JAW AI MASING HTA ANNAU NI TSAP RA

Mungkan a rawt jat galu kaba wa nga ai lam, masha a ngasat ngasa galai shai ai lam, magam yi ngam galai shai ai lam yawng gaw Masing shawng jahkrat nna galaw hpang wa ai, byin pru wa ai lam hkrai rai nga mali ai zawn shim lum ai masha uhkung uhpawng langai hte awmdawm wanglu wanglang nga lu ai ahkaw ahkang yawng hpe lu wa lu na matu mung masing jahkrat nna galaw hpang myit hpang wa ai hkrai rai nga ai.

Dai zawn masing jahkrat ai hpe grin nga lu na rau jawm galaw lu na matu gaw gaw da ai tara masing gaw ahkyak dik rai nga ai. Mungdan law law a masing jahkrat ai lam amyu hte ningmu amyu a majaw hkrat sum ai zawn awngdang ai mung nga nga ai, dai majaw daini anhte myu sha ni yawng a hpang lam masing hpe mungkan mungdan law law a gaw da ai tara hpe maram dinglit yu nna tinang myu sha tinang htunghking hte rap ra ai, prat madang bung ai tara ningnan ni hpe bai gaw da ra nga saga ai.

kaga mung dan law law a shaning na na lai mat sai dai ni na prat hte n htap htuk mat sai tara ni hpe tawn kau ra saga ai. Tara ningnan myit jasat ningnan masha ningnan atsam ningnan hte kalang bai gaw gap tawn ra saga ai ngu mu ai.

Dai ni Tai Hpyen wa gaw anhte myu sha hpe shamyit na matu shaning law law kaw nna, masing jahkrat gaw da ai tara tawn da chyalu re majaw, kaning re ai Myen ningbaw wa galai lai anhte myu sha a matu galai shai na lam n nga ai. Ra lata shang ai hta pyi anhte myu sha ni n mai lawm ai. Gawda ai Tara hte masha n galai dingsa munghpawm ngu ai hta anhte myu sha ni n mai tsap sai.

Jinghpaw ngu ai pyi shamyit shamat kau mayu ai ni hte anhte matut bawngban nga tim, “Magwi na tingse dum bang ai hpa,” jummu shi nna she rai na re. Dai ni makam hpung law law pru wa ai majaw mung dinghku masha langai hta na annau ni shat hpun langai hta rau n mai sha wa nga ai hpe mung maga mi de myit dum ga.

Makam hpung law law pru wa ai mung annau ni a ga garan lam hte masa kaba langai rai nga ai. Lamu ga sau nhprang rai mungdan sutsu ai majaw mung annau ni a matu hpyen kaba langai rai nga ai, zai bru jang hta kadai n tsin sa tam na ta? Myu a matu machyi hkam lu ai ni tai ga. Masing hte gaw da ai Tara n-galai dingsa, annau ni a jaw ai shinggyim ahkaw ahkang lu na lam n-nga ai. Dai ni annau ni kata majan da, lahta majan da, katsi kahtet majan da, pat shingdang ra mat saga ai majaw shawng na hta grau atsam dat sadi maja ga.

Baren Numraw