Mali-N’Mai Zup e madim n galaw shi yang, ja shawng htu sai

Myen mung a dingdung daw, Jinghpaw mungdaw a Mali Hka hte N’Mai Hka mazup, Mali-N’Mai zup e myihprap wan jak shachyaw na matu hka madim kaba n galaw shi yang, de a majaw hka lim chye ai gaiwang ni hta, ya, ja htu hpang sai re. Ndai December praw 4 ya shani kaw na, ga htu jak mawdaw ni (bulldozer hte power shovel) hte kaga ja htu jak arung arai ni hking hkum hkra hte Mali Zup e ja htu hpang sai re lam, dai ginra na buga masha ni kawn chye lu ai. Ya ten, Mali Zup mare Tang Hpre makau e company kaba 7 ja htu nga sai hta, dai kaw hka madim masing mying hkam ya ai, Myen mung na Asia World Company hte Hukawng Pa na lamu ga eka sen 2 jan madu la ai, Yangon-daju Yuzana company yan mung lawm ai lam, dai company shiga lawk kawn chye lu ai. Ndai company ni gaw shanhte a amu galaw masha ni a dap ginsum nta ni hpe Mali Zup grup-yin kaw gap tawn nhtawm, ja htu ai bungli hpe shani shana, n hkring n sa galaw nga ai lam, Mali Zup shiga lawk kawn chye lu ai. Ndai zawn Mali-N'Mai Zup e ja htu nga sai. Bai nna, Miwa kung-ring (amu galaw masha) 2000 ram hpe mung, hka mazup makau nam kata e alak mi galaw tawn ai nta ginsum ni de shara jahkrat bang sai rai nna, shanhte gaw, ya ten, Asia World Company npu, hpun mailung shaw, ja htu, kaga mying n chye ai nhprang rai htu amu hte ga dawlawng hku htu ai bungli ni galaw nga ai lam, myi-chyaw sakse ni tsun wa ai. Ndai htingbu Miwa mung na kung-ring ni hpe Jinghpaw mungdaw a Miwa ga jarit chyinghka ni hku, hpung hte hpung hpe Mali Zup de n-sin ten mayun htaw bang tawn ai re lam, shanhte hte ni kahtep ai shiga lawk kawn chye lu ai. Myen de tinang uhpung shamat dap gale mat sai NDA-K ningbaw Zahkung Ting Ying hte Lasang Awng Wa Simsa Lam Hpung ningbaw Col. Lasang Awng Wa yan gaw, Mali Zup e ja htu na lam Myen hpyen asuya de shawk shawn sai maren, ahkang jaw ai lam, chye lu ai. Ningbaw Ting Ying hte Lasang Awng Wa yan a laika hta, ja grai rawng ai Mali Zup e hka madim a majaw ja ni majoi jasum kau na malai gaw, hka madim n galaw shi yang, ja shawng htu let lu ai shang gumhpraw hte shawa gaw sharawt bungli galaw mai ai lam, tang madun ai hpe KNG sagawn chye lu ai. Dai re majaw, ya ten, Mali-N’Mai Zup de ja htu mayu ai company ni gaw, Zahkung Ting Ying hte Lasang Awng Wa Simsa Lam Hpung mying ni hte asuya de shawk yang she, lawan ai hku ja htu ahkaw ahkang permit jahkrat ya na matu Myitkyina na hpyen asuya masha ni hpaji jaw nga ai lam, hpaga la ni kawn chye lu ai. Jinghpaw mungdaw mare daju Myitkyina a dingdung de deng 27 tsan ai Mali Zup e asuya a myihprap wan jak gawgap masing pat kau ya na matu, Mali Zup buga masha ni hte J.W amyusha yawng a malai Wunpawng Amyusha Mungbawng Rapdaw gaw lai sai 2007 hta hpyen asuya de tara shang laika tang madun sai re. Raitim, dai laika nta hpyen asuya a htang shana ai lam hpa n nga ai sha n ga, Mali Zup hte Jinghpaw mungdaw kata hka wan jak masing, jawm hkrang shapraw galaw sa wa na matu, Myen hte Miwa gaw lai wa sai June shata e hpyen asuya ningtau ningbaw Dukaba Maung Aye a Miwa mung hkrunlam hta, Beijing e myithkrum lakmat htu sai rai nga ai. KNG