Mungkan a rawt jat galu kaba nga sai prat madang hte masha a ngasat ngasa shamu shamawt madang lani hte lani tsaw jat galai shai lawan nga ai ten, shinggyin masha ni a myit masa ningmu grai tsaw jat, myit masam sa jat sai ten hta, mung up tara masa mung yet yet galai shai nang nga ai zawn, shinggyin masha ni hte nyi htep dik ai tara ritkawp ni hpe gyin galai gram lajang nga ai ten, shinggyin ahkaw ahkang hte lu gin ai shimlum shadawn shadang atsam hte bung hkra daru mung up hkang tara masing hkrang hpe htuk manu dik ai hku gram lajang nga ai ten re.
Dai zawn re ten hta hpyen gumshem daru magam up hkang hkrang hte, up hkang ai hpe gara mung shawa mung, n'ra sharawng sai hta n'ga, mung shawa yawng madi shadaw ai lam n'nga sai. Lachyawk mi sha re masha u hpawng a matu sha akyu nga nna, lahta tsang hpyen du kaba ni sha sali wunli hpring hpring sutlu ngamu ngamai pyaw nna, lawu tsang mu gun ni hte mung shawa dawtsa gaw matsan ai hta grai matsan, lu na sha na, bu na hpun na pi n'lu, lani hte lani jan pru ai kaw na jan du lup mahki mahkat n'ji n'mu tam tim shat da mi hkru sha na pi nloi nga ai. Gumshem share shatsang dangsha dip roi sha hkrum ai, mayam zawn galaw shangun ai. Laknak hpai nna jahkrit shama hkrum ai, dai gaw mung shawa n'gun kaba hte gumlang ninghkap na masa hpe shapraw ya ai, mungkan hta madang n'nga sai, kadai mung n'hkap la gwi ai, tara rai nga sai. Gumshem tara hte up hkang sha ai madang n'rai sai.
Dai ni myen asuya kata dai zawn re myit rawng ai hpyen du kaba ni rapdaw kaw malawng maga sha naw adung nga yang ganing rai nna, myen mung asuya gaw simsa ngwi pyaw ai de gara hku mung woi sa lu na n're. Bawsang ni ra awng sharawng ai madu mungdaw up hkang masa n'jaw ai, mung hpawm masa n'shapraw sa yang galoi du tim pyaw na n're. Panglung ga sadi hpe kalang bai mahta nna n'shagrin tawn lu yang, galoi mung anhte bawsang ni hte majan zim na n're. Mung hpawm hku mai sa na n're. Prat madang masa hta hkan nna myen mung asuya gaw jan du sai, jan shang sai, asak htum sai ngu sadi jaw nga sai. Madi madun nga sai. Thein Sein mung hkang kawp lahpaw tai nga ai, lum nai re majaw hkrat sum chyalu re. Asian rapdaw kaw annau ni hpe lani jan hta sha gasat shamyit lu ai, kasu kabrawng hpung nga nna, tsun nga dingsa Thein Sein mung gumshem magam re asan sha chye mai ai zawn, Aung San Suu Kyi hpe lau la nna mungkan hpe madu ra ai de gang gayin lu hkra kale galau, shu myiman palawn myiman shapraw nga ai. Pat tawn ai lam lu shaprai hkra shakut nga ai masa sha pru nga ai re. Kata lam sung sung li li dinglun yu yang asan mu chye ai. Simsa lam bawngban ai ni mung masu n'dum kaba ni sha re, annau ni a lamu ga de majan byin nga ai, hpa byin ai re Thein Sein asuya nchye ai, simsa bawngban na masing n'jahkrat ai, hta hkrup ga tsun shing jawng hkat ai masa shapraw ai hpe yu yang anhte bawsang yawng hpe mana shachyoi ai, hpa n'sawn ai. N'dai zawn re annau ni gara madang hta tsang ra sai yawng myit dum na sai re ngu mu ai.
Lawu de na ngai sawn mu ai hpyen masa ni hpe mung chyawm dinglun maram yu ga.
1-Myen hpyen dap kata kaw shawng lam majan pa de n'kam sa ai, majan n'kam gasat ai lawu tsang du ni hte hpyen ma ni grai law nga ai. Majan n'kam gasat ai majaw htawng rawng ai grai law nga sai.
