Maden seng ai ninghtoi kaja,
Chyurum sha ni hkrum zup du sa;
Myit hkrum lam hta n di n hka,
Kraw wang kata n ja n hpra;
Buga mungdan hte mung grai tsan,
Hpawng de ai gaw myu sha lam yan;
Jinghpaw Mungdaw Masat Nhtoi,
Padang Manau hkik hkam ai poi;
Bai du ra ai hkap tau hkalum,
Myit hkrum myit ra shada ginshum ga le i . . !
Shaning shagu ladu bai hkrum,
Daining na lang Kru Shi Masum;
Masat Ninghtoi Jinghpaw Mungdaw,
Padang Manau ndai Poi gaw;
Myitkyina Majoi Uma buga,
Shatapru Naura rudi tawn da;
Chyurum sha ni shareng shagrau,
Gumshem wa gaw jak lak chyinglau;
Chyurum sha ni salat she grit,
Gumshem wa gaw dukrung e htit, rai sai da yaw. . .!
Daini anhte sumtsaw sumtsan,
Tsasam buga maigan mungdan;
Sa du nga ai mabyin law law,
Labau hkrunlam sumru shachyaw;
Buga de mung nhtang myit dum,
Myu sha lam hta shada myit hkrum;
Myu sha ni a shadip jahpang,
Gumshem wa gaw sai chyup dingyang;
Chyurum sha ni sharung shayawt,
Gumshem wa gaw kabu manawt . . . rai taw nga sai . . !
Jiwa ni nan du daw sai hkaw,
Myu mungdan hpe du baw sak jaw;
N-gun mung dat salat mung hkrat,
Lu tawn da sai buga hkringdat;
Hkum tsup ngwipyaw Jinghpaw Mungdaw,
Hkrat sum nga sai daini chyawm gaw;
Maroi n ni masin n si,
Mau taw nga yang kaning n di;
Moi na labau bai naw sagawn,
Machyang n-gun bai naw gumhpawn yu saga . . !
Asha sinpraw bum tsaw mayan,
Saphkung-Hpunggawn hka nu lapran;
Dailup daihpang myu sha zaw nawng,
Shingteng amying Jinghpaw Wunpawng;
Chyaloi prat hta Majoi Shingra,
Daini chyawm gaw mungkan hproi hkra;
Ginru lalam ginsa lahkam,
Chyam bra hkawm ai ta tut magam;
Mabyin gindai dinglik yu mai,
Jiwoi hkringhtawng makawp ra sai . . !
Moi na prat hta ningdi kau da,
Mali Hku Majoi hka deng buga;
Chyai Hku Majoi de mung bai nawt,
Hkrang Hku Majoi de mung bai htawt;
Tarung, Tawang, Tabyi, Tanai,
Saphkung, Mungmau, Tahkaw, Munglai,
Tayun, Talau, Mali, Hkrang, Hpungmai;
Nawnglut, Mungnyang, Uru, Htingnai;
Bum tsaw shagawng dam pa layang,
Jiwoi hkringhtawng shadip jahpang, rai nga sai law. . .
Mayu dama hpunau masa,
Dikru hkrum rai makawp maga;
Ntsin hka hpawk langai jawm lu,
Num jaw num ya shada jawm hku;
Mayam tai yu labau n nga,
Hkanse jaw ai maumwi n kra;
Tinang magam wa la htanbam,
Lai sai ten na labau ginlam,
Buga ninghtawn tam bram jahproi,
Ndai ten hta Myitkyina Majoi, rai nga mali ai. . .
Tsa ban ‘Shi Jahku’ htum wa mahka,
Jiwoi Mungdan dingda htumpa;
Chyau Myen la ni makawp n ngang,
British hpyen hpe ninghkap n dang;
Jarit nhpan ashep malawng,
Dip sha hkrum sai Jinghpaw Wunpawng;
Daini du hkra kyang dai n mat,
Sai chyup hkat ai lailen n tat;
Chyurum sha ni matsan chyaren,
Tsasam ni she up sha ginlen, nga masai . . .
Magrau grang ai Jinghpaw Wunpawng,
Share shagan kajai gumhkawng;
Yawng a ntsa sadi grai dung,
Gasat gala shagri grai kung;
Madat mara bungli kangka,
Ang ai lit hta mangan mung nga;
Manawn masham myit nan n rawng,
Dingman hpraw san Jinghpaw Wunpawng;
Hkawhkam wa a magam gunhpai,
Mungkan a man kasi tai sai . . .
“Hkun” lang ngu na tsa ban ladaw,
Mungdan shagu manghkang sumbaw;
Hkawseng mungdan jan pyi n shang,
British ni hkrai mazang n dang;
Jamani la ni majan shabyin,
British ni a shoihpa gumdin;
Jinghpaw la ni rawt htim adawt,
Masawp Amya mungdan de hprawt;
Masat Langai Mungkan Majan,
Jinghpaw ni she mahtai dawdan, lai wa sai. . .
“Hkun” lang ngu na tsa ban ka-ang,
Myu baw shagu lawhpa manghkang;
Mungdan shada tawt lai jehpre
Grit nem matsan ni hpe wahkye;
Majan baw ai Nazi Jamani,
Hka hkrat manang gumshem Itali;
Sinpraw maga Japan gasu,
Tawt lai zingri grupyin htingbu;
Lahkawng lang ngu na Mungkan Majan,
Gara hku she mahtai dawdan sana ta?
