KDA dap galai na, laknak kaba ap na, Myen matsun

Ndai shata praw kaw na Jinghpaw Makawp Maga Dap (KDA) hpe N’gawn hpyen hking galai na hte laknak kaba ni ap na matu, Myen hpyen asuya matsun nga sai lam, KDA shiga lawk hku chye lu ai.

Lai wa sai December hta sha, KDA ningbaw Mahtu Naw, machyi kaba hkrum ai (Mandalay e baw ga tsi lajang ai) kawn bai bran wa ai kade n na yang, ya na zawn KDA dap hkrang galai na lam, Myen matsun wa ai re.

Lahta Sam mung Kawnghka e daju ai KDA hpe Myen npu taw ai N’gawn hpyen (Pyi-tu-tsit) hpung kaji lahkawng hku, hkrang galai na lam hte, N’gawn hpyen gale sai majaw, laknak kaba ni n lang ra sai majaw, uhpung a laknak kaba ni ma hkra Myen hpyendap de ap jaw na matu, matsun hkrum ai re lam, KDA salang ni hpe lakap let chye lu ai.

KDA magam gun ni hku chye lu ai gaw, dai ni na htoi hta, KDA hpe N’gawn hpyen hking, dazik ni galai na matu hte laknak kaba ni yawng, Lashu-daju Ya-Ma-Hka (Sinpraw dingdung daw hpyendap daju) de ap jaw na, Myen hpyen asuya matsun tawn ai re, nga ai.

Shawng de KIA dap ba 4 rai nga ai KDA hta, kanu KIA hte Myen Mung Kummyunit Pati na lu da ai laknak kaba ni rai nga ai--- amyawk si 50 mm, 60 mm, 75 mm, 82 mm hte 120 mm ni law law lu tawn ai lam, KDA hte ni nawn ni tsun ai.

Ya na zawn, hpyen n-gun 1,500 ram na ai KDA hpe n-gun 100 ram re ai N’gawn hpyen gale na hte tinang a laknak kaba ni yawng Myen hpe ap jaw na lam ntsa, KDA sak ram ningbaw ni, hpyenma ni hte lahta Sam nga tinang J.W amyusha ni gaw, n ra sharawng ai lam, chyauman buga masha ni tsun ai.

Shawng e, N’gawn hpyen hta hpyen n-gun grau law shanglawm mai ai, Border Guard Force (Jarit Sin Dap) hku mahtang gale mayu ai lam, KDA kawn Myen hpe tang madun yu sai raitim, n hkap la ya ai lam, chye lu ai.

Hpa majaw nga yang, KDA a uphkang ginra hta Miwa ga jarit hte ni kahtep ai lamu ga ginra n nga ai majaw re lam, KDA shiga lawk hku chye lu ai.

Maga mi de, ya na zawn KDA hpe N’gawn hpyen gale na Myen matsun wa ai lam gaw, Kawnghka makau daju ai KIA dap ba 4 hpe mung masa, hpyen masa hte myit masa hku nna dip n-gun jaw ai lam re nga nna, hpyen masa mung masa yu maram ni KNG de tsun ai.

Myen gaw, Lahta Sam mung Loikang daju KIA dap ba 4 hpe N’gawn hpyen hpung hku gale na snr dap ting hpe KIA ginjaw nga ai Jinghpaw Mungdaw de atsai awai kalut la kau na matu, maning kawn dip n-gun jaw nga dingyang re.

Maning htum wa de sha, kanu KIO na ga garan hpung lahkawng gaw tinang dap jahten nna Myen npu de shang mat sai re.

Dai gaw, October shata hta Lawa Yang daju Lasang Awng Wa Simsa Lam Hpung gaw N’gawn hpyen hpung lahkawng hku gale nhtawm, Pangwah daju NDA-K gaw Jarit Sin Dap, dap dung masum hku, hkrang galai kau sai lam, rai nga ai.

KNG