Slideshow Image 2

SATAN GAW HPA MAJAW WUNPAWNG MYUSHA NI HPE SHAMYIT NGA DAW (III)

GAP HKAT JAHKRING
KIO maram yu dat ai shaloi, aten galu gasat poi shang wa ai rai yang, KIO gaw Myen hpyen dap hpe ndang ai zawn, Myen hpyen dap mung KIO hpe n dang lu ma ai majaw, lahkawng maga de sum kaba byin wa na hpe mu wa sai. Grau sum na gaw mungmasha ni rai wa na re. Dai majaw hpyen masa hpe shazim tawn nna mungmasa hku majan matut gasat na matu daw dan nhtawm 1994 ning kaw gasat jahkring tawn masai. Mungmasa majan gasat na matu constitution rai n nga ai majaw asuya hte pawng nna National Convention kaw constitution jawm ka wa ai rai yang 2008 ning kaw ka ngut nna mungmasa hku matut gasat hkat na matu Kachin State Progressive Party (KSPP) ngu ai mungmasa party hpe hpaw dat sai. Myen gaw Wunpawng Myusha ni a hpyen masa hte mungmasa hpe hkrit tsang nga ma ai majaw myu lahkawng yan hpe shamyit kau lu na matu KIO hpe Border Guard Force (BGF) galaw shangun nna KSPP hpe gaw ra lata poi shang na ahkang n jaw ai ladat lang wa masai.

THEIN SEIN ASUYA
2011 March 30 ya shani Thein Sein asuya lung wa sai. Dai asuya gaw mungdan kata kaw mung, shinggan kaw mung Myen asuya hpe ninghkap nga ai ni hpe simsa lam galaw na matu ndau nga masai. Rawt malan hpung ni hte gap hkat jahkring tawn na lam tam wa masai. Raitimung Myen asuya a matu mungdan ting hta hpyen masa hte mungmasa kaw hkam dahka nga ai simsa lam lu wa na matu gaw, 1963 ning kaw ladat shaw hpang wa sai hte maren Wunpawng Myusha ni hte simsa lam la tawn sai KIO hpe shawng shamyit kau ra ai, nga nna jahtuk magang sai hte maren shadik shatup galaw hpang wa masai. KIO hpe hpyen masa hku lu shamyit kau ai hte kaga rawt malan hpung ni gaw hpung langai a hpang langai asum hkam wa sana rai nna, dai rawt malan hpung ni hpe kam hpa nga ai Aung San Suu Kyi mung rawt malan hpung ni a ntsa e myit mada shara n nga sai majaw mungmasa shaga ai hta n-gun kya wa na sai nga nna tak la nga ma ai.

UNITED NATIONALITIES OF FEDERAL COUNCIL (UNFC) HPAW SHABAWN
KIO woi awn ai UNFC hpe woi hpaw shabawn dat ai shaloi Myen hpyen asuya hpe bai kajawng hkrit tsang shangun dat sai. Satan wa gaw rawt malan hpung ni kahkyin gumdin na mahkrun paw pru wa shagu, myit ru myit tsang lam hpe ndang sharang ai nsam in dan pru wa sai. Dai majaw hpu nau Wa ni UNFC kaw n sa shang lawm hkra shawng de dawm la kau sai ahkaw ahkang amyu myu bai jaw nna kalang mi bai shalen la lu masai. Matut nna UNFC hpe jahten sharun kau lu hkra atsam htum hte ladat amyu myu hku shakut nga ai hpe asan sha jawm mu wa sai.

