Chance Favors The Prepared Mind
N dai ga hpe tsun ai wa gaw Franch myusha hpaji ning hkring Louise Pasteur ngu ai wa re. Shi a labau gaw myit lawm na zawn re ai. Pasteur gaw U loi, dumsu ni hta byin chye ai, kalang byin yang U loi dumsu ni mun lam shadang nna si chye ai shan gum din hpye ana mai tsi hpe hpan hpajang shapraw dat ya lu ai chye ju madu langai rai nga ai. Pasteur gaw U Loi dumsu tsi hpe hpajang shapraw dat ai sha n’ga gwi mana ana mai tsi hpe du hkra tam sawk lu wa ai wa re. Gwi mana ana hpe tsi ya na matu mungkan mungdan law law hta tsi rung law law hpe mung gaw gap wa ya ai wa re. Yangon kaw mung dai zawn tsi rung ni nga lai wa sai lam chye lu ai. Dai gwi mana ana mai tsi mu tam wa hkra shakut shaja wa ai hta shi a bawnu chyen mi si mat ai du hkra pu ba hkam wa ai wa re. Raitim shi a magam hpe n jahkring ai sha marai dat atsam jat nna machyi tsin yam hkrum nga ning len shakut shaja htuk shapraw wa ai wa rai nga ai. Pasteur gaw ma kaji langai hta byin ai gwi mana gawa ana hpe tsi na matu shata 3 jan n hkring nsa bungli galaw wa ai.
Kalang mi gwi mana langai mi a n gup kaw pyun shachyawp la nna hkum bai hpe shaw shapraw chyam ding lik ai du hkra atsam dat sawk tam lai wa ai. Grai nan lak lai ai masha re, lahta na shi tsun ai ga lashum “Chance Favors The Prepared Mind” nga ai hpe htuk manu ai hku tsun ga nga yang ahkaw ahkang ngu ai gaw myit masin shajin lajang da ai ni hpe shara jaw nga ai ngu tsun lu nga ai. Hpaji ning hkring Pasteur a lashum ga baw hpe shamyet nna anthe kasi la mai ai gaw anhte a prat hpe shakut shaja sa ai shaloi chye chyang ra ai hpaji, machye machyang hpaji ni lu la da hkra ahkaw ahkang lu ai shagu tam sum hting da ra nga ai. Hpa mi rai rai ra ang wa ai shaloi tinang galaw lu ai ahkaw ahkang pru wa ai ten hta bungli lu mai ai hte prat a matu myit simsa lu nga ai re.
Ngai a prat hta myit dum nga ai lam langai hpe tsun dan mayu ai moi ngai tsang 10 htai da na nga ai ten lani mi hta hkauna kaw Wa ngai hpe bosarpe shapre hkai shangun ai shaloi ngai tsun ai “Shapre n dai ni gaw ya an wa ni grai hkai shakut da tim si si wa ai shaloi gaw htaw sam ni joi mi lap 5,6 hte dut ai hpe mari sha pyi n dang ai, aten lahpawt, apyaw rai nga kau na malai hkai shangun ai” ngu tsun ai shaloi wa ngai hpe tsun ai gaw “Nang tsun ai ten ai, raitim nang a prat shawng lam hta ganing re masa lam kaw hkawm ang ra na n chye tsun ai, an n nu yan n wa chye ai hpaji sut gan yawng hpe sharin da ya ai re, tinang grau sharawng ai magam bungli hpe galaw lu nga ai ten hta rai tim n dai bungli ni gaw ngai galaw ga ai, chye galaw ai ngu ai madang hta tawn da ra ai” nga ai. Ga n dai gaw wa a sharin shaga wa ai manu dan dik ai ga re ngu hkap la lu n ngai.
Tinang kaw shajin da ai rai yang she ra ang wa ai shaloi akyu jashawn lu ai, jai lang lu ai masha ni tai lu nga ai. Ga shadawn tsun ga tinang gaw computer hpaji hpe n hkaja da ai, bungli shaga ai kaw gaw computer hpaji chye ra ai ngu saga. dai bungli lu na myit mada shara n nga ai. Ya daini na aten Maigan ga shaga chye hkra, mai gan mungdan de jawng lung lu hkra nga nna shajin lajang ya nga ai tindan ni, dinghku hte kan bau magam bungli shakut shaja galaw sha nga ai ni a matu prat dep ladat hpaji hte sharin ya ai rem lu rem sha lam, hkai lu hkai sha lam tindan wunkat ni law law wa nga nga ai. Dai ni hpe chye da, aung lakmat ni lu da rai yang she ahkaw ahkang hpe lu la nga ai. Kaga masha ni hta lai jan kung kyang ai hpaji madu lu yang she lai jan ai bungli ni lu la mai ai re. Machye machyang hpaji ngu ai asak kaji kaba n nga yawng hta hkaja sharin la chye yang she lu la ai re, mungdan lam, makam masham lam, shinggyim nga pra bawng ring sut su lam, shinggyim matut mahkai lam, hkamja nga pyaw lam yawng gaw n nga n mai ahkyak ai hpaji lam ni re.
Dai majaw masha shagu hta ram ging ai chye ging ai daram hpe hkaja la (shr) shajin da ra nga ai. N shajin da ai masha a matu ahkaw hkang hpe tek jum nlu ai majaw tat kau ra na rai nga ai.
Aten naw nga ai, gangwi ram ai ngu ai ga tsun chye ai masha ni a matu shajin da lu na aten hte tsang gang nga na re. Ahkaw hkang mung lai mat wa na re. Ahkaw ahkang ngu ai gaw chying hka akawk nga yang hpaw ya hkap la ra ai. Lahkawng, masum lang nsa chye ai. Dai ni galaw lu ai hpe hpawt ni hkum htawt ngu ai sharin ga hpe hkan shatup ai rai yang grai kaja nga ai. Galu kaba mayu ai law nga nna, n gup kaw tsun taw, magam gaw nlawm, bungli hpe rai yang shani htawt shana htawt rai nga ai masha ni a matu galu kaba na n mai byin nga ai. Mungkan hta kaman li la lu la ai ngu ai n nga ai daram re. Dai zawn lu la nga ai ma raitim jahkring sha rai na re. Shajin da ai, shakut shaja ai lam sha galoi shagu awng dang lam lu ai re majaw tinang maga de na shajin sharin da ga! Ahkaw ahkang kaja ni lu wa na re, ang katut hkrum wa ai ahkaw ahkang hta shajin da ai masha gaw akyu hkam sha na teng sha rai nga ai law.
Myit Tsawm Pan (Manmaw)
0 comments:
Post a Comment