Slideshow Image 2

JINGHPAW KASHA HKAW DUNG JANG SHE SIM SA NA

Kachin Kalay Nan Htai Ma Aye

Ndai ga hpe laika hti ai Wunpawng sha ni yawng na yu na re sha n-ga, n dai ga hpe tsun hpang ai gaw, Tibaw hkaw hkam nawku daw jau ai hpung kyi kaba wa a myi htoi ga re nga ma ai. Ndai myi htoi ga ( dabawng ) a majaw, masu ka myen gum shem gaw, Wunpawng sha ni myu kaji sha rai tim grai hkrit ai gaw dai ni sha n re moi kaw na rai nga nu ai. Sa wa myen ni Wunpawng sha ni hpe hkrit ai lam gaw n dai sha n re. kaga mung naw nga ai. Myen munghpawng shang lawt lu ngut ai hpang Wunpawng sha ni gaw myen hpe hkye da ai myen a chyeju madu re. Wunpawng sha ni prat tup chyeju madu tai nga na hpe n ra ai majaw, chyeju dum na malai, galoi mung chyeju n dum ra mat hkra myu shamat kau mayu ai myit rawng lu ai. Bai myu kaji ni yawng pawng nna, myen munghpawm ngu ai tai wa hkra, shan the myen ni n-gun kaba hkra rai na matu panglung ga sadi a majaw byin wa ai lam re. Dai ga sadi hpe myit hkrum lawm ai Sam the Hkang myu sha ni gaw Jinghpaw myu sha ni hpe kam hpa nna, myit hkrum ai re. Myen hpe kam nna, myit hkrum ai n re. Jinghpaw Wunpawng myu sha ni hpe chyeju dum ging dik ai rai tim, myu shamyit kau na she bai gyam wa ma ai. N dai gaw hkaw hkam wang na n ri hpe n-gup the makrang lu ai shangun ma, chyeju madu Hka U hpe nyet kau ai majaw, n ri htinggrang nna si mat ai the bung hkyen nga masai law.

Chyeju madu rai nga ai Wunpawng sha La hpe mu jang asak 70 dingla hpe pyi nngam gap sat, num ma hpe mu jang ra ai hku roi rip la, rawng da ai u hpe zawn rim da nna kam ai shaloi roi la nna roi ngut jang sat kau ai. Hkum rai n kung ai ma kanu hpe du hkra roi rip ai. Masha n re du sat pyi hkalung woi ai kanu hpe koi gam ma ai. Ndai daram zai ai sa wa ni a lam hpe maram yu yang shan the a matu hpang jahtum nhtoi rai nga sai ngu ai gaw asan sha re. Karai masa hku yu yang mung, nseng n ang ai n tara ai hku roi rip ai lam hpe Karai Kasang n ra ai. N dai dip sha, roi sha, zing ri zingrat hkrum sha nga ai kaw na shalawt dat lu ai gaw Karai Kasang chyu sha re. Shi a hpung shingkang gaw Jinghpaw Wunpawng sha ni hta dan dawng nga sai re. Ndai daram law la ai hk.m.y , hk .l.y sa wa hpe kasat shingdang da ai gaw, Karai Kasang a n-gun n lawm yang nmai byin ai.

