawn hkying 4 p.m. du hkra galaw ai lamang hta, ya Mali Hka hte N'Mai Hka zup e galaw na hka madim kaba masing ntsa, shada bawngban lu sai zawn, dai masing n byin na matu mung Karai Kasang kaw aja awa jawm akyu hpyi sai lam, lamang de sa du ai ramma ni tsun wa ai. Bai nna, mying kaba ai Blast Yungwi hpung a "Mali Hka" ngu ai, Mali-N'Mai Zup e madim dim na n ra sharawng ai Jinghpaw mahkawn hpe mung, mungdaw mahkawn zawn, n-gun mi alu yawng jawm mahkawn hkam sha wa sai lam, ramma ni KNG de tsun wa ai. Mali-N'Mai Zup e hka wanjak kaba shachyaw na madim dim na masing hpe Myen mung na Asia World Company hte Miwa asuya a China Power Investment Corporation (CPI) yan, jawm hkrang shapraw nga ai re. Lai wa sai 2006 ning kawn hka mazup e jep chyam ai lam galaw hpang wa sai raitim, ta tut hkrang shapraw na myit hkrum ga shaka hpe gaw Myen hte Miwa asuya lahkawng lapran, Beijing e dai ning June 21 ya shani galaw wa sai, rai nga ai. Mali Zup hka madim masing hpe Myitkyina-daju Wunpawng Amyusha Mungbawng Rapdaw (WMR) gaw J.W amyusha ni a gawng malai hku, lai wa sai 2007 ning May 21 ya hta, Myen hpyen asuya ningbaw dukaba Than Shwe hpang de laika hte tang madun sai re. Ndai WMR laika n'tsa, ya ten du hkra, hpyen asuya hku nna bai htang shana ai lam tsepkawp n nga ai, rai nga ai. Maga mi de, Jinghpaw mungdaw na J.W laknak hpai simsa lam hpung ni rai nga ai--- KIO/A, NDA-K hte Lasang Awng Wa Simsa Lam Hpung ni mung, Mali-N'Mai Zup hka wanjak masing n'tsa, hpyen asuya de tara shang ninghkap ai lam ni n galaw ai re. KNG