Dakkasu JLH amumadu a adup hkrum lam, Myen ahkyak n la ya

Jinghpaw Mungdaw, Manmaw Dakkasu na Jinghpaw Laili Laika hte Htunghking Hpung (JLH) amumadu gaw, lai wa sai January 10, Jinghpaw Mungdaw Nhtoi, shana lamang sa lawm ai kaw, buga ten hkying 11 jan e Myen pyada ni a baw kayet baw hkrum tim, dai mabyin hpe ya du hkra ahkyak n la ya ai re.

“JLH wuhpung wuhpawng kaw na Manmaw JLH amumadu hpe Myen pyada langai abyen ai. Amumadu baw waw mat ai,” nga nna, JLH malawm langai Kachin News Group de shana wa ai.

Adup katut ai, JLH amumadu gaw, Lahtaw La Ja, Match hpang jahtum shaning gaw Manmaw Dakkasu e hpaji hka ja nga ai rai nna, maning 2009 kawn JLH amumadu magam lit gun hpai wa ai re lam hpe mung, shi a jawngma manang ni tsun ai.

Ndai zawn byin ai lam hpe, “Jinghpaw mungdaw pyada du kaw na tawngban ai hte sha shangut kau ya ai,” nga nna, shi matut tsun ai.

Madung byin mat wa ai manghkang gaw, poi sa ramma ni ga law hkat ai hte pyada ni shang je ai kaw, ramma ni pyada ni hpe htim htawng ai kawn hpang ai re nga, shi manang ni matut tsun ai.

“Shanhte (Pyada) ni hte htawng hkat ai ramma ni hpe n lu rim ai majaw, dai pyada ni gaw mu mamu masha yawng hpe adup hkawm ai kaw, La Ja hpe mung mara kata adup ai rai nga ai,” nga nna, La Ja a manang langai tsun ai.

JLH malawm dakkasu jawngma ni, shana poi lamang hkan shanglawm ai hku na, lam hkawm nga yang, pyada ni lagat shang wa na, ya na zawn adup kayet katut ai re lam, shi matut tsun ai.

“Ndai zawn (tawngban ai hte sha) shazim kau ya ai hpe shi mung (amumadu) myit n gut tim kaning n chye di ai hku re,” nga nna, JLH malawm langai tsun ai.

Shi hpe dai shana jang Manau wang na tsi gawk hta tsi tsi hkam la nga ai ten, Myitkyina na lit nga Myen pyada du langai, Manau Wang kata, Manau Shabyin Shatai Komiti rung de sa tawng ban ai lam sha galaw let shangut ai lam, JLH shiga lawk hku chye lu ai.

"Shanhte ndai zawn ahpa atang di nna, hpa ahkyak n la ya ai majaw, grai pawt mayu tim, ngai mung gara hku n chye di ai hku re," nga nna, La Ja gaw, tara rung de shawk mayu tim, shi mahtang grau jam jau na hpe myit lu ai majaw, myit n gut tim, hpa n lu galaw ai lam, KNG sagawn chye lu ai.

62 ning hpring Jinghpaw Mungdaw Nhtoi hpe lai wa sai January praw 5 kawn 11 du hkra, Myitkyina Shatapru Manau Wang e, htunghking Manau poi hte rau galaw la lu sai raitim, Myen asuya a lam amyu myu, ladat amyu myu hku nna, dingbai dingna jaw lai wa sai re.

Manau poi hte shani shagu na shamu shamawt ai mabyin ni hpe shi laika dip shapraw na ahkang hpe mung Myen asuya kawn pat hkum kau ya ai hte, January 8 ya hta she shawng n’nan lu dip shapraw dat ai, rai nga ai.

Manau shi laika hpe, Myen laika hku mung gayau gaya di nna, atik anang dip shapraw hkun ai zawn, shi laika hta lawm ai shiga ni hte, sumla ni hpe mung, Myen asuya kawn, azin ayang jep ngut ai hpang she, shapraw na ahkang jaw ai re.

Lamang sa lawm ai ni hpe mung, poi wang kata shang wa ai chyinghka lam kaw nan, laisin (license) n nga ai motorcycle ni hpe Myen balik ni kawn hkap rim jep ai lam ni galaw ai.

Ndai lang na Manau poi hta, Wunpawng Mungdan Shanglawt Hpung (KIO) hpyen la ni hpe, shawoi shaning na zawn, n mu lu ai sha, Myen hpyen la tsit ai hpe sha mu lu ai majaw mung, buga na ramma ni myit n pyaw ai hte pawt nga ai lam hpe mung, poi sa masha ni tsun ai re.

Jinghpaw Mungdaw Nhtoi hte Manau poi hpe, 1994 ning, Myen-KIO gap hkat jahkring ai hpang, galaw wa ai raitim, dai ning na lamang hta gaw, Myen a hkam sharing n lu na zawn rai hkra, dingbai dingna jaw wa ai rai nga ai.

KNG