Hpa majaw myen mung ting na myen hpen la ni hpe Jinghpaw mung de dat nna gasat shangun ra ai i?. Anhte hpa mara lu ai i?.Anhte hpa shut ai i?. Anhte mungdan n tsa anhte nga ai mara re i?. La du ai rai yang gaw langai the langai gasat ga. Shing n rai Jinghpaw wunpawng langai the Myen sa wa marai lahkawng gasat ga. Dai hku rai yang la du ndai ngu masat ya mayu ai. Ya gaw wunpawng sha langai hpe sa wa marai shi daram jawm gasat nga ai, tara ai ngu gara hku tsun na i? Kade the mi jawm gasat tim shahte dang na lam nnga sai. Dawm na lam sha rai manu ai. N htoi kru ya e daw the KIA hpe gasat shamyit kau na nga ai wa, shata jahku maga de du wa nga sai majaw, sa wa n gun gaw n dai the tha n jat sai. Shanthe n-gun gaw shani chyingtung n rai shana de du mat sai. Shanthe shawng gasat shamyit na nga ai re. shanthe n lu shamyit ai majaw shanthe mahtang sum sai ngu mai tsun sai. Shang lawt gaw myit masa hta mung, hpyen masa hta mung dang nga sai law. Nnan e shanhte ni myit ladat the gasat ai. Dai hpang n-gun kaba the gasat bang wa jang shanglawt ni hkrit nna, shanthe shangun ai yawng hkraw ya na shadu ai re. Raitim shanglawt ni n hkrit ai. Hpa majaw, shanhte a shingdu kaw Wunpawng myu sha ni yawng madi shadaw n-gun jaw nga ai. Karai Kasang mung lawm taw nga ai.

Kade nna yang shanlawt gaw, bum kaw na pa ga de gasat yu wa ra sana re. Sa wa ni hpe shanhte a shara lai hkra gawt kau ra na re. Sa wa ni sa gasat na hpe n la taw ai sha, gawt ai hku nna she gasat ra sai. Hpyen hpe matsan nmai dum ai. Matsan dum jang anhte hpe htang kaji nna, shanhte n-gun bai awai la lu na re. Dai majaw hpyen gaw hpyen sha re. matsan ndum ga. Mu bum kaw shanglawt ni wang da ai myen ni gaw, shanhte hpe n-gap na matu, shanhte mung n-gap na nga nna, jak the shanglawt ni hpe tsun ma ai da. wang da ai shanglawt ni tsun yang mung, sa wa ni pru hkawm ai lam nnga yang n gap na matu, n tsa kaw na matsun da ma ai nga tsun ma ai.Ndai gaw rim la ai yu hpe rai n sha yang dat yu , rim yu di shala chyai ai Nyau the bung nga ai. Shala chyai nna lawt mat wa ai yu mung law law nga ai hpe dum ga. Lama rai nna, sa wa ni mahtang shanglawt hpe wang da ai rai yang, n dai zawn sha sin nga na ma ai kun? Gasat ai gaw sin taw na matu nre. Padang dip lu na matu she re. Kachyi mi pyi hkyam sa n mai jaw ai law.

Ya dai ni myen mung gaw lawan dik ai hku galai shai wa nga ai nga nna, mungkan shara shagu na Sha Shu (shu chyit ) ni gaw, myen mung de htim bang hkyen hkyen rai nga ma ai. Hkum kam dam kadai kam yang kadai myit malai kaba lu na hkrai sha re. Myen ngu ai myit kaja n rawng ai. Ya kaja ai zawn zawn re gaw kaja masu ai sha re. Si tim pyi n dai amyu myit malai lu ai baw n re. Sanction hpe dawm kau sana zawn zawn, a rang madu ni kaput shang wa sana zawn zawn, nga tim, American mung chyahkri gaw n re yaw. 23/02/12 ya shana na BBC kaw Human right kaw na salang kaba langai mi tsun ai gaw, “myen mung gaw grai kaja ai maga de galai shai wa nga ai zawn zawn nga tim, Jinghpaw mung de du ai shaloi gaw, myen atsu ya a hpyen la ni gaw Jinghpaw myu sha mare masha num ma ni hpe n seng n ang roi rip ai, la ni hpe zingri sat ai, dum nta ni hpe nat kau ya ai,arung aria the du sat yam nga ni hpe mya la ya ai, masha a ahkaw ahkang tawt lai ai ni gaw mi na hta grau sawng nga ai” nga tsun lai wa sai.

