WUNPAWNG MYUSHA NI RA SHARAWNG AI MUNGMASA HKRANG
Bum nga masha ni yawng ra sharawng ai gaw Panglong myit hkrum ga sadi kaw rawng ai hte maren Munghpawm Myenmung hpe gaw-gap nna rap ra ai tara npu e ngwi pyaw simsa ai mungdan kaw myu bawsang yawng ahkum ara alum ala rai jawm ganawn sa wa na matu rai nga ai. Ratimung tinggyeng myit sha rawng ai Myen asuya gaw shing re ai ningmu hpe atik anang ninghkap wa ai majaw dai hkrang gaw myit hkrum laika kaw ka bang tawn ai madang sha rai wa sai. Shing re ai masa amyu myu a majaw Wunpawng Myusha ni gaw satan hte matut ganawn sa na matu masan nsa sai majaw awmdawm ahkaw ahkang lu ai mungdan gaw-gap na maga de mahtang myit sharawng wa hkra lam madun dat ai hkrang de galai wa sai.
Sung sung myit yu na lam nga wa ai. “Awmdawm ahkaw ahkang lu ai mungdan hpe gaw-gap na” ngu ai hta, anhte Wunpawng Myusha ni sha lawm ai mungdan kun? Bum nga myusha yawng (Kachin, Karen, Karenni, Chin, Mon, Shan, Yahkaing) lawm ai mungdan kun? Myu lahkawng yan kaw Myen n lawm ai majaw awmdawm ahkaw ahkang lu ai mungdan hkrang hku uphkang mai na re. Bum nga myu bawsang yawng lawm ai hkrang hku uphkang ai rai yang, maigan kaw na madi shadaw la na matu grau manu na hta n-ga, maumwi mausa kaw lu wa yu ai lamu ga sumla hte maren sharai la wa mai na re majaw, Myenmung gaw panglai hte ni kahtep ai lam n nga na sai. Myenmung gaw bum nga masha ni a mungdan kata kaw namsi tum kasha zawn shamu shamawt yak ai hkrang kaw chyat rawng nga ra na re. Anhte a munghpawm mungdan kaw nhprang rai myu hkum sum hpa law htam nga ai majaw aten kadun hta prat dep ai mungdan byin tai wa lu na re.
MYEN ASUYA RA SHARAWNG AI HKRANG HTE AKYANG
Myenmung shanglawt lu wa ai shani kaw nna mungdan hpe “Munghpawm Myenmung” nga nna Panglong myit hkrum zuphpawng kaw jawm shamying tawn nga ninglen ta tut uphkang wa ai hkrang gaw Myen amyu langai sha uphkang ai “unitary” hkrang hpe dai ni du hkra lang wa masai. Mungkan grup yin kaw na mungdan hkan mungmasha ni hte htap htuk ai hkrang myu hkum sumhpa gram sharai lang nna mungkan gaw rawt jat ai hta grau rawt jat wa masai. Wunpawng Myusha ni hpe shamyit kau na masing jahkring kau na matu mungdan law law kaw nna Thein Sein asuya hpe hpaji jawm jaw wa masai raitimung, nga wuloi hpe tingse dum dan ai kasi sha rai wa sai.
Ngang kang ai hpri tawng kaba hpe tinang ra ai hkrang de galai la mai ai. Raitimung Myen asuya a myit hpe galai ya na matu gaw myit mada shara n nga sai. Myen ni tsun chye ai ga hkaw:- “Bum nga masha ni gaw myit hpraw san ai amyu ni rai ma ai” nga ai. Asan sha tsun ga nga yang, “Bum nga masha ni grai anya ma ai” ngu ai lachyum rai nga ai hpe yawng chye nga chyalu re. Bum nga masha ni shanhte ra ai hte maren hkan madat ya hkra, jahkrit ai ladat, shamyawk ai ladat amyu myu lang dat ai hte bum nga masha ni gaw ntsen nga ninglen tinang maga de asum hkam nhtawm da sang kataw bang ya wa saga ai. Hpang de Myen in hte shaga hkat ai shaloi Myen ni a akyang hte ladat ni hpe jai lang chye ra na masa nga ai. “Shing ngu yang Myen ni n ra na ma ai majaw……………….…” ngu ai rai yang, satan hpe nhtung tawn nhtawm asum jaw kau ai lachyum sha arai wa na re.
