MALI HKA NU N HTANG HKU LWI YAWNG NA HPE N RA AI NI

Myitkyina, Shatapru:- 31-3-2012 Bat (6) ya.

Mali hte Nmai zup madim hte seng ai masing hpe Gumsan Magam U Thein Sein a aming hte dawm jahkring kau sai rai tim, nhtoi 6-3-2012 ya shani kaw nna Asia World Company hte Miwa CPI Company ni bai shamu shamawt hpang wa ai lam nga ai sha n-ga, Jinghpaw Mungdaw Asuya Wungyichoke Lajawn Ngan Seng a aming hte Tanghpre mare masha Kahtolik Mama du hkra, rim hkrum ai manghkang byin pru wa sai.

Daini nhtoi 31-3-2012 ya shani 10:00 a.m hta Shatapru Kahtolik jawng wang Gawknu kaba hta myitsu salang marai 150 daram du zup nna Mali-Nmai Zup Madim hpe ninghkap ai zuphpawng jawm galaw lai wa sai. Machye machyang rawng nna mungdan hpe gaja wa makawp maga mayu ai myitsu salang ni marai 19 tup gaw, mungkan na ngang kang ai sakse sakgan hte hkrak hkrak madi madun nhtawm, mabyin sat lawat lam ni hpe sakse hkam let, madim hpe ninghkap ai mungga ni tsun shaga lai wa sai.

Grau nna, Amyu Thar Hlutdaw Salang rai nga ai Duwa Jay-Yu-Wu gaw, ndai lam hte seng nna Asuya ni kaw hkrang hkra tsun adawt shakut ai wa rai nga ai. Kaga myitsu salang ni law law tsun shaga ai sakse hkam ai hta, Mali-Nmai Zup Madim a majaw, Jinghpaw Wunpawng buga hte amyu htunghking sha n-ga, Munghpawm Myanmar Mungdan ting a asak sum hten byak wa na re lam sakse hkam dan lai wa sai. Ndai daram law htam ai mungchying shawa ni si ru mat wa ai hpang, Miwa CPI ni bunglat hka wa na gaw, katsan ga na minla ni hpe sa jaw ya na rai kun? nga ma ai. Ya e pyi Tanghpre grupyin ginra na ru hti n dang ai sut rai nhprang ni shaw la kau rau masai. Matut nna shaning 50 ning madu la kau jang, anhte a mungdan gaw ntsin shup la kau ai kumshu pa hte bung mat na ga ai, nga ma ai.

Nnang nawn kaba hkam lu hkra galaw na ga ai nga nna CPI ni tsun ai ga gaw hkam dahka n nga ai. Miwa hta hpaji grau kungkyang ai Japan ni pyi nnang nawn kaba a majaw, nuclear jakrung baw kayun nna jamjau hkrum sha lai wa sai. Mungkan e, Brazil, Pakistan, India, Miwa mung hkan e law law lang hka madim baw ayai nna masha mun sen si ru ai mahkrum madup ni adan aleng mu mada lu nga ai. Anhte gaw n law la ai amyu sha ni ra ga ai.

Mali-Nmai Madim kaw na amyat a 10% lu sha na gaw, mungshawa n rai; lachyawk mi re ai masha ni she rai ma ai. Ngam ai 90% hpe Miwa ni shaning 50 chyup sha kau na rai nga ai. Miwa mung e hka shi hka nu hkying hku nga jawng taw nga ai. Dai de wa galaw lang mu ga. Anhte a buga e anhte pyi n mai nna n galaw ai she re. Anhte ra kadawn mu nna anhte nan galaw yang 100% yawng akyu hkam la na ga ai.

Karai Wa hpan da ai bungli shingra tsawm htap ai lamu ga hpe shinggyim masha n jahten u ga. Sinbo lawu na Mali hka gyip gaw, gyip ra ai majaw she Karai Wa shagyip da ai re. Dai hka gyip hpe adawt malawng kau yang, sanghpaw kaba ni Myitkyina du hkra lung lu na hte, Miwa hpaga rai ni n dut n dang htaw shalet lu na re lam tsun ai hpe hpaji n rawng ai Myen Hpyendu ni kam lai wa sai re. Gaja wa gaw, dai hka gyip adawt malawng kau jang, Myitkyina pa gaw lagyawng hkaraw kaba byin mat na re. Karai Wa galaw da ai amu hpe jahten na galoi n myit ga. Shatsawm jahtap bau rem makawp na sha myit ga, nga ma ai rai.

Ka shana ai:- Mar Mar Kaw