Slideshow Image 2

HPA RAI?

Hpan Madu gaw masha langai mi shangai pra sa wa ai hkying ten shani kaw nna masha langai mi a lu gin ai duhkra ten ladaw hpe masat tawn ya chyalu re hte anhte shing gyim masha ni gaw Nu a hkritung kata kaw na shangai shaprat dat ai hte rau, lup sung hku de hkawm sa ai hkrun lam galu hpe katsi kahtet, ngwi ai yak ai, yawng hpe hkam nna shani shana nsin nhtoi, matut hkawm sa na ni hkrai rai ga ai zawn anhte galaw nga ai magam bungli yawng mung lup sung hku de du ai shani du hkra galaw ra nga ga ai gaw hpan Madu jaw ai manu dan dik ai ten hte asak janmau gaw lup sung hku du ai shani htum sai ngut sai re. HPA RAI? Hpa rai na a hpu dik ai lup sung hku hkrun lam hte labau jaw ai myu sha lit hpe n'kam lit la gwi nga n'ta? Karai jaw ai, Nu shangai ai Jinghpaw Wunpawng myu tai lu ai, hpu dik ai labau jaw ai ten hpe lai mu n'mai ai zawn shalai kau nga nta? Chyinghkai nu e ngai zawn re kasha hpe kalang bai naw shangai ya rit, ngu yang mai na kun? Hpa rai nmai byin ai masa hpe mara tam nga nta? Lu nga ai du nga ai ten gaw annau ni a matu kaja dik ai ten du nga sai.

Hpa rai ndai ram manu dan dik ai ten du nga nna hpang lam bai nhtang ai zawn jahtawng nhtu ai ni hte n'gup sha n'mai ganawn sai n'mai pawng sai nga tsun nna, ta tut hte hkum hkrang gaw mawng katut ai zawn shingnyi tsi katut ai zawn, hpyi katut ai zawn, shapawt katut ai zawn, nampum katut ai zawn myen a kahtawk tsi hkrum ai zawn byin nga ai nta? Lai sai ten hta mung law law lang sang lang ka lai wa sai, rai yang hpa rai? Hpa rai ta?

Lai sai Poi kaba ngu ai gabaw hta mung sanglang lai wa sai, u la kaba masum shing jawng ai hta gumra hpawmi ngu myen a rapdaw, asuya, hpyen dap, NLD, nga shanhte kata masin nsi salu salat hte nsim nsa ten hpe manu shadan nna shing jawng nga ma ai. Dai zawn myen a kata hta nru nra n'gun hkyim hkat ai gaw lani hte lani grau she sawng wa nga ai, dai ni dai myen asuya a shingdu hta 80% shadang rapdaw Slg rai nga ai [chyan-hput] DBPS paty hpe bai maram yu ga nga yang, hpyen hpyi galai tawn ai hpyen du ni malawng rai nga ai majaw hpyen myit jasat n mat ni ningngai galaw sha nga ai, paty hpe maran yu dat yang hpan masum rai nga ai hpe mu lu ai, dai Slg ni hta:

a- Dung lahkum shamat ai hpung,
Mugun bungli lamang grat n nga ai ni, dung lahkum n'ngang ai ni, dung lahkum shamawt hkrum ai ni, hpa zawn zawn le ra zawn re ni.
b-Myi man hpe yu gumhpraw hpe mu ai hpung,
Gumhpraw myiman sha madung tawn ai ni, bungli grat dagra n'galaw ai ni, myi man yu nna bungli galaw ai ni, maidang masawp ai ni wa lang gale ai ni,mayun kum hpa sha ai ni. Dai ni gaw paty a amu madu yan rai nga ai, U Aung Taung, U Hte Oo, Slg nkau mi hte ginwang slg law law rai nga ai. Ahkaw ahkang hpe lai hkra lang ai ni, lamu ga ntara zing madu la ai ni. Tara hkungga ai lam n'nga ai ni. Masha hpe yu nna bungli galaw ai ni.
c-Hpyen Dap,
Hpyen myit jasat n'mat ai ni, dip gamyet sharim up hkang sha mayu ai ni, hpyen dap hpe sha madung tawn ai ni. Daru ahkaw ahkang gare lang mayu ai ni, ahkaw ahkang arawng aya hte bungli galaw ai ni, Tara hkungga ai lam arawng aya hta madung ai ni. Tara tawt lai n'hkrit ai ni. Dai ni gaw shwe man-Tin Aung Myint, Tin Oo hte rapdaw kaw dung ai hpyen du kaba ni law law nga ai hte Gumsam magam a lahkum shamawt chyam nga ai ni re.
d-Bawsang Paty hte dinghkrai paty,
Rapdaw kaw du nga ai bawsang paty hte kaga paty ni dinghkai rapdaw slg nkau mi gaw makoi a majaw, poi yu masha zawn zawn mung masha ni gawng malai zawn zawn, lemawt wawmawt lam nmu ai, bungli madung nlu ai, shabrai jahkut sha tawn nga ai.

