LAGAW HKANG

Hpau lum htu sanam num ni she lagaw n'htang de tu ai nga mau mwi hta na lai wa yu ai, nam maling krung sinwa hkan lagaw hkang mu jang lagaw ndung de nmai hkan ai hpau lum htu sanam num hte hkrum chye ai nga, chyu pau nau galu ai majaw kadawng lung ai de nmai hprawng ai kadawng yu ai de she hprawng yang lawt ai nga na ga yu ai. Ya dai ni annau ni mung tinang a mung masa hpyen masa hpe lagaw hkang hta yu bai n'htang yu nna loi ai de madu a ting kyeng myit jasat hpe bai yu wa yang , n'gun kaba ban la ai hte shawng de sa shanang shakre yi ngam shangut na de she madung myit jahkut tawn ra sai, tim shawng de sa nga ai mung shawa myu sha yawng a n'gun hpe hpau lum htu sanam num lagaw hte shabung ai zawn rai, mung shawa ni hpe hka kata na shingna zawn hkrang shapraw ai kum la npru hkra ja ja hprut hprut dawdan galaw madun sa wa ra sai ten du nga sai. Dawhpum wahpang madi shadaw dahpran shara rai nga ai mung chying shawa hpe myit ung ang shangun ai myit dum hprut shangun ai de ndu npru shangun hkra grai naw dating ga ngu sum tang jepa shadu dat nngai. Ningbaw ningla Slg kaba ni a ga hkaw mi gaw WP myu sha yawng asak sumri hte annau ni a lamu ga hta nga ai hkrung mahkrung tu ma-tu, nga ma-nga yawng a n'pawt madung re majaw sung sung li li myit ra ai zawn libaw hpe atsawm hkang ya na ra nga ga ai.

Tsit lali tsawm htap sutsu nga mai, ga sau hpring ai, simsa ngwi pyaw dik ai annau ni a lamu ga de lagaw hkang katsing, lata katsing du shang ai shani kaw nna, dinghku nru nra byin ai, lamu ga hten za nga sai dai ni annau ni shanhte ga de jahte tam mazang n'rin byin hkra, sa shalau sha ai ni nre, dai ni annau ni a ginra de madaw, ta katsing lagaw katsing ni a jaw masha mung hpe ra, lamu ga mung hten ra, kyang lai len mung la nmai mat hkra sari sadang yawng, magam myit yawng ginlut hkrum sai hta n'ga, dai ni gaw masha mung, tu ma-tu hkrung mahkrung nga manga yawng mung madai nga sai. Annau ni singgu krin byin mat sai hpe ja ja myit shim yu nna madu mungdan madu up hkang, madu gawn lajang la saga. Chyasam ni hpe madaw anhte lamu ga kata kaw na lawan gawt shapraw kau saga. Myen ngu ai gaw myen mung ka ang kaw kaji sha shanu nga ai, annau ni miwa mung kala mung tibet hkan ding grin shanu nga ai hpe myit dum nna ga garan sa wa yang she mai sai. Ya ten anhte maigan mungdan shagu hta du nga ai ni yawng mung shanglawt sha nlu dingsa galoi mung gasat na ding grin hpung kaba langai re hpe yawng myit dum myit jahkut myit shajin tawn ra sai. Ga garan yang she annau ni shawng lam gaw grau san wa na re. Hpa rai chyasam ni hpe naw kam ra na ta? Ya dai ni mungdan lu ai hte ya jang jang gumhpraw sumbu kaba hpai nna annau ni hpe sa jaw na, sa garum na, sa hkye la na, hpaji hparat gaw gat sa wa yang ra ai yawng gun sa na re. Ndai ram lusu nga ai tinang lamu ga ntsa kabye tawn nna hpa rai sum tsan naw marit chyai nga ra na rai ta? Simsa lam n'tsun ai sha asan ga garan sa ra sai. Anhte mung shawa yawng gaw dai hpe she myit mada ra sharawng nga ga ai.

N'dai ram zing rut htu, shagrawt shakre roi rip zingri sat jahtum ai jahtawng nhtu ai chyasam ni hte hpa rai naw bawngban ra na ta? Anhte shanhte hpe sa shut ai nre, shanhte lamu ga sa gabye gashun sha ai nre, dai ni laba lagaw hte annau ni shathpun hpe kabye sha-ga kau ya ai hta n'ga, nam masha tai n lung prat, kanoi htu prat de she du mat sai. Singgu krin byin nga sai kade majaw, ya hkyak hkyak UNHCR kaw nna tsin yam ni hpe garum wa na masa nga wa sai majaw gwi gwi hpyen man hpe hpaw saga. Annau ni ja ja grau ning hkap yang she garum mayu ai ni mung anhte bungli ladat hpe yu nna garum na re. Shaning (60) hkawt gasat wa sai hpe yu nna masha ni kam na grai yak ai tsan wa sai hpe dai ni gaw laklai nna gasat ai shaloi she yawng myit shang ai zawn garum wa na re. Annau ni hpe hkrai dasang gasat ai gaw grau hkrak ai, myen kade myit n'san ai, n'teng man ai re hpe mungkan na grau mu chye ai.

Maigan mungdan shara shagu du nga ai Chyurum ai myu sha ni yawng mung anhte sai daw sai chyen share shagan myu tsaw mung tsaw ning hkring ni ta tut majan gasat nga ai zawn anhte mung lu ai ten hpe manu shadan nna, tinang du nga ai mungdan ningbaw ni hte UN rung ni de sumtang laika matut manoi bang ai, nbung sinat law law gap ra ai, mahkrun ang ni hpe n'gup ga hte law law tsun sang lang ninghkip n'gun madun ai zawn ta tut sak ap nawng nna majan pa hta shakut shaja nga ai ni hte mu gun share shagan ni yawng a matu ten hpring kyu hpyi ya ai, ja gumhpraw garum na hpe ja ja matut shang lawm ai hte shawng lam de sit sa ra ai zawn shawng na hta grau shakut grau sak jaw ra sai. Annau ni prat hta Karai Kasang jaw ai myu yawng a labau jaw ai lit hpe nhprai ga.

Shanglawt nlu dingsa gasat na, lagaw hkang hpe yu nna shawng de matut sa ga. Nau shawng manawt ai de hkan nang ai zawn hpang na kashu kasha ni chye hkan u ga. Awm Dawm Shanglawt majan hpe gasat ga.

Baren Numraw