Myen amyusha KIA training sara langai, sinat lahkawng hte hprawng mat

Myen amyusha KIA training sara langai gaw, training dabang kawn sinat lahkawng hte, ndai laman hprawng le mat sai lam, KIA shiga lawk tsun ai.

Mying hkrak n chye ai, agyi atsang (corporal) Myen amyusha KIA training sara wa gaw, Jinghpaw Mungdaw, KIO/A ginjaw Laiza makau Mung Seng Yang, Hpyen Shaman Shakyang Dabang kaba kawn, ndai January 20 ya shana, KIA shachyaw la ai jak sinat lahkawng hte rau, hprawng mat ai re lam, dabang shiga lawk kawn Kachin News Group de shana ai.

Ndai hpyen hpyen shakyang dabang shiga lawk hku matut chye lu ai hta, sinat lahkawng hte hprawng mat ai KIA training sara wa hpe Laiza shanglam chyinghka, Laja Yang mare e, hkap la nga ai Myen hpyenla ni, mayun woi shapraw la ai re, nga ai.

Ya ten, ndai hprawng mat ai hpyen training sara wa hpe seng ang ai KIA ni hkan tam sagawn nga sai raitim, shi hpe n mu rim ai lam, KIA shiga lawk hku chye lu ai.

Laiza na nkau dingdung ai ni KNG de tsun ai gaw, “Ya KIA shachyaw la ai sinat lahkawng hte hprawng mat ai Myen amyusha KIA training sara wa gaw, Myen hpyendap alak mi dat dat ai masha rai na re”, nga ai.

Wunpawng Mungdan Shanglawt Hpung/Hpyendap (KIO/A) gaw Myen a shi npu taw ai Border Guard Force (Jarit Sin Dap), hkrang galai shangun ai lam hpe, ya ten du hkra, n hkap la shi ai re.

Maga mi de, ya ten gaw, Myen hte KIA uhpung lahkawng lapran, kata lam e du wa na ten koi yen n mai byin wa chye ai dinghku majan a matu, hpyen masa lam madang sharawt hkyen lajang nga ai aten mung re.

KNG