Ndai zawn rai rapdaw kata kaw shada da langai hte langai a ga kawng ndum ai madat mara hkungga hkat ai lam n'nga ai asuya gaw mang hkang kaba byin wa sai, shada da bungli gashun galaw nga ai rapdaw gaw galoi du grin na ta? Dai hta n'ga kadai mi hpa nga nga hpa tsun tsun, magwi na tingse dum bang ai zawn byin nga ai hpyen gaw gasat ding yang, zingri ding yang rai nga ai majaw asuya gaw mungkan hta gaya kahpa hkrum nga ai zawn asuya ndau ai hpe kadai nkam ai. Kata kaw shada da darin hkat ai, chyam hkat ai gaw ya shinggan du bra wa ai majaw shada da shara gashun hkat ai, masha gashun hkat ai, madat mara ai lam n'nga ai, dumbru dumbra, nangshoi nangsha byin nga ai, li baw lai jang limai gara kaw dawt dawt nga lachyum pru nga sai.

Hpyen dap kata e mung lekap wawkap rai da shatawt sha nga ai law wa ai, tinang a rudi ngang na matu hkinjang tam nga ai ni she law wa sai. NLD de zawn DBPS de zawn pru mat mayu ai ni she law malawng rai nga sai. Hpyen dap kata e mung ntsa na ni arawng aya kashun mayu ai ni, myi man hta bungli galaw sha ai she law nga sai majaw myen asuya gaw hpung kraw she rai wa nga sai kaw annau ni hpa rai matut nsa na ta? Sa gaw sa na re tim masa dang nga ai kun? Hpa rai manu dan dik ai anau ni ten prat, ja gumhpraw hpe shama nga na ta?

Dai ni KIO/KIA mung asuya langai hta nga gin ai atsam hte nga gin ai, rawng gin ai, dap lamang yawng hkum hkra nga ai ngu ngai hku na mu mada ai re, dai ni Shanglawt asuya gaw madang nga ai asuya langai re, Tara hkungga ai, Tara masing hkrang nga ai asuya re majaw mungdan langai hpe up hkang lu na re ngu kam ai.

Matut nna ra ai hpe masa hta hkan nna prat madang hta hkan nna jat sa wa na, galai sa wa yang mai ai sha re, madung gaw Shanglawt lu na sha ahkyak ai. Shanglawt shawng lu ai hpang e she ra ai hpe matut bawngban ningmu garan nna matut sa wa yang kaja ai re, hpaji nhkum ai, sut masa nkaja ai, dai naw ra ai ngu tsun nga yang, ten hpe kade ram hpang de naw htingnut shangut na ta? Mara tam mara gaw mu na sha re? Ra ai lam hpe yu yang kadai mung hkum tsup ai ngu nga na nre, ya ten gaw yak dik ai hpe mung maram yu, mu yu hkrum sha yu ngut saga ai majaw awmdawm de she shanang na ten du nga sai ngu mu ai. Ndai ten matut nna n dating yang galoi she? Rai nu ga, yau sai, ngu shalai kau na kun? Yet yet sha hkawm nga yang gaw mayam bai nhtang tai ai she madung sai, tinang langai a prat hpe sha yu na kun?

Mai sa hpunau ni e hpaji hkum jang she gasat di ga, dinghkrai ga garan ga nga yang dai 60 ning hkawt rai wa nga ai, jat ai lam n'nga ai hta n'ga grau pyi she sum machyi ai hta n ga ya gaw singgu krin she rai mat saga ai.
Shing nrai myu gayau la nna myen+jinghpaw myu ningnan shamying jat la nna madu lu malu yawng chyasam wa hpe ap ya kau nna mayam tai, madu shat shadu sha lang nna chyasam ma hpe sa bau lawm na kun? Mayam tai nga ai hta n'ga tinang myu shada n'chyang chyang jahtawng n'htu ai hpaw lam madaw tai mat yang kaja sai kun? Makam nbung ai myu nbung ai ni hte ganawn yang n'mai sai, pawng yang nmai sai nga n'gup hta tsun, ta tut gaw lagaw n'dung gara de yawng nga ai kun? Myen a nampum lawm sai kun? Myen a hpyi kawa hkrum sai kun? Gahtawt tsi madaw katut sai kun? Mawng madaw katut sai kun? HPA RAI?

