Myen asuya gaw hpang lam bai n'htang sai nga tsun garu nga tim hpyen dap gaw hpyen masa grai naw shaja nga ai hpe yu yang daru magam ahkaw hakang hpe maga mi de bai gare jum wa na zawn rai nga hta n'ga, Democracy tara ladat nre ai hku maga mi de hkum shing dang nga ai. Ga shadawn, wanglu wanglang ntsun shaga lu ai lam media shadawn shadang masat tawn ai, ninghkap n'gun nmai madun shi ai, ya hkyak hkyak shanhte a hka jaw poi kaw yu ngwi ninghkring ni law law hpe pat ai, hkauna lamu ga zing ai manghkang tara dawdan hparan ai hta arawng aya gum hpraw yu ai, tara hkungga ai lam n'nga ai. N'san ai hpaji hku manai makai ladat hte je yang ai. NLD a lata hkrum ai Rapdaw Salang byin wa na ni ga shaka hkam la ai shaloi mayak nga nga malu ai, 2008 ning gawda ai tara hpe n'ra ai majaw 2010 ra lata poi hpe ninghkap lai wa sai, ya mung dai 2008 a gawda ai tara hpe hkunga shatup hkan sa na ngu ai ga sadi ga shaka hkam la ra nga ai gaw rapdaw lung na n'lung na masa kaba langai rai nga ai, de majaw Awng San Suu Kyi hte Thein Sein yan mayun hkrum bawngban yu ai masa pru ai.Democracy mungdan ni sinna dan ni hkungga ai Awng San Suu Kyi hpe htawng madun nna grau nna, pat tawn ai ni yawng hpaw ya lu hkra hte, shazim tawn ai masa sha pru nga ai ngu mu ai. Hpa majaw nga yang RGN MDL mare kaba hkan pyi bun 3 kaw na 1 mi sha simsa ai ngu tsun lu ai, mu gun masha ni hta mung lawu tsang masha ni gaw ya du hpyen gum shem prat na zawn naw up hkang sha hkrum nga ai. Bai hpyen dap kaw na pru nna mu gun nga ai ni yawng gaw mi na zawn aming hte adip arip up hkang sha mayu ai ladat naw lang ai. Hpyen dap mung, u shoi n'nga ai hku shi ra hku dumbre hkawm ai. Tara hkungga ai lam n'nga ai. Rapdaw hte hpyen dap gaw sau hte hka zawn rai nga ai.
Democracy hkrang hku mung shawa hpe kanu kawa hku hkungga ai hte maren mara mahku mara sa wa na matu agam ai, ahkaw ahkang nkam jaw ai, shara nkam jaw ai, dai gaw myen a kata kaw yak kaba rai nga ai zawn, maga mi de mung Democracy tara hkrang hku kalang mung grai n'hkan sa yu ai, grai n'hkam sha yu ai, democracy namchyim masa hpe n'mu ga n'hkam sha yu ai ni she ya ten myen hta law taw nga ai, hpa majaw nga yang tsa ban kaang hkup gaw hpyen gumshem ni up hkang ai kata kaw dip gamyet nna sak hkrung lai wa saga ai, ya na ma ni gaw Democracy nga hpa re pyi n'chye ai ni she law nga sai. Dai gaw myen a shawng de htawt sa wa na mung masa ninggam a mayak kaba rai nga ai. Rawt jat dik sai mungdan democracy a tara kanu ni ngu tsun mai ai mungdan hkan pyi democracy tara kata kaw nchye nga ai majaw mang hkang kaba naw nga ai re.
