KSPP rung lakying 10 jan, mungdaw shara shagu hpaw dat

Myen hpyen asuya a 2010 ralata poi shang na ninggam jat hkyeng lajang ai hku nna, Jinghpaw Mungdaw Rawtjat Pati (KSPP) gaw rung lakying 10 jan hpe Jinghpaw mungdaw shara shaga hta hpaw dat sai re. Ya pati rung hpaw tawn ngut sai mare ni gaw, Myitkyina, Manmaw, Manje, N'mawk, Danai, Waimaw, Mu Nyin, Mu Gawng, Chya Hpwi hte Putau ni re hta, pati ginjaw hpe Myitkyina kaw tawn nna, nambat lahkawng ginjaw hpe Manmaw kaw tawn na re lam, pati shiga lawk kawn chye lu ai. Lai wa sai November 18 ya hta sha, mungdaw daju Myitkyina mare, Myo Tit lawk e hkik hkam ai wut dek hte htap-lahkawng KSPP ginjaw rung ningnan hpe dingshawn shang, hpaw dat sai re. Bai, ndai ten grau nna, tinang pati hpung shang masha law wa hkra mung KSPP gaw, J.W ramma ni, dakkasu jawngma ni, hpaga la ni, htunghking salang ni hte mungmasha ni hpe n-gun dat zinlum nga ai lam, buga kata shiga lawk ni kawn chye lu ai. Pati hku nna mungdaw madu J.W amyusha ni hpe madung dat let 2010 ralata poi a matu zinlum lam hpe dai ning shaning ningnan ten kawn galaw hpang wa sai hta, ya ten grau grau n-gun dat galaw nga ai lam, KNG sagawn chye lu ai.. Ndai zawn buga ginra de sa du zinlum lam hpe pati ningbaw Dr. Manam Tu Ja nan woi awn ai re. Dr. Tu Ja gaw KIO a Tingnyang-up Malai II dingsa hte 2007 hta galaw ngut sai Myen hpyen asuya woi galaw ai, Mungbawng Zuphpawng (National Convention) de lung ai bawsang rawt malan hpung 17 a ningbaw mung re. Kachin State Progressive Party (KSPP) hpe KIO, WMR hte n nga mat sai NDA-K uhpung ni madi shadaw shanglawm ai Jinghpaw Mungdaw Pran Wan Komiti kawn dai ning shaning ningnan hta hpaw ninghtan dat ai, rai nga ai. Ndai pati gaw ya ten du hkra tara shang pati gaw n rai shi tim, lak lak lai lai pati a shamu shamawt lam hte mungmasha zinlum lam ni hpe galaw nga ai re. Ya na zawn lu galaw ai gaw, Myen a Kaichyan Dap (Tsa-Ya-Hpa) lithkam Lt-Gen Ye Myint hte Jinghpaw Mungdaw Dap-up (Ma-Pa-Hka taimu) Maj-Gen Soe Win yan a "n-gup aga" hku ahkaw ahkang jaw ai majaw re lam, pati salang ni tsun ai. Maga mi de mung, Jinghpaw mungdaw na hpyen asuya a USDA (Union Solidarity and Development Association) hpung ni mung, tinang hte seng ai mare buga ginra ni hta ladat amyu myu hte 2010 ralata poi a matu mungmasha zinlum nga ai lam, KNG sagawn chye lu ai. KNG