BAREN DINGHKUNG NTSA NA MANAU SHADUNG (DAW II)

Mungkan ntsa shanu nga pra ai shinggyim myu baw sumhpa hta, Jinghpaw Wunpawng myu sha ni chyu sha “Manau” ngu ai htunghking hpe lu nga nna, dai manau nan, mungkan ting hta hkik hkam laklai dik ai htunghking langai rai nga ai. Manau htunghking majun hte maren nga yang, “Manau” ngu ai gaw, moi prat na jiwa ni Lamu Madai hpe jaw jau ai lailen kaw na byin tai hpang wa sai. “Majun” ngu ai chyawm gaw, htunghking langai ngai byin tai hpang ai laksan npawt mabyin gindai hte, dai hpe matut n di tsun hkai ginlen kyem hkrat wa ai labau rai nga ai. Majun n nga ai lam mahkra mung, kaman li la sha rai nga ai.

Daini anhte Jinghpaw Wunpawng sha ni hkan sa nga ai Manau Htunghking mung, shi a majun hpe n hkan jang, sawt ai htunghking, kam mara htai lai mai ai htunghking, loi hkring shamat kau chye ai htunghking byin mat na hpe tsang ra ga ai. Grau nna gaw, lai sai mali manga ning daram kaw nna, moi na jiwa ni a Manau Htunghking Majun hta n rawng ai hku nna, Manau Shadung hpe baren shingma (dinghkung) ntsa e jung ai lai len mi galaw pru wa ai hpe mu lu ai.
Baren ngu ai gaw lapu kaba rai nga ai. Moi prat na Jinat htung hku mi rai rai, daini na Hkristan makam masham hku mi rai rai; “Lapu baren” ngu ai gaw, n kaja ai kumla, nhtan shai ai kumla, sharu shatsang ai kumla, tsinyam tsindam kumla, si hkrung si htan kumla she rai nga ai. Moi na jiwa ni a jinat htung lailen hta, lapu baren sumla hpe lawu na hte maren lachyum shapraw nna akyu jashawn lai wa sai lam chye lu ai.

1. Moi nat jaw prat na Jinghpaw ni gaw, masha si ai shaloi “Munghkreng mungkawng” ngu ai lamang hta sha baren maka ka lang ma ai. Si ai wa hte seng ai katsan ga na nat lamang maka rai nga ai.

2. Nat jaw prat hta masha si yang, kanghpoi hpoi ai ngu ai lamang nga ai. Dai gaw kabung dum ai zawn, masha wunawng mi nhku kata yan singgaw nna, woi awn ai wa tsun ai ga hkan tsun ai. Kanghpoi ningbaw wa lang ai sumdoi hta, baren sumla langai hpe mung kapyawn nna jum shalawm tawn ai. Shanhte gaw, si ai wa a hkrungnang minla ngu ai hpe hkan tam ai. Dai minla hpe nat satan e rim magra tawn ai, ngu ai hku kam ma ai. Shing rai nat satan a lata na si ai wa a hkrungnang minla hpe mu tam jang, baren sumla hte galai la ai lam galaw ai. Dai hpe “Bawnghkrang ai” nga ma ai. Bawnghkrang la lu jang she, si ai wa a wenyi minla hpe likpan ga (Sumsing htingnu) ngu ai de tsu shawawn ai lam galaw ai.

3. Dai zawn lapu baren sumla gaw nat jaw prat hta mung, si ai lam, na ai lam, yawnhkyen lam ni hta she lang ma ai. Pyaw kabu awng padang ninglaw lam, galu kaba lam ni hta n lang ai.

4. Laiza hte Nbapa e galaw da ai manau shadung yan gaw, mungshawa du salang hte n jahkrum yu ai sha, marai langai lahkawng a chyoi n shang ai lai hte baren shingma ntsa hta gaw sharawt da ai majaw, myitsu hkra lep kawng hkyeng sai ni grai tsun garu ai lam nga ai.

5. Ya hpang e bai gaw sharawt na maw mawn ai manau shadung ni nga yang mung, dai zawn n galaw hkrup na hpe ja ja shadum dat ai. Langai lahkawng a majaw shut kau ai lam gaw, law law hta machyi hkrum wa chye ai. Yubak dingnye hkrum sha chye ai hpe dum ra ga ai.

Dai re majaw shawa hte seng ai, amyu ting hte seng ai, aloi ali shaprai n mai ai bungli kaba, amu kaba galaw na rai shagu, atsawm bawngban yu nna, maihkrau maidau, htingyu htinglun myit shakup shatsup nna she galaw mai nga ai ngu ga kumhpa garan kachyan dat nngai.

Duwa Bawmwang Ja Yaw
Shatapru, Myitkyina
8 - 4 - 2012