Manmaw e ngang kang ai J.W htunghking kumla gaw gap na, Myen taimu Soe Win pat

Jinghpaw mungdaw, Manmaw mare e dai ning shaning ten kawn ngang kang ai Jinghpaw htunghking Manau wang, Manau shadung hte Manau nta gaw gap hkyen ai lam hpe, Myen hpyen asuya a Dingdung Daw Daju (Ma-Pa-Hka) Dap-up (taimu) Du Daju Soe Win, pat hkum tawn ai lam chye lu ai. Manmaw mare kaba kawn deng 2 jan tsan ai, Awng Ta mare e, tsaw de pe 50, galu de pe 100 ram re ai, bilat ga hte ngang kang ai Manau shadung shachyaw hkyen ai hpe, lai wa sai June 12 ya shani, taimu Soe Win a matsun hte maren, Manmaw asuya salang ni pat kau ya ai re lam, htunghking salang ni kawn chye lu ai. November 12 ya hta, ndai zawn Manmaw Manau pa hpe Myen hpyen asuya a bulldozer langai, ganaw jahten nga yang. Pat kau ya ai lam gaw, Manau wang hpe "Jinghpaw Laili Laika hte Htunghking Hpung (JLH)" ngu shamying ai hpe, dai gaw “Jinghpaw amyu hpan langai hpe sha, madi madun ai majaw gabaw n htuk ai”, ngu nna re lam, Manau komiti malawm ni tsun wa ai. Ndai zawn Manau shadung gaw gap ahkang n lu ai mabyin hta, malawm 20 jan hte hpaw ai Manmaw JLH komiti kata salang ni lapran, “n ru n ra hte myit n hkrum ai lam ni” nga ai majaw mung re nga nna, Manmaw buga masha ni sawn nga ma ai re. Kaja wa Manau shadung hpe gaw gap ai yaw shada lam gaw, Jinghpaw Wunpawng amyusha ni myit hkrum mang rum ningja hte rau kanawn mazum gahkyin gumdin lu na matu re lam, Manmaw JLH salang ni KNG de tsun wa ai. Ya na zawn, Manmaw e shawng n’nan Manau shadung gaw gap hkyen ai lam, pat kau hkrum ai majaw, buga masha ni myit n pyaw nga ai ten, Manau shadung gaw gap lu wa hkra, htunghking komiti hku nna matut shakut na re lam, KNG sagawn chye lu ai. Ndai November 12 ya hta sha, Manau wang hpe November 26 kawn 28 ya laman galaw na, “2 lang na Manmaw Ginwang a N’Lung N’nan Sha Sut Manau Poi” a matu hkyen lajang ai hku nna, Manau nau ra pa hpe bilat nem na hkyen lajang nga ai lam hpe hpyen asuya a ga htu jak (bulldozer) langai sa ganaw jahten kau sai re. Manau pa hpe bilat hte n lu nem tim, masat tawn ai nhtoi hta N’lung N’nan Sha Sut Manau Poi hpe matut galaw na re lam, htunghking salang ni hpe lakap let chye lu ai. KNG