Sahtu Zup mare jahten kau na lam, Yuzana company jahkrit wa

Jinghpaw mungdaw, Hugawng Pa a lamu ga la ba ga-up madu tawn ai Yuzana company gaw Sahtu Zup mare hpe “jahten kau na lam” jahkrit shama tsun lai wa sai lam, Hugawng shiga lawk kawn chye lu ai. Ndai November 18 ya shani, Yuzana company a amu galaw masha Myen ni hte Sahtu Zup mare ramma ni lapran ga law hkat ai hta, company masha ni gaw shanhte yi galaw tractors 7 gawt sa nna, Sahtu Zup mare hpe htu jahten kau na matu, jahkrit shama tsun wa sai re lam, buga masha ni kawn chye lu ai. Hugawng pa e gaw gap nga ai Yuzana company a jak rung kaba langai. Hpa majaw, ya na zawn company masha ni hte chyauman buga Jinghpaw ramma ni lapran, ga li ga law byin wa ai manghkang ningpawt hpe gaw, hkrak n chye lu ai. Raitim, Hugawng buga masha ni gaw, Miwa amyusha U Htay Myint ningbaw ai Yangon-daju Yuzana company hku nna chyauman buga masha ni a yi, sun, hkauna hte prat ji nat hpun maling mala ni, la ba ai ga-up madu la lam hpe gaw, n ra sharawng nga ding yang re lam, Hugawng buga masha ni kawn chye lu ai. Lai wa sai 2006 ning hta, Myen hpyen asuya a matsun shadut, makawp maga ya ai npu, Yuzana company gaw Hugawng Pa a lamu ga eka sen 2 jan hpe Ledo lam, Namti kawn Danai lapran, madu la kau sai, rai nga ai. Company gaw, shi madu la ai lamu ga hta nga ai hpun maling mala ni mahkra hpe dan shakrin kau nhtawm, dai shara hta madung Nai Kadung hte Kum Shu sun galaw nna, nkau shara hta amu galaw masha hkyin kaba a dum nta ni gaw gap nga sai re. Bai, Yuzana company gaw Htai mung na gun rai shapraw jak rung kaba hte bung ai, jak rung lahkawng hpe mung, Htai jak rung gaw gap ninghkrin ni hpe shaga nna, Hugawng Pa e shachyaw nga sai, rai nga ai. Maga mi de, lawu Myen mung na Myen amyusha ni hpe sha alak mi lata la nna, Hugawng Pa, Yuzana company a amu galaw masha hku nna, hkying kaba lahka bang nga ai lam, chyauman buga masha ni kawn kahtap chye lu ai. Lai wa sai 2006 ning, Hugawng Pa de Yuzana company shang wa ai ten kawn company amu galaw masha ni gaw chyauman buga masha ni a nga, dum su ni hpe mung dingyang lagu sat sha nga ai majaw, buga masha ni myit ru jat wa ai lam, chye lu ai. Lai wa sai 2004 ning hta Amerikan daju Wildlife Conservation Society (WCS) gaw , Hugawng Pa hpe mungkan hta kaba dik “Sharaw Madat Gaiwang” hku masat tawn sai re. Raitim, Hugawng Pa hta Yuzana company a gun rai shapraw jak rung kaba 2 gaw gap masing hte Jinghpaw mungdaw hta kaba dik ja maw byin nga ai majaw, dai ginra na Sharaw hte kaga nam rai dut sat du myeng ni mat mat na tsang ra ai lam, buga masha ni hpe lakap let chye lu ai. KNG