UK-Miwa asuya hkringmang rung de, Mali Zup madim ninghkap laika bang dat

United Kingdom (UK) kaw du nga ai Jinghpaw amyusha ni gaw, Mali-N’Mai Zup e galaw nga ai hka madim masing jahkring kau ya na, “ninghkap laika” hpe, London e nga ai Miwa asuya Sumtsan Kasa Rung de, sa jaw dat sai lam, woi awn ai ni tsun wa ai.

Jinghpaw mungdaw mare daju Myitkyina a dingdung de deng 20 jan kaw galaw nga ai, computer hkrang shapraw madim.

Lai wa sai January 19 ya nhtoi masat hte Miwa hkringmang rung de sa dat ai laika ni hta, lai wa sai 2007 ning hta, Myen hpyen chyawm tari Than Shwe hpang de sa ai, Wunpawng Mungdan Shanglawt Hpung (KIO) a ningbaw kaba Lanyaw Zawng Hra laika hte, Jinghpaw Mungdaw sara shagu na buga myit su salang nkau ta masat jawm htu ai, Mali Zup madim ninghkap laika ni mung lawm ai lam, chye lu ai.

“Ndai hka madim gaw, anhte n ra sharawng ai ngu ai hta n ga, anhte jiwe jiwa ni kaw na lu da ai hkring htawng hpe shamat kau na masing re majaw, makawp maga ra ai,” nga nna, UK na J.W Amyusha Hpung (KNO) a ginrun amu madu Hkanhpa Tu, Kachin News Group de tsun ai.

“Shanhte Miwa ni a Great Wall hpe sa jahten ya yang, shanhte ra na n re, dai zawn sha, anhte mung n ra sharawng ai, grau nna, Great Wall zawn, anhte a hkring htawng ndai gaw, masha na lata hte galaw da ai n re,” nga nna, Slg. Hkanhpa Tu matut tsun ai.

Ninghkap laika pa hta, hka madim a majaw byin wa na manghkang ni rai nga ai, masha 15,000 daram, atik anang shara htawt sit ra na lam ni, masha wan lam hka hpyen hkrum wa mai ai lam ni, hka madim a majaw, hkai lu hkai sha, yi sun hkau na ni hten mat na hte, kaga mayak manghkang law law hpe tang madun da ai hpe mu lu ai.

“Ndai masing a majaw, anhte a labau shang shara, nam maling kaba ni mat mat na, mayak manghkang law law, pru wa na, dai majaw, yawng shanglawm ninghkap ra sai,” nga nna, J.W Bawngring Mahkri Shawn Hpung (KDNG) a ningbaw Slg. Awng Wa tsun ai.

Shi bai tsun ai hta, ya ten Asia World Company hte Miwa a China Power Investment Cooperation (CPI) ni woi awn ai hte hka madim gawgap ai lam ni, hpang nga sai rai nna, Miwa bungli galaw masha mun kaba shang wa na re, nga ai.

“Ya gaw, Miwa bungli galaw masha tsa lam gaw, shang magang sai,” nga nna, Awng Wa tsun ai.

Shi tsun ai gaw, Miwa ni a majaw, Jinghpaw amyu shayi ni a matu shimlam tsang wa ra na re lam, bai, Miwa ni gumhpraw lu ai majaw, gumhpraw hte hkalem nna, masu , jahten wa na lam ni hpe mung tsang ra nga ai nga nna, matut tsun ai.

Mungkan shara shagu kaw du nga ai, Jinghpaw amyusha KNO malawm ni mung, du na ra ai, February 5 ya hta 49 lang na KIA Rawt Malan Nhtoi masat masa galaw ai lam hta, Mali Zup hka madim masing ninghkap ai lam hpe, Myen asuya hkringmang rung shawng kaw, galaw na hkyen nga ai hpe KNO salang ni hku chye lu ai.

“UK, Japan, Australia mungdan ni kaw, galaw na matu dawdan ngut sai, raitim, India, Thai, Malaysia, Sweden, America ni kaw gaw, Rawt Malan masat Nhtoi galaw tim, ninghkap n-gun madun ai lam galaw n gaw hpe rai n chye shi ai,” nga nna, KNO ginrun amumadu tsun ai.

KNG