Bai amyu baw sang n kau mi gaw,UNFC kaw malawm shang da ai rai tim, tinang myu sha ting gyeng lawt lam a matu,sa wa hpe kam nna ahpung the ahpung sa wa ni the simsa lam myit hkrum lik mat htu nga ma ai. Ndai ni gaw sagu hpyi hpung ai sharaw a myit masin hpe n chye ai majaw, kadawng bang ai lam rai nga ai. Rai tim sa wa ni a kraw chyayat hpe aten dep chye ai ni gaw, chye ai the rau bai n htang ninghkap gasat hpang masai. DKBA ni Dingda sam SSA ni gaw simsa likmat htu ngut nna, dung ai punghkum pyi rai n lum yang bai gasat hpang masai. Kaga ngam nga ai wu hpung ni yawng mung dai ni n rai yang hpawt ni sa wa the lam bai garan na sha re.

Rai yang myen munghpawm baw san ni sa wa the n pawng yang kadai the pawng na? ndai gaw Wunpawng myu sha ni htai ya na mahtai re. Shanglawt atsu ya gaw sa wa ni the bawng ban ai hta tinang myu sha ni a matu sha n re. Munghpawm mungdan kata na myu baw sang ni yawng a lawt lam hpe woi tam ladat shaw bawng ban nga ai ni re. Grau nna gaw sa wa ni hkrit dik ai UNFC hpe woi awn hkrang shapraw nga ai re. Du wa na lani mi hta amyu baw sang ni yawng gaw, myen sa wa hpe myit machyi myit htum mat nna, Wunpawng shanglawt woi awn ai UNFC de shang wa nna, munghpawm amyu baw sang yawng sa wa myen hpe jawm gasat dat ai shaloi, myen sa wa mungdan gaw moi na soviet union ga ayai mat wa ai zawn, ga ayai mat nna, amyu baw sang ni yawng gaw madu mungdaw hpe madu up hkang nna, jet ai munghpawm langai byin pru wa na ra ai. Dai hta myen mung gaw anhte kaw nlawm mat na sai. Dai munghpawm hpe kahpu kawa tai nna, rap rap ra ra myit hkrum mang rum let woi awn zinlum ya nga na Gumrawng Gum tsa gaw, anhte Jinghpaw Wunpawng shanglawt atsu ya nan rai na rai nga ai law. Dai majaw myi htoi ga kaw tsun ai “Kachin Kalay Nan Htai Ma Aye” ndai kaja nan byin jang she munghpawm mungdan sim sa ngwi pyaw na re. Karai Kasang shaman ya u ga. Amen.

Wunpawng sha ni yawng hpe tsaw ra hkung ga let,
Agu Namti

11 comments:

Myu Sai said...

Myi htoi ga hte maren lawan dik wa u ga loooo....
Amen...........

Anonymous said...

Jinghpaw mung hpe up na wa gaw sha ngai sai ,,mung Dan ga garan na nga n chye tsun ai ,MA Ah ,byin taw ai wa rai nga ai da

Anonymous said...

Um...anhte ni hpyen wa hpe lu a hkaw ahkang ma hkra hte hpyen wa hpe shamyit kau ra ai anhte labau hte mung myen wa mu hkamsha mat ai labau hta mung jinghpaw ni hte gasat yang nloi ngu hpe dum hprang mat na mat labau hka hku nna mu bum kaw wang da ai myen ni hpe sat kau yang myit hkrum n-ngai law.anhte mungdan hpe ya K.K lawm nga yang hpa rai nkasat ka na rai? nkasat la yang K.K gaw anhte myusha ni hpe grai nan na htat la ai nga mu mat na tsang ra ai.Lau Lau mungdan zing la ga,Moi hkan sum lawm mat sai jinghpaw lamu Ga ni hpe mung kalang naw moi na hte maren bai byin hkra kasat la ra nga ai.

Anonymous said...

Nai Ting Hkawn ,

N the nu num ni ,mungdan Hkaw dung lu ai ,sha dang sha ,shaprat na matu hpawlet la nga ai ,WP sha dang Branglet ni hpang de ,
Mai gan shayi hpe sha hkum tsawm dum muyaw ,lajin sai

Anonymous said...

