KIO HTE MYEN ASUYA LAPRAN MUNGMASA BAWNGBAN GAMUNG

March (10) bat Kru,

2012, March (9) ya Shana daw na

KIO hte Myen Asuya lapran nhtoi 9-3-2012 ya, shana daw bai matut bawngban ai hta, Myen Asuya kasa ni gaw, gasat gala sha n jahkring yang simsa lam gaw gap na yak ai nga nna, matut tsun dara shakut nga ai lam shiga na lu ai. KIO ni htai hparan ai hta, shada da a lapran tang du ai kam hkat lam shawng gaw gap ra ai. KIO hte Myen Asuya lapran, tang du ai kam hkat lam lu la na daram re ai hpa sakse mung n dan dawng nga ai. Shada n mai kam hkat ai majaw she, sari hta mi hkra tim, kaya dum ai lam mi nga tim, ya na zawn htingbu mungdan e sa bawngban ra wa ai lam rai nga ai.

Ya ten du hkra KIO/KIA gaw lawu ga mandale, Yangon de sa htim gasat ai lam n nga ai. 1994 ning na gasat gala jahkring ai ten hta dap jung tawn ai gara Asuya a dap dabang hpe mung, ya du hkra sa htim gasat ai lam garai n nga ai. Myen Asuya hpyendap ni chyawm gaw, maga mi de gasat gala jahkring ga nga tsun nhtawm, maga mi de lawu mung na hpyendap "Tat-ma" ni hpe shani shana matut manoi Jinghpaw mung de shalun tik tik rai taw nga myit dai. Dai gaw Jinghpaw ni hpe myu shamyit masing galaw ai lam asan sha dandawng nga ai. Dai zawn rai taw nga yang, gara hku kam hkat lu na rai ta? Mungmasa bawngban lam hpe teng sha awng dang shangun mayu ai rai yang, lawu ga na lung wa ai hpyendap "Tat-ma" ni hpe shawng lawan dawm htingnut la ra nga ai. Dai "Tat-ma" hpyendap ni gaw, maigan hpyen hpe gasat na matu hpaw da ai hpyen hpung ni she rai nga ai. KIO gaw maigan hpyen n rai ga

Grau nna ahkyak ai gaw, manghkang byin wa lu ai shara hkan na dap dabang ni hpe lawan dawm htingnut kau ra ai. Ntsa na salang ni kade mi mungmasa bawngban jahkrup nna htuk manu ai madang du wa hkra mi rai tim, ndai zawn shawng lam ginra ni hta lahkawng maga na dap dabang ni gaw, marawn yang pyi mai na hkat ai shara hku grai ni kahtep nna dap jung nga jang, lam mi hku n rai yang lam mi hku nna shut shai hkat, manghkang byin hkat wa chye lu nga ai nga nna tsun tang madun ma ai lam na chye lu ai.

Myen Asuya Kasa ni bai tsun ai hta, daini na Asuya a ten ladaw gaw, manga ning sha re majaw, ndai Asuya a ladaw garai n htum yang, simsa lam lu la hkra, mungshawa ni hte mungkan ting hpe mu mada hkam sha shangun mayu ai lam re, nga ma ai.

Lawu ga na hpyen hpung kaba "Tat-ma" ni shalun ai lam hte seng nna, asan bra bra htai hparan dan ai lam n nga ai sha, wora lera tsun gawai jahpai nna shangut kau ai lam na chye lu ai. Lai sai ten na lam ni nang shut ai mung lawm na; ngai shut ai mung lawm na; dai lam ni n jahta saga. Daini kaw nna matu galaw sa na hta gara hku gasat gala jahkring na hpe she bawngban ga, nga ai lam na chye lu ai. Dai sha n-ga ndai lang na majan a majaw, hpyen yen tsinyam masha ni hpe yu mada madi shadaw karum ai lam gumhpraw wan hkying lahkawng e lahkawng tsa jan rai sai lam, arung arai karum madi shadaw ai lap wan hkying lahkawng jan a manu rai sai lam; n-gu hte shapre re ai malu masha ni madi shadaw lai wa sai nga nna, tsun shakawng dan ai shiga ni na chye lu ai.

