Ma-Pa-Hka taimu a hkrunlam majaw, Manmaw Manau shadung baw kau ra

Myen hpyen asuya a Dingdung Daw Daju dap-up Du Daju Soe Win a Manmaw de gawan hkawm ai hkrunlam a majaw, shi n du shi yang, Manmaw Jinghpaw htunghking Manau shadung hpe baw kaw ra sai re. Ndai bat mali ya, Dec. praw 10 ya hta, Dingdung Daw Daju (Ma-Pa-Hka) snr Jinghpaw mungdaw dap-up (Taimu) Dukaba Soe Win gaw mawdaw hte Myitkyina kawn Manmaw de gawan hkawm ai shaloi, dai jahpawt, Manau shadung hpe lawan ladan baw kau sai lam, Manmaw htunghking salang ni kawn chye lu ai. Htunghking salang ni tsun ai hta, dai jahpawt hkying 8 ram hta, Deng Lahkawng, Awng Ta Manau wang e Manmaw mare Hkalup hte Hkahtawlik nawku hpungwoi ni hte akyu kadun mi hpyi la ngut sai hpang hpun pyen hte galaw ai Manau shadung hpe htunghking salang ni bai baw kau ai re, nga ai. Ndai Manmaw Jinghpaw Laili Laika hte Htunghking Hpung (JLH) wang kata, Nov. 27 hte 28 ya hta, "2 lang na Manmaw Ginwang a N'lung N'nan Sha Sut Manau Poi" hpe ngut ai 12 ya na ai hpang hte Manau shadung jun tawn ai nhtoi 28 ya tup hpring ai ten, ya na zawn Manau shadung hpe bai baw kau ra sai re. Manau poi galaw ngut sai 12 ya na sai hpang, Myen hpyen asuya a matsun hte maren bai baw kau sai Manau Jinghpaw Manau Shadung. Myen a Manmaw Ginwang uphkang dap (Hka-Ya-Ka) ningbaw Col. Khin Maung Myint hte Manmaw Mare uphkang dap (Ma-Ya-Ka) ningbaw U Khin Maung Aye yan gaw, Myitkyina-Manmaw mawdaw lam makau nga ai Manau shadung hpe Taimu Soe Win wa gayin mu kau na tsang ai majaw, Manau shadung lawan baw kau na matu htunghking salang ni de hkyak hkyak matsun shadut wa ai re lam, htunghking salang ni tsun wa ai. Htunghking salang ni matut tsun ai hta mung, Manmaw Hka-Ya-Ka kawn lai wa sai Manau poi galaw na ahkang jaw ai shaloi mung, poi ngut ai hte Manau shadung hpe baw kau na matu, seng ang ai poi shabyin shatai komiti lithkam ni hpe atik anang ga sadi hkam la shangun sai re, nga ai. Kaja wa nga yang, ndai Manau poi hpe masum ya, Nov. 26 kawn 28 du hkra galaw hkyen lajang tawn ai raitim, asuya ni ahkang n jaw ai majaw lahkawng ya sha galaw ra mat ai lam, htunghking salang ni tsun ai. Manau poi n galaw shi ai, November 12 ya hta mung, Manau wang, nau ra pa hpe Manau nau pyaw hkra a matu nlung zaibru hte bilat ga ahpa rai nem hkyen nga ai kaw, Hka-Ya-Ka salang wa hte rau asuya ga htu jak (bulldozer) langai, Manau wang de shang wa nna, tsepkawp ganaw jahten kau ya sai, rai nga ai. Myen hpyen asuya gaw, Manmaw mare hta Manau poi galaw na ahkaw ahkang jaw ai raitim, hkik hkak ai hte ngang kang ai htunghking maka kumla ni (Manau htingnu hte Manau shadung ni) hpe gaw, ya ten du hkra, tsepkawp n galaw na hkum pat tawn ai re. KNG