British up ai Myen mung dinghku,
Hpunau Myen ni Japan kinyu;
British ni gaw sum let htingnut,
Jinghpaw ni sha dating shakut;
Asha chyam ai Japan atsam,
Asum n jaw Jinghpaw dappram;
Ninghkap majan Jinghpaw adawt,
Kachin Levies Japan hpe gawt;
101 hte Kachin Ranger,
Japan kaw na padang dip la saga ai re . . .
Majan ngut boi Japan yawng hkoi,
Mungdan shanglawt jawm hpyi asoi;
Jinghpaw shagawng jiwoi hkringhtawng,
Masum brang rai ahkyep kamawng;
Sinpraw maga Miwa ni ret,
Sinna maga Kala ni kyet;
Ka-ang shagawng buga malawng,
Magyi Ka a maiwang de hpyawng;
Myit hkrum ga sadi Panglung mare,
Munghpawm Mungdan jawm gaw jawm de saga ai . . .
Munghpawm Mungdan chyalung chyangai,
Jinghpaw Mungdaw daidaw jat ai;
Munghpawm Mungdan January Mali,
Jinghpaw Mungdaw January Shi;
Hkying Mi Jahku Tsa Mali Shi Matsat Ning,
Daini ten hta “Kru Shi Masum” hpring;
Jiwoi mungdan masum brang tim,
Mungdaw lu jang myit pyaw myit sim;
Hpunau Myen hte lata gindun,
Kamhpa dik let arau ginrun saga ai re. . .
Jinghpaw ni gaw hparat hkalung,
Hpunau Myen ni sadi n dung;
Jinghpaw ni gaw dingman hpraw san,
Hpunau Myen ni nam rawng malan;
Munghpawm Mungdan zang bai ayai,
Jinghpaw ni nan n hkye n mai;
Hpyenla dingsa yawng bai shaga,
Jinghpaw Dapdung manga hpaw la;
Munghpawm Mungdan tat sum n mai,
Jinghpaw Dap ni hkye la tawn sai . . .
Mungdan ting gaw majan nhpan,
Jinghpaw ni gaw shawng si gwi ran;
Bum nga ni hpe angawk shadu,
Munghpawm Mungdan dinghku hkanu;
Panglung myit hkrum lam hpe n hkan,
Bum nga ni yawng angawk jahpan;
Munghpawm tingnyang kashun magra,
Gumshem lailen dip up shaja;
Bum nga ni yawng maroi n ni,
Rawt malan wa sai nang si ngai si. . .
Manu dan ai Jinghpaw Mungdaw,
Maisak mailung hpunsau gumhpraw;
Nam nga dusat majoi kamawng,
Hka na nga ni majoi kabrawng;
Ja hte lungseng sut rai nlang,
Jinghpaw Mung a arawng ningsang;
Chyeju hpring ai anhte buga,
Maigan wa she sa numdu da;
Sutgan yawng mung shaw la ya sai,
Anhte yawng mung mayam naw tai . . .
Mungchying shawa matsan tsinyam,
Hkru kat ai gaw tai hpyen magam;
Mungkan hpaji anhte dumhprut,
Sak hkrung na pyi atsam she tsut;
Chyurum sha ni lasi lamun,
Tai hpyen wa gaw hpum sau ahtun;
Jinghpaw Wunpawng ramma wunawng,
Lagaw ndung maigan de yawng;
Ngam nga taw ai matsan jahkrai,
Gaida gaina n tai n mai . . .
Kau mi rai jang tinggyeng machyu,
Tai hpyen wa kaw myi man hkoi lu;
Sake manawn mayun kumhpa,
Tai hpyen wa a lagaw lata;
Tinang myu hpe kabai shadam,
Banau ni a dangkang manam;
Ramma kau mi kaning n rai,
Nanghpam lusha ahkyen makai;
Shayi num ni hkumshan bai dut,
Hkrit hpa ana myu ting kaw rut, rai mat sai. . .
Jiwoi hkringhtawng Uma buga,
Sut rai mahkra atsai shaw la;
Uru sengmaw sutgan punghkaw,
Banau ni she hkinjawng ningbaw;
Mali yan Hpungmai mazup jahten,
Tanghpre bu ni myit htum garen;
Hugawng lam de kayin mada,
Dip up sai chyup myit yu kahpra;
Yi sun hkauna zing la ya ai,
Maling mala yawng krin ma sai. . .
Jinghpaw Mungdaw ladu bai hkrum,
Shaning sak prat “Kru Shi Masum”
Shadip jahpang ahkang kanang?
Mau nga n mai n dut n dang;
Tsasam wa gaw madu galai,
Madu ni gaw mayam hkan tai;
Hkrap myiprwi hte wa pu jawm shup,
Maigan wa a dangkang jawm pup;
Jiwoi hkringhtawng tat kau n mai,
Anhte yawng a lit nan rai sai. . .
Jinghpaw Mungdaw ladu hkrum ai,
Padang Manau ya bai dum sai;
Nampum nsa hkanghkyi shamawng,
Shinggyim Jinghpaw na ra sharawng;
Mungdaw manau ngu she jawm awng,
Hkanghkyi dusat kashun hkinjawng;
Mungkan ting na Jinghpaw Wunpawng,
Dum hprang saga myu sha zaw nawng;
Jiwoi hkringhtawng jawm pawn jawm ba,
Jinghpaw Mungdaw grin nga u ga law. . .
Sumtsan Brang
Kuala Lumpur, Malaysia
0 comments:
Post a Comment