BAREN DINGHKUNG NTSA NA MANAU SHADUNG (V)

Jinghpaw Wunpawng sha ni a Htunghking Manau Shadung hpe baren shingma ntsa e jung nna galaw ai lam gaw, labau n nga ai maka kumla rai nga ai. Baren ngu ai gaw Miwa ni a htunghking hta she nga ai. Jinghpaw Wunpawng sha ni hpe sinpraw maga na baren numraw kaba gumtsawn sa nna agrawp mayu sha kau ai lamik kumla hpe shapraw ai kumla tai wa sai. Dai zawn htunghking manau shadung hpe baren numraw hta sharawt jung da ai mu yang, mungchying shawa yawng myit kaji garen yawn madai hkrum sha nga ga ai.

Baren lapu ngu ai hpe moi na jiwa ni gaw, ‘na’ ai hku sawn la ai. Yawn hkyen tsu lamang hta she lang ai. Dai lachyum n sagawn yu ai sha; chye chyang ai myitsu ni kaw n san yu ai sha, myi di chyip marai langai lahkawng a myit shadang nna galaw ai gaw, amyu sha ting hpe awu asin jashawn ai lam ang wa sai. Hpa n chye ai ni chyawm gaw, jaw ai she shadu kau na ma ai.

Jinghpaw Wunpawng sha ni a ningpawt ninghpang Uma ga rai nga ai Mali Hkrang Walawng ga hta gaw, moi shawng de Mahtum Mahta ni jaw dat ai sharung kungdawn nga wuloi ngu ai “Nga Shaga” ga chye shaga ai wuloi “Wuhpaw nga” hpe Hkasha Uma ni nga ai Nbuhkang Tingrawng Ga e ju sha sai. Dai Nga Shaga Rung hpe, daini du hkra Hkasha ni a sutdek hta kyem rem da nga ai rai nna, dai Nga Shaga Rung hta Manau Shadung maka nan kap taw nga ai re. Anhte a htunghking npawt, Manau Shadung maka ningpawt gaw, Dai Nga Shaga Rung hta kap ai maka she re. Dai maka hta baren n lawm ai.

Ya ten hta anhte a buga mungdan kata e n ngwi n pyaw byin nga ai lam chye ninglen, lamik n htuk n tsawm n kaja ai kumla maka madun nna, anhte a Sut Mungdan hpe baren numraw kaba e agrawp mayu sha na hku kumla shapraw ai. Anhte a mungdan kata na sut rai nhprang mahkra atsai awai shaw la kau ya ai. Hka nu hka gam hpe madim kaba pat nna amyu ting hpe sa-ap kau na maw mawn shangun ai. Baren n-gup mahka tawn ai hta, anhte yawng hpe mayu ma-ut kau na kumla madun ai. Maka n kap ai lai shapraw nna, tinang mying pru arawng lu na lam; sumbu bawng na lam, mayun kumhpa sake manawn sha lu na lam gyam ai sha rai nga ai. Hka shawn hka hku de tinang a maza tsing bang ai hte bung mat sai.

Dai re majaw, lamik n htuk ai lailen gaw, galaw kau sai hpe mung bai sharai, len la nna galaw jat na maw mawn nga ai ni mung bai shabai; htawm hpang kadai mung n shut lu hkra shadum jashai, hkan sa shut kau ai ni mung myit malai; amyu sha ni shawng lam galu kaba na de n-gun awai la saga, ngu Jinghpaw Mung Uma, Mali Hkrang Walawng ginra na yu hkrat wa ai Jiwoi masa, Shadung maka, numhtet numra, ndau shana dat ga ai law.

Duwa Bawmwang Ja Yaw
JHG Ningbaw, Myitkyina
10/4/2012