KIO Kasa ni matut tsun ai hta, KIO gaw, gasat gala shawng jahkring nna simsa lam hpe tam shakut ai majaw, masu hkalem hkrum, aten sharen nna jamjau jaw hkrum ai lam law law lang rai saga ai. Ndai lang gaw, mungmasa shawng ginrat ngut ai hpang she gasat gala jahkring ai de lahkam sa na re lam tsun shaga ai. KIO/KIA hpe simsa lam n ra sharawng ai sa numdan hpung (Terrorist) hku mara shagun dinglun shatan ai ni nga ai lam mung chye lu ai, nga ma ai.
KIO Kasa ni bai tsun ai gaw, 1994 ning Bogyoke Khin Nyunt a lakhtak na gasat gala jahkring ai ten hta, Jinghpaw mung ting rai yang, Asuya hpyendap dapdung (18) daram sha nga ai. Gasat gala jahkring tawn ai 17 ning laman e Dapdung (80) du hkra maden jat wa ai. Simsa lam hpe teng sha ra sharawng ai rai yang, Jinghpaw Mungdaw hta hpyen n-gun dai daram ram tawn ra a ni? Hpa baw hpe yaw shada nga ai lam KIO ni chye ya nga sai. Gasat gala jahkring ai 17 ning laman KIO hpe Asuya Tatmadaw ni tawt lai ai manghkang law law nga lai wa sai. Lahta Sammung na manghkang, Muse na manghkang, Hpakant na manghkang ni sha n-ga kaga law law naw nga nga ai. Dai lam mahkra hpe KIO gaw, kalang mi gasat gala jahkring lata masat ka da sai hte maren, myit galu galang hte hkam sharang lai wa sai re.

Daini Asuya Kasa ni gaw, KIO ni hpe gasat gala n jahkring yang manghkang matut pru na re, nga nna tsun ai ga gaw shut nga ai. Lawu ga na shalun la tawn ai Asuya a Tatmadaw ni hpe dawm htingnut la ai lam n nga yang she manghkang gaw matut pru na rai nga ai. KIA ngu ai gaw, KIO a npu e madat mara ai hpyendap re. Tatmadaw ngu ai mung Asuya a npu e madat mara ra ai hpyendap re. Daini nanhte Asuya ningbaw ningla ni nanhte a hpyendap ni hpe htingnut la na atsam n nga myit ni? Tatmadaw Tat-ma ni gaw Asuya a aming n madat ya ma ni? Manghkang byin wa lu ai shara hkan na nanhte a hpyendap ni hpe gaja wa she htingnut la na teng yang, KIO gaw lam hpaw ya na ga ai re. Ginra tawt bang ai Asuya hpyen dabang ni a jahpan hpe lamu ga sumla hte hpawn madi madun da sai re. Munghpawm ngang grin simsa shangun mayu ai rai yang, ginra tawt bang tawn nga ai Asuya hpyen hpung ni hpe shawng lawan htingnut la mu, nga ma ai lam na chye lu ai.

Hpa mi rai tim, shaning 60 jan na lai wa sai manghkang re majaw, ya tsun ya jahta, ya shangut, ya ta masat ka na hku gaw n mai byin ai. Langai hte langai tsun shaga ai ga si ga ngau ni hpe atsawm bai nhtang sumru dinglik mat wa yang, mai kaja akyu rawng ai lachyum ni htai shapraw la chye ai re majaw, myit galu kaba hte matut bawngban ga, nga ma ai. Majan ngu ai gaw, mungmasa hpe laknak hte hparan ai lam rai nna, mungmasa manghkang hparan jasan kau lu jang, majan mung shi hkrai shi zim mat wa na sha re, nga nna tsun jahkrup mat wa ai hta, 9-3-2012 ya shana de n ngut kre lu sai re majaw, 10-3-2012 ya shani matut bawngban na lam, mungga garan la nhtawm, daini na bawngban ai lam hpe naw jahkring sai lam shiga na chye la lu ga ai rai.