TA TUT GALAW RA AI MASING
Lahta kaw tang madun wa ai lam yan hta hkan nna Wunpawng Myusha ni gaw rawt jat ai prat nnan hpe gaw-gap la lu na matu htap htuk ai mahkrun hpe shalat la ra saga ai. Mungkan grup yin na myutsaw hpu nau ni a ningmu hpe maram yu yang, ganoi tsa htam hpring ngu na daram gaw awmdawm ahkaw ahkang lu ai mungdan gaw-gap la na matu ra sharawng nga ma ai. Rai yang, yawng e jawm ra sharawng ai hpe lu wa na matu gaw dinglun hkat, mara shagun hkat ai hte awngdang wa lu na nrai. Kahkyin gumdin let jawm galaw sa wa ai masing kaw langai hpra chyoi chye gunhpai lu ai bungli ni hta myit hkrum mang rum rai tinang a n-gun hte hpaji hpe asung jashawn lu ai lam gaw amyu hte mungdan a matu awngdang ai lam rai na re. Tsun yang loi nna, galaw yang yak ai hpe yawng chye nga chyalu rai ga ai. Dai yak ai hpe awngdang la lu ai gaw na chying arawng la hpa rai nga ai hpe mung jawm myit dum chyalu rai nga ai.
YEHOWA KAW KYU HPYI
Lai wa sai ten ni hta myusha ni lu ging ai ahkaw ahkang lu wa na matu asuya kaw aten galu hpyi wa saga ai. Raitim nlu wa ai majaw ya gaw Kachin Baptist Council (KBC) kaw na woi awn nhtawm mungdan ting na Christian hpung 300 jan aten langai kaw sha 2012 February 13 ya manap 6 a.m. kaw nna hpang jahpawt 6 a.m. du hkra nsen langai hte mungdan ting hkying hkum 24 tup lu sha gam nhtawm kyu hpyi wa masai. Lai wa sai ten ni hta asuya gaw rap ra ai tara hte uphkang chye wa na matu hpyi wa saga ai raitim nlu wa ai majaw ndai lang gaw majan dang na matu, “Jan hpe jahkring ya rit”, nga nna Mawshe aja awa hpyi jahtau ai hpe Yehowa madat ya ai majaw awngdang wa ai zawn, (Pru mat wa ai laika 17: 8-16) awmdawm ai ahkaw ahkang lu wa na matu Yehowa kaw dingtawk kyu jawm hpyi wa masai. Teng sha awngdang wa na re.
Pajau Pan
Bum nga masha ni yawng ra sharawng ai gaw Panglong myit hkrum ga sadi kaw rawng ai hte maren Munghpawm Myenmung hpe gaw-gap nna rap ra ai tara npu e ngwi pyaw simsa ai mungdan kaw myu bawsang yawng ahkum ara alum ala rai jawm ganawn sa wa na matu rai nga ai. Ratimung tinggyeng myit sha rawng ai Myen asuya gaw shing re ai ningmu hpe atik anang ninghkap wa ai majaw dai hkrang gaw myit hkrum laika kaw ka bang tawn ai madang sha rai wa sai. Shing re ai masa amyu myu a majaw Wunpawng Myusha ni gaw satan hte matut ganawn sa na matu masan nsa sai majaw awmdawm ahkaw ahkang lu ai mungdan gaw-gap na maga de mahtang myit sharawng wa hkra lam madun dat ai hkrang de galai wa sai.
Sung sung myit yu na lam nga wa ai. “Awmdawm ahkaw ahkang lu ai mungdan hpe gaw-gap na” ngu ai hta, anhte Wunpawng Myusha ni sha lawm ai mungdan kun? Bum nga myusha yawng (Kachin, Karen, Karenni, Chin, Mon, Shan, Yahkaing) lawm ai mungdan kun? Myu lahkawng yan kaw Myen n lawm ai majaw awmdawm ahkaw ahkang lu ai mungdan hkrang hku uphkang mai na re. Bum nga myu bawsang yawng lawm ai hkrang hku uphkang ai rai yang, maigan kaw na madi shadaw la na matu grau manu na hta n-ga, maumwi mausa kaw lu wa yu ai lamu ga sumla hte maren sharai la wa mai na re majaw, Myenmung gaw panglai hte ni kahtep ai lam n nga na sai. Myenmung gaw bum nga masha ni a mungdan kata kaw namsi tum kasha zawn shamu shamawt yak ai hkrang kaw chyat rawng nga ra na re. Anhte a munghpawm mungdan kaw nhprang rai myu hkum sum hpa law htam nga ai majaw aten kadun hta prat dep ai mungdan byin tai wa lu na re.