"Kachin Kalay Nan Htai Ma Aye" nga ai gaw grai nan teng nga ai lo! re ai anhte a jing hpaw mung dan hpe anhte lu up hkang ai shani she ngwi pyaw sim sa ai wanglu wanglang galaw lu galaw sha lu ai jinghpaw myu sha ni shanu nga ai wunpawng mungdan tai na re.

Nai Ting Brang said...

Ha Ha nai ting hkawn e kajawng ra na zawn zawn,ka bu ra na zawn zawn ,ma tsan dum ra na zawn zawn nga ai wa i...Wunpawng shadang ni e zen sa ga looo.....

Gam Hpang said...

ဗာမာကေလး နန္းကိုေဖေပး (Barma kalay nan ko hpel pel) sha rai na sai lol

Anonymous said...

anhte k.i.o/a ni majan nnan hpang ai kaw na nan re,myen ni masu ti kade lang katut sha tim nma tsing ma ai,laja yang,loi je,na hpaw,gang dau,sha ra sha gu na myen hpen dap ni,anhte gaw nanhte hpe ngap na nanhte mung anhte hpe shum gap mi,hpu nau zawn sha nga ga,anhte mung kaning nchyum lahta na aming majaw ndai kaw nga taw ai re,nga nna hpen karum ngun kaba ndu shi yang,ding nga tsun ai hpe anhte ningbaw ni grai ra sha ti,htaw myen gaw anhte hpe grai hkrit let hpyi nem lajin taw sai,matsan mayan shum gap mu,majan ngu ai gaw mung masa jahkrup nmai ai majaw kaning ndi ti kasat taw ai re,shan hte mung anhte a hpu nau sha re nga nna dat kau,shalawt kau ai grai lang rai sai nga,npuna hpen ma ni grai maroi nni masin nsi ti tsun dan ma ai,ga shadawn 321 myen dap ni hpe yu ga,shan hte ngap na nga tsun ai ni re le,ndai dap ni she anhte myu sha ni hpe woi shamyit ai kaw ning shawng taw ai re,dai majaw tara nlang ai ni a ga hpe ya hpa de kaloi nkam ga,hpen hpe gaw hpen zawn masat na shamyit ga ngu ngai uloi la shadum mayu ai law.

Anonymous said...

nai ka bau said

nai ting hkawn tsun ai hpe sha sha ra mat sai,,mung ma sa an hte n chye ,ma sha lat na gaw chye nga ai le,,,hpaw da ai ga ra kaw ngu na hkan tam na zawn nga wa sai,,,,brang let ni hkum ma na nga mu looooo,,hkang jan ,,myen jan,,ga ga a myu jan rai n tai shi yang,,,,la wan yaw la ga,,,,an hte brang let ni sha ri hkum ja sum,,,,myu sha law ma sing de mung n gun dat ra ai, hpe dum ga,bau ma nu n lu tim,,hpang de shang lawt lu ai sha ni wa bang tim n ra na re,,,,,,,,

brang tung

Anonymous said...

lahta na nai ka bau tsun ai gaw ngai hpe yu na tsun sam ai,nang kadai ta?mi htoi kun?hpuja nhpring bau manu nhkum ai la bang da ai langai lai hkran gale na lahkawng lang pi bai rai sai.myen jan,ga ga myu jan rai ntai shi yang lawan yaw la mu lo brang tung ni e.....shang lawt lu ai shani she wa bang tim nra ai da Ni yen Tsa tsun ai...........he..he...

Anonymous said...

Jaw dik ai ,nai ting brang tsun ai ,kan hpyi htat that ,wa myi man zawn rai Tim ,WP sha yi sha rai jang rai sai ,la bawp gaba Tim n ra ai ,jak sha a hkyak ai ,,he he naw se dat yu ga

Post a Comment