Dai ni na du nga ai masa hpe yu yang gaw awmdawm ai de madaw shanawng gasat sa wa yang she kaja sai ngu mu ai. Ga garan yang she annau ra awng sharawng dik ai shawng lam shanglawt masa gaw asan lawan mu na re hte lawan du lu na re, maram gaw maram yu ra ai tim shawng kara hku shanglawt na hpe she maram ra sai,
1-Mung masa hpyen masa.
2-Hpyen la n'gun.
3-Laknak n'gun.
4-Ja Gumhpraw n’gun.
Lahta na lam ni yawng hpe maram ngut jang gaw annau ni ten hte masha n'gun jat ra ai.
1-WP myu sha yawng awmdawm shanglawt majan a matu laknak hpai dang ai yawng laknak hpai ra ai.
2-Ahkyak ai ginwang daw langai hpe shawng gasat di la ra ai.
3-mungkan de ndau .
UNFC hta anhte tingnyang up rai nga ga ai re majaw UNFC hku shawng n'gun dat sa wa yang mai kaja na re.

Ya kaw na Shanglawt na matu masing jahkrat hpang wa yang kaja dik ai ten du nga sai ngu mu ai. Simsa lam la ai yawng hpe mung anhte maram mu ai daram mu chye saga ai hte maren myen gaw galoi kaja ai masing jahkrat nna mung masa teng bawng na nre hpe asan mu saga ai. Dai ni kalang bai chye nga ninglen myit malai kalang bai lu masu na kun? Hpa rai?
Myen a asuya rapdaw kata hpyen dap kata mu gun dap kata nru nra byin nga ai ten annau ni matu ten kaja dik re.
Hpa rai? Shanglawt nlu na ta? Hpa rai naw ganawn na ta? Naw pawng mayu nga ta?
Hpa rai mayam tai mayu nga ta? Hpa rai.....?

Baren Numraw

11 comments:

Bum shayi said...

Baren Numraw e ya she akren kaw hkra re sai law shanglawt lu hkra ya jang gasat ga nga yang Nu num ni mung ya na hta htam 10 naw jamjau gwi hkam ai law
chyasam ni roi sha ai nkam hkam mat re sai,ta tut roi katut sha hkrum ai ni kade ram hkam sha nga ai hpe sawn yu nna lawan she gasat di la saga law madi shadaw dik ai.atsam lu ai daram asak ap nna shakut na re matut shakut ga.teng shanglawt gaw kade nna yang lu na re ngu kam ai.K K mung anhte kaw kaja nan gasat lawm nga ai hpa hkrit ra na ta?tsa dan hpe dang kau na anhte hpe atsam jaw sai.

sha lawm said...

dai ni kaja sha wa anhte shawng lam gasat di la na matu myit nan myit ra sai.pawng gaw kara hku mung nmai pawng sai,matut shanang nna awmdawm gasat di la na de she myit makun saga,lu ai atsam yawng hpe nhti nhtang dinglit yu dik nna hkyen sa wa ra sai ngu mu ai.mung shawa hte maigan du miwa mung kala mung nga ai ni yawng mung dai hpe sha myit mada nga ai re.gasat di la saga law.

NU a Ma said...

galoi du naw maram la ra na rai ta?KIO/KIA Du kaba ni e galoi she gasat di la yang masa kaja ai ngu sawm lu nga myit ta?dai ni na ten masa gaw kaja dik ai ten du nga sai ngu mu ai.anhte ga garan nna gasat di yang she makau grup yin na hpunau miwa mung e nga ai ni kala mung e shanu nga ai ni tatut mai garum na re law,anhte myen mung e nga ai ni hpe shakre sha si wa nga yang shanhte majoi yu nga na nre law,gasat di la na she madung sai.myen sawa hpe moi na zawn masa sa sha kau ra sai.masin msi ai.ya jang kawa sha kau mayu sai.Du kaba ni e nanhte gaw tatut nhkrum sha nna mau dung nga naw mai ai law,anhte ndang hkam sha wa re sai.sat nat saga.rawt.

