Dai ni na ten hta, anhte Ramma ni a lapran Laika hti ai lam grai nan n gun yawm wa nga sai.
Computer seng hkan Game sa gasup na a ten shama ai, Internet chye lang sai ni mung shada chye hkat mu hkat ai lam n nga ai online na masha ni hte computer n tsa kawn shada tsun shaga, mani ha ha rai aten shama nga ai. Laika sha hti ai rai yang mung Gawdin shiga ni hpe sha kam hti ma ai, Num kasha ma ni rai yang mung shan hte a salum hpe gahpra shangun ai sumrai laika ni hpe sha sharawng shara rai tam hti nga ai hpe mu lu ai. Bai nna, sumla law law hte laika n law ai sha dip shabra gumhpraw tam sha nga ai Magazine ni hpe sha madung da tam hti ma ai.
Dai ni na ten hta laika bauk manu ni mung hkan n dep hkra manu rawt mat ma sai. Hti mayu ai laika mu tim mari na matu yak hkak mat saga ai. Laika hti gawk ngu galaw da ai ni mung “ Sign Board” Mying sha nga mat ma sai. Kaja wa hpaji lamai ai, akyu jaw ai laika buk ni gaw tam pi n mu ai tsang de du mat wa nga sai.
Ma kaji hte Ramma ni a matu hti hpa laika buk ni dai ni na ten hta n nga ai prat de du wa nga sai. “ Mau Mwi”, “Cartoon”, hte Gumhpraw hpe sha yu na galaw ai “Magazine” ni gaw mi na raw sha shi a lam kaw matut shara la hkawm sa taw nga ai ma ai.
Maisau manu rawt wa ai hta hkan nna, Laili Laika Kaja ni mung yawm mat wa ai lam gaw Laili Laika hte Laika hti mayu ai wa a lapran hta madin kaba tai wa nga sai. N dai zawn re lam ni hpe aten ladaw na na wa malap mali rai tawn da yang , du wa na ten lawdaw ni hta anhte a mungdan a matu hkrat sum lam kaba rai wa na re.
Anhte a Ramma Kashu Kasha ni, Laili Laika hpe sharawng wa na lam hta mung Laika hti ai akyang hpe tinang a myit lawm hpa, galoi mung galaw ra ai magam bungli langai hku byin hkra galaw shaman la ra nga ai. Laili Laika Kaja ngu ai gaw, ya hti ya ra re baw mung n rai nga ai.
1, Ramma ni Laili Laika hpe SHARAWNG SHARA chye hti wa hkra galaw shaman ya ra ai,
2, Ramma ni Laili Laika hpe CHYE HTI hkra lam matsun madun ya ra ai,
Ramma ni Laili Laika hpe SHARAWNG SHARA hti mayu wa na matu, shan hte myit lawm ai lam ni hpe chyena hkawn hkrang hkra ka da ai Laika ni law law wa htuk shale ya, ka ya ra ai. Ramma ni laika law law hti wa na matu, Laili Laika ni hpe a loi a li hte mai lu hkra galaw ya ra ai. Ramma Laika hti u hpu n hpawng ni, mahkrum madup garan gachyan ai lamang ni, hkaw tsun hpawng ni hpe a ten shagu galaw ya ra ai.
Laika hti ai ngu hta mung tsang (3) nga nga ai;
1, Laika ka ai wa a hpang hkan hti ai,
2, Laika ka ai wa hte maren hti ai,
3, Laika ka ai wa hta jan na hti ai,
Dai ni na ten na laika hti ai masha law malawng gaw Laika Ka ai wa a hpang kaw hkan hti ai madang hta sha law nga ai. Tinang hti ai laika hte seng nna myit sumru yu ai lam n nga ai, Laika ka sara wa ka da ai hpe sha hkan hti taw ai madang kaw rai taw nga ai. Laika ka ai hta hta jan na mu mada ai lam n nga ai. Tinang hti ai laika hte seng nna myit sumru na i? si hkam na i? ngu yang si hkam na msha she malawng na re hpe kam ai.
Ramma ni shanhte hti ai Laika a lachyum hpe chye myit chye surmu hkra ladat jaw jaw hkan sharai ya ra nga ga ai. Laili Laika kaja ni hpe chye hti hkra tsang hte tsang rai lam madun garum ya ra ai. Laili Laika kaw na lu la ai ningmu, mahkrum madup, sawn yu hpa ni hpe tinang nan a prat hte shingdaw nna, chye na, chye mu lu hkra lam madun ya ra nga ga ai.
N dai lam ni gaw tsun yang sha loi ai rai tim, kaja wa hkan sa galaw na gaw yak la nga ai. Hpa majaw nga yang, Ja Gumhpraw, machye machyang hte sha n ga, a hkying a ten law law wa mung a rang jaw bang ya ra nga ga ai. Kaja wa n dai lam ni hpe sumru yu ga nga yang anhte a Kashu Kasha Ramma ni a shawng lam a matu myit tsang hpa kaba rai wa nga ai.
Tim dai ni na ten hta, n gun lu hpa langai mi gaw, maigan mungdan kaba ni de du nga ai Ramma ni hte Kanu Kawa ni kawn Internet hta Website ni, Blog ni law law hpe Jinghpaw hku ka wa nga sai hpe mu mada lu ai. N dai Website ni, Blog ni hta machye machyang lu hpa, hpaji la hpa ni law law hpe mu tam hti lu nga saga ai, aten n tam mai hti, mai hkaja la lu nga sai.
1, Ramma ni hpe Laika hti mayu ai myit rawng wa hkra shaman ya ra ai
2, Ramma ni hpe Laika chye hti hkra lam adun ya ra ai
Ramma ni hpte Laika hti mayu ai myit rawng wa hkra shaman ya ai lam hta mayak mahkak n nga ai rai tim, Laika chye hti hkra lam madun la na gaw lit grai kaba la nga ai.
Laika ka ai wa (Website, Blog hkan) hku nna anhte a Ramma ni, ningmu n shut, myit mang n shut hkra ka mara na mung lit kaba langai mi rai nga ai. Tinang ka mara dat ai Laika a majaw laika hti mahkrum madup n nga shi ai Ramma ni a matu gung ( lam n shut) n byin shangun hkra sadi nna ka mara na grai a hkyak la nga ai.
Dai re majaw anhte Ramma ni Laili Laika hpe shawng wa, chye hti wa na matu laika ka ai wa mung Ramma ni a matu a kyu rawng, a kyu jaw ai Laika ni hpe ka na a hkyak la nga ga ai.
Laika ka ai ngu ai a madung yaw shada lam gaw shada garan gachyan ai lam rai nga ai. Kaja ai lam hpe garan gachyan ai rai yang sha, tinang ka ai wa hta mung a kyu nga ai zawn, hti ai ni hta mung a kyu hkam sha na rai nga ga ai. Anhte a Ramma ni hpe Laika hti shangun mayu ai tsawra myit hpa madung da let laika ni hpe ka ga ngu……
Mut Tsawm
16/2/2011
0 comments:
Post a Comment