MYEN ASUYA RA SHARAWNG AI HKRANG HTE AKYANG
Myenmung shanglawt lu wa ai shani kaw nna mungdan hpe “Munghpawm Myenmung” nga nna Panglong myit hkrum zuphpawng kaw jawm shamying tawn nga ninglen ta tut uphkang wa ai hkrang gaw Myen amyu langai sha uphkang ai “unitary” hkrang hpe dai ni du hkra lang wa masai. Mungkan grup yin kaw na mungdan hkan mungmasha ni hte htap htuk ai hkrang myu hkum sumhpa gram sharai lang nna mungkan gaw rawt jat ai hta grau rawt jat wa masai. Wunpawng Myusha ni hpe shamyit kau na masing jahkring kau na matu mungdan law law kaw nna Thein Sein asuya hpe hpaji jawm jaw wa masai raitimung, nga wuloi hpe tingse dum dan ai kasi sha rai wa sai.
Ngang kang ai hpri tawng kaba hpe tinang ra ai hkrang de galai la mai ai. Raitimung Myen asuya a myit hpe galai ya na matu gaw myit mada shara n nga sai. Myen ni tsun chye ai ga hkaw:- “Bum nga masha ni gaw myit hpraw san ai amyu ni rai ma ai” nga ai. Asan sha tsun ga nga yang, “Bum nga masha ni grai anya ma ai” ngu ai lachyum rai nga ai hpe yawng chye nga chyalu re. Bum nga masha ni shanhte ra ai hte maren hkan madat ya hkra, jahkrit ai ladat, shamyawk ai ladat amyu myu lang dat ai hte bum nga masha ni gaw ntsen nga ninglen tinang maga de asum hkam nhtawm da sang kataw bang ya wa saga ai. Hpang de Myen in hte shaga hkat ai shaloi Myen ni a akyang hte ladat ni hpe jai lang chye ra na masa nga ai. “Shing ngu yang Myen ni n ra na ma ai majaw……………….…” ngu ai rai yang, satan hpe nhtung tawn nhtawm asum jaw kau ai lachyum sha arai wa na re.
TA TUT GALAW RA AI MASING
Lahta kaw tang madun wa ai lam yan hta hkan nna Wunpawng Myusha ni gaw rawt jat ai prat nnan hpe gaw-gap la lu na matu htap htuk ai mahkrun hpe shalat la ra saga ai. Mungkan grup yin na myutsaw hpu nau ni a ningmu hpe maram yu yang, ganoi tsa htam hpring ngu na daram gaw awmdawm ahkaw ahkang lu ai mungdan gaw-gap la na matu ra sharawng nga ma ai. Rai yang, yawng e jawm ra sharawng ai hpe lu wa na matu gaw dinglun hkat, mara shagun hkat ai hte awngdang wa lu na nrai. Kahkyin gumdin let jawm galaw sa wa ai masing kaw langai hpra chyoi chye gunhpai lu ai bungli ni hta myit hkrum mang rum rai tinang a n-gun hte hpaji hpe asung jashawn lu ai lam gaw amyu hte mungdan a matu awngdang ai lam rai na re. Tsun yang loi nna, galaw yang yak ai hpe yawng chye nga chyalu rai ga ai. Dai yak ai hpe awngdang la lu ai gaw na chying arawng la hpa rai nga ai hpe mung jawm myit dum chyalu rai nga ai.
YEHOWA KAW KYU HPYI
Lai wa sai ten ni hta myusha ni lu ging ai ahkaw ahkang lu wa na matu asuya kaw aten galu hpyi wa saga ai. Raitim nlu wa ai majaw ya gaw Kachin Baptist Council (KBC) kaw na woi awn nhtawm mungdan ting na Christian hpung 300 jan aten langai kaw sha 2012 February 13 ya manap 6 a.m. kaw nna hpang jahpawt 6 a.m. du hkra nsen langai hte mungdan ting hkying hkum 24 tup lu sha gam nhtawm kyu hpyi wa masai. Lai wa sai ten ni hta asuya gaw rap ra ai tara hte uphkang chye wa na matu hpyi wa saga ai raitim nlu wa ai majaw ndai lang gaw majan dang na matu, “Jan hpe jahkring ya rit”, nga nna Mawshe aja awa hpyi jahtau ai hpe Yehowa madat ya ai majaw awngdang wa ai zawn, (Pru mat wa ai laika 17: 8-16) awmdawm ai ahkaw ahkang lu wa na matu Yehowa kaw dingtawk kyu jawm hpyi wa masai. Teng sha awngdang wa na re.
Pajau Pan
0 comments:
Post a Comment