Lai wa sai shata mi jan e Myen hpyen asuya a ginjaw Naypyitaw na Nhprang Dap npu mu gun masha langai gaw, Jinghpaw mungdaw, ja maw langai kaw jahtu lamu ga ningnan sa shadawn shakut ai shaloi, KIA hkam ai bawm hkrup nna, hkala hkrum mat sai lam, chye lu ai.
November praw 8 ya hta, asuya Nhprang Dap masha wa gaw, Myitkyina-Manmaw mawdaw lam lapran, Nam San Yang mare ja maw e, KIA a pat hkum ginra de ja htu shara maden na shakut ai shaloi, KIA ni hkam da ai bawm hkrup nna hkala hkrum mat ai re lam, ja maw shiga lawk kawn chye lu ai.
Myitkyina-Manmaw mawdaw lapran, KIO/A daju Laiza makau na Nam San Yang ja maw.
Ya bawm hkrup ai shara gaw, KIO/A daju Laiza de man yawng ai Nam San Hka hkyin gau makau rai nna, dai shara de n shang na matu, kahtawng masha ni hku nna Naypyitaw ja maw shadawn hpung hpe sadi jaw sai raitim, n hkapla ai majaw, ya na zawn bawm hkrup wa ai re lam, Nam San Yang buga masha ni hpe lakap let chye lu ai.
Myen Nhprang Dap masha wa hte rau, Waimaw mare na asuya lamu ga shadawn dap masha ni, pyada ni, Waimaw uphkang salang ni (Ma-Ya-Ka) hte Nam San Yang na lamu ga shadawn masat salang ni mung shanglawm ai lam, KNG sagawn chye lu ai.
Ndai mabyin a majaw, Myen hte KIO lapran, laklai nna hpa hpyen masa shaja hkat ai lam n nga ai hpe, Nam San Yang makau, KIO/A daju Laiza shiga lawk chye lu ai.
Raitim, laklai ai lam langai gaw, Naypyitaw ja maw shadawn masat jahkrat ai ni, Nam San Yang ja maw de nau wa n sa ganip gwi mat sai lam, ja maw shiga lawk kawn matut chye lu ai.
Lai wa sai April shata hta Myen gaw bawsang simsa lam hpung ni yawng hpe shi npu taw ai Jarit Sin Dap (Border Guard Force) gale na tara shang ndau shadut wa sai hpang, KIA gaw tinang hkum makawp maga na yaw shada let, ginjaw Laiza grup grup hta bawm ni hkam tawn ai re lam, KIA shiga lawk kawn chye lu ai.
Ya ten, Myen mung kata nga J.W laknak hpai rawt malan uhpung ni hta, KIO/A langai hkrai sha, Myen a Jarit Sin Dap hpe n hkap la ai sha, ningdang tawn dingyang re.
KNG
0 comments:
Post a Comment