Anonymous said...

Nau hkum mau nga mu

Anonymous said...

HPA RAI,NGA AI GABAW HTE KADA AI BAREN NUMRAW A NING MU HPE NGAI HKAP LA AI

Anonymous said...

nanhte KIO/KIA ning baw kaba ni dawdan ai hta she hkan na sai,ngu mayu ai lam gaw mung shawa hte ramma ni yawng gaw majoi yu taw ai hkrai nrai na re ngu kam ai.sai ga shaga ai wunpawng sha ni rai ga ai majaw,dai hta e wunpawng mung dan ting hkapla lu na ga sadi langai lu jaw hkra shakut nna dai ga sadi hte maren ta tut galaw sawa yang awng dang ai
lam gaw wunpawng sha ni a ta lahpan nsa kaw re ngu kam ai.ngai mu mada ai lam hte yawng hpe ngun jaw mayu ai lam gaw an hte wunpawng sha ni a hkum/sai daw chyen sha nhtum dingsang wunpawng mung dan hpe kadai myu chyasam wa a lata hta mung nbang ai sha mungdaw hpe lu hkra kasat sa wa na ga ai ngu ga sadi jaw let...........Wunpawng Saidaw.

Bum Du said...

Kara rai yang gasat di la mat wa na hpe she myit jahkut ra sai.myen gaw anhte hpe la du yang magam rai yang,nanhte mungdan teng yang gasat di la mu nga moi kaw na ndau ding yang re,dai ni Aung san kaw a tsi kaba n,gup malawng hpe mung hkrit tsang ra ai.anhte gaw awmdawm de sa ra ai ni re.simsa nna ahkaw ahkang nlu yang hpa di na?awng san kaw hkrai kade gatek tim hpyen dap law malawng ka up nga hpung kaw chyahkyaw hpung kaw bangtai kasha dat bang ai hte bung na sha re.myit shang sha nmai ai.moi mung masu katut saga ai de majaw kade ning duhka wa saga ta?anhte lam anhte hkawm ga,shanhte hpa mi tsun tsun anhte gaw ga garan ra sai.shanglawt lu ra ai.

hpyen la dingsa said...

Hpunau ni e mau nga n'mai sai,lu ai atsam chye ai hpaji atsam yawng hte myu a matu bang nna gasat di la ra sai.myen mung ndai zawn dumbru dumbra nru nra byin nga ai ten lawan gasat di ra sai.hpyen dap e mung manghkang byin nga sai ten, gasat di ra sai.myen gaw sum machyi dik jang she bawnu shachyai nga ai re,dai ni myen teng sum dik nga sai.lawan gasat di saga law.

bum tsaw said...

Awng san kaw hpe pyi ra lata shang na matu ninghkap katut sai.myen asuya a htawng madun ai lam gaw ma ginsup chyai ai hte bung ai.myen gaw Num kaba langai mi hpe sha hpyen du kaba hte mu gun ni nau hkrit nna jitsi pyi she kahte sai law.myen hpe galoi mai kam nga ta?matut gasat sha mai sai law.masu a masu magaw manai makai re hpe matut nna nhkam saga.

JIdwi said...

Awng san kaw gaw madu ting nyang kaw lu dung na matu anhte hpe kaja sha wa akyu jashawn na matu re dai hta n'ga 88 jawng ma hpung ni mung ya ten simsa nla ai anhte gaw ahkyak madu rai taw nga ai majaw mung masa htawng madun lu na shanhte myit da ai galaw sa wa yang mung masha ni kade ram mai madi shadaw ai kun?nga shamawt chyam hkawm ai ga re hte kaja sha wa awng san kaw mung hkaw tsun ai masha kade sa madat lawm tim poi sa masha she law ai kaja sha paty shang masha gaw n,nga ai daram rai nga ai,kaja sha wa manghkang byin wa yang shi hpang de langai mung n'tsap ai hte madi shadaw ai lam n'nga ai hpe shi sari mu hkrum lai wa sai,ya mung anhte gaw poi sha yu ga,gai daw shada htawng ai hpe yup nna madat la yu nga ga.

Anonymous said...

Gap di nna sha lu na rai yang moi moi she nlu sana kun law.. gap na lam nau hku tsun masa.. ya gaw hpa ji hpa rat zai byen ya ladat hte du daw sai hkaw loi yawm ai hku gaw kaja rai na sai... gap sha gap loi ai bungli nrai nga ai

Post a Comment