Sam ga malai langai nga ai, “man sawngkaw nya gan byin poi, Tai sawng kaw nya gan byin hkoi” nga ai, myen 2 hkrum hkat jang poi zawn byin chye ai da, ga shadawn myen 2 hkrum jang masha law law shang ai poi hte bung ai da n'gup bawlaw ai masha she law ai. 8.8.1988 hte 2007 ning na ninghkap n'gun madun ai gaw myen mung ting hpe lu gaup sai daram re, rai yang poi sa ai masha she law ai. Dai hta n'ga masha law yang she majoi garu grang masu nna, langai ngai loi machyi wa jang sadi run ai madu ningbaw ni hpe sadi hpyen dut sha kau mayu ai masha she law ai, Ritkawp tara hkungga ai masha n'nga ai, hkam sharang hkat ai, magyep kap hkat ai lam n'nga ai hpe mu lu ai, masha a ahkaw ahkang hte Democracy tara masa hpe n'chye ai myit nawn na ai gaw mayak mahkyen rai nga ai. Dai ni tim NLD hte Democracy masa mung shawa a lapran hpe grai naw la yu ra ai.
Hpyen gumshem aming hte gawda ai {Chyan Hput} party mung arawng aya ra ai hku nmai jai lang wa ai a jaw nru nra byin wa nga ai, lekap wawkap re masa pru wa nga ai ten rapdaw kata malawng rai nga ai hpyen dap hkridun Salang ni myit ashun shajang nga ai zawn hpyen dap gaw shi a ahkaw ahkang aya ginlut wa na zawn rai nga sai masa hta hpa byin wa na kun? Shing du n'gayin sai ngu tsun lu na kun? Masa lam n'hkrak jang hpyen dap kaw na galoi na ten hta mung daru aya mai zing ai nga gawda ai tara hta lawm ai hte maren myen a n san, maw lanyet pahkam hpe tau maram yu ga.
Dai ni annau ni mung Tinang Mungdan up hkang Tara masing hpe grai shen yu nna shagrin tawn ra nga ga ai, masha hte masa hta hkan nna tara hkrang hpe gaw tawn ra nga ga ai. Democracy Tara nhkrak a ni? Hkrak ai, tim annau ni yawng n'mai la ai, madang hte htunghking ngasat ngasa hpe maram yu ra ai. Communist Tara n'hkrak a ni? Hkrat ai, tim yawng nmai la ai, annau ni hte htap htuk ai hpe la ra ai, sutlu ngamai ai mungdan masha rai nga nna sutgan kata masha, gara hku mung n'mai byin ai hte, Karai masa tara hpe mung yu ra ai. Dai majaw annau ni a Htunghking ngasat ngasa makam masham madang hte bung ai jiwoi jiwa ni a tara hpe mung lakap nna du nga ai prat masa tara masa hpe yu la gyin shalat la rai nna sa wa yang kaja na re. Party tara law law up hkang ai masa hta grai nmai sa shi na re. Yawng bungprung pru ma na, masha sawle tai mat na tsang ra nga ai. Dai majaw party tara masing langai a kata kaw up hkang nna sa ai hkrang hta she grau kaja na re. Democracy mungdan Communist mungdan langai ngai hku grai nmai sa na re. Rapdaw langai tara masing langai hte sa yang she naw htap htuk na re. Ya ten rawt malan ten, le zawn zawn maw zawn re myit hkrum shabawn ai hpe hten sharun ai masa tara hpe koi kau ga.
Media gaw mungdan gawgap ai hta ahkyak dik ai lamang masa langai re. Shimlum shanglawt na a n'gun kaba laknak kaba hte bung ai zawn tara masa yawng hpe shading sharai ai gram lajang numshawn shaw ya ai, jet ai n'sam namnak hpe shen ya ai htawn ya gyin shalat hpang ya ai jak rung kaba hte bung ai. Jaw ai teng ai tara ai shiga ni hpe len shalai gyin len matut ya ai hka hpawk hkanu zawn ya ten annau ni a matu ahkyak dik ai majaw, ya ten annau ni grau nna jai lang akyu jashawn ra dik nga ga ai.
Shimlum ai tara kata kaw rau sha shawng de Shanglawt sa ga.
Baren Numraw
0 comments:
Post a Comment