MAJAN HPANG
Ku Kang hpung hpe nhtoi 3 ya hte shamyit kau wa sai. Wunpawng ramma ni hpe yu yang tsa htam 60-70 daram gaw kani ya, tsa ya, AIDS ana kanu ni byin ma sai zawn, KIA hpyen la ni hta mung kani ya law mat sai majaw naw lang mai ai laknak pala ni gaw nanghpam malu masha hte galai lu kau sai rai nna, lang n mai sai laknak ni sha lu na masai. Shing rai KIA hpyen la nnan sa galaw na matu ramma ni mung ndum shamyi si htum ma masai. Raitimung KIO ginra gaw dam ai majaw yawng tsep kawp zing la na matu aten 10 ya na na re, nga nna maram nhtawm 2011 June 9 ya shani e gasat hpang wa masai. KIA hpyen hpung ni hpe Chemical laknak ni hte hkan gasat ai zawn, yi sun hkauna galaw nna asak bau nga ai mungmasha ni hpe hkan rim zing ri, gap sat hkawm nna, mungmasha ni a kun dinghku u wa yam nga ni hkan mya gashun la ai zawn, Mai Ja Yang gin ra hkan “yellow rain” ngu ai chemical laknak hte mung matut manoi gasat wa masai. Raitim nlu dang la ai hta n-ga, Myen maga de hpyen hpung hkying kaba hkrat sum wa ai majaw ladat nnan bai shaw manu ai.
Aung San Suu Kyi hpe lu abawk la ai hte sinna masha in Myen asuya hpe jawm madi shadaw wa na mara ai. Dai shaloi rawt malan hpung ni yawng mung gasat jahkring kau wa na mara ai, nga nna kam let ta tut galaw wa ma ai rai yang, kaja nan kaga hpu nau rawt malan hpung ni gaw satan wa gunglau ai mahkrun kaw hkan gashawt bang mat wa masai. Hpang jahtum hpu nau rawt malan hpung ni gaw shalen katut ai hpe myit dum wa ai shani na chying pawt singdawng ai hte matai dawp na mahkrun bai jahtuk wa na mara ai. Dai hte maren satan wa gaw KIO hpe simsa lam mahtan masu nna ta tut kaw gaw simsa lam la tawn ai lawu ga na shi a hpyen hpung ni hpe KIO ginra de sa bang dingyang galaw nga masai.

MAJAN A MAHTAI
Ndai majan a ntsa dinglik yu yang, pru wa ai mahtai gaw Wunpawng myusha ni hta na chying sum machyi wa sai. Raitim si htum wa nga ai kani ya, tsa ya, AIDS ana kanu ni hpe shabran dat shangun ai marang e, tinang a asak hte amyu hpe aten dep makawp maga la lu na matu masawp dep ai laknak ni magra lang nhtawm gasat bang wa nga ga yang, mungdan kata hkan, maigan mungdan hkan shawng de dumbru dumbra rai ninghkap hkat nga ai myutsaw sha ni gaw kahkyin gumdin ai shawang myit hpe ngangkang wa shangun nna tinang a hkum hpe tinang nan lit jaw la nhtawm byin mai ai shara kaw lit shang jum wa nga masai.

Pajau Pan

2 comments:

Anonymous said...

laisai 14 ning hta wunpawng myu sha ni hpe mungmasa lam sutmasalam ,laika hpaji lam ,hpyen masa lam hta ningbaw tai ya ai uhpung uhpawng nnga ai dai majaw ,mwunpawng sa ni ayai ayarai mat nga ai.ya ten hpyen masa lam hta lam woi ya ai KIA nga ai majaw wunpawng myu sha ni hpyen lam hta ningbaw nga sai ngu ma kam nga ai ,rai tim mungmasa lam,sutmasa lam, laikahpaji lam hta,ningbaw woi awn ai uhpung law law ngara ai, ndai uhpung ni mung wunpawng myu sha ni hpe pandung langai hpe sha yu nna lam woi ra ai.KIO ni sha gra hku mung,mung masa lam hta woi awn lu nanre , dai gaw laisai 14 ning hpe yudat jawng mu lu ai

Anonymous said...

ndai myit su wa tsunai teng dit nga ai,dai majaw myit su wa hte rau mung masa kalaw mu.

Post a Comment