2-Munghpawm myu sha shada maigan hpyen zawn gasat ai hpe n'ra ai majaw shawng lam majan pa nkam sa ai majaw hpyen la law malawng tara je yang hkrum ai, hkyuk rawng ai, dap hprawng ai. Dap kata shada ninghkap ai.
3-Democracy simsa marawn nga ai ten, simsa ngwi pyaw lam shingran mu nga sai ten, yup mang mu yu nga ai ten, tara n'lang tara hkungga ai masa n'shapraw ai hpyen gumshem ladat naw lang nga ai hpe ninghkap ai hpyen la law wa ai, majan n'kam gasat ai. Democracy tara hpe madi shadaw ai hpyen la grai law wa ai.
4-Shabri shabra n'law sha ai, shabri shabra jahkut sha ai, wa lang gale ai, bungli lale ai, matsan dinghku law ai, shawng lam majan sa na atsam n'nga ai, myit marai n'nga ai, myit daw ai. Majan nkam gasat ai.
5-Lahta tsang du kaba ni hte lawu tsang du kaji ni hte hpyen la ni a lusu matsan n'bung ai, mung up masa gaw democracy asuya nga nna hpyen dap kata kaw hpyen gumshem ladat tara hte up hkang hpe nra ai hpyen la grai law ai, dap nkau mi dap nawng ninghkap n'gun madun nga sai. Majan sa na masha pyi n'nga ai daram byin nga ai.
6-Shawng lam majan sa ai hpyen la law malawng si ai hkrung ai, shiga n-na ai laning mi du ai ni mung nga wa sai hta n'ga, hpang lam madu jan kanu kawa jinghku ni hpe shiga ip tawn ai majaw manghkang kaba byin nga ai. Dap kata n’ru n’ra kasu kabrawng numma dap ni ninghkap nga sai. Majan n'gasat na ninghkap nga sai.
7-Hpyen dap law malawng numma ni sha sin ai dap law ai, sak kaji hpyen la law ai, mahkrum madut n'nga ai, shawng lam majan hta si ai law ai, hprawng ai law ai.
8-Myen hpyen la ni hpai ai sinat law malawng shaning asat lai ai dingsa law ai. Atsam shadang n'hpring ai laknak law ai. Gap ai shara mi, du ai shara mi re majaw, hpyen la hpyen hpa awn ni myit daw ai, hpyen sum ai law ai. Machyu pala manghkang byin ai, shadang n'nga mat sai majaw majan nkam gasat ai hpyen la law ai.
9-Kanu kawa n'mu n'pru ai lam ntsa hta la nna, asuya bau maka la ai hpyen la law ai, hpyen dap hpe sha kanu kawa shadu ai hpyen la ni dusat myit sha rawng ai, dusat zawn galaw ai, hpyen ma ni a jaw tara hkungga ai shinggyin myit rawng ai myen hpyen la shada n'ru n'ra n'htuk n'htak byin ai. Majan hta manghkang kaba byin hkrum ai majaw hpyen sum chyalu re. Majan nkam gasat ai hpyen la law ai.
10-Lamu ga masa n'dang ai, mayam hpyen la hte bung ai, madu gasat nga ai majan gaw n'tara gasat ai re hpe chye ai majaw myit masa hkrat sum ai. Bawsang ni madu mungdaw up hkang ai masa hpe ra ai hpyen la law ai, aming shaprai pala lawan ma hkra majoi gap nna, hpang lam lawan lu n'htang hkra ladat tam ai. Madu hpyen du ni hte kanawn ai gaw grau hkrit hpa re ai zawn anhte bawsang ni hte hkrum ganawn hkrup yang grai si manyi ai, tsaw ra myit jet ai mu lu ai, madun ai hpe mu nna majan grau n'kam gasat ai. Hpyen la ni hpe rawng tawn ai u zawn htawng bang tawn ai zawn mung shawa hte n'ganawn shangun ai. Dai gaw myen asuya hpyen dap a kaba dik ai hkrat sum lam rai nga ai. Madu makawp maga nga ai madu kanu kawa mung shawa hte n'ganawn shangun ai gaw myen hpyen dap gaw hkrat sum kaba jan du sai ngu tsun lu sai. Mun jan hkala hkrum ai, hkying kaba si sai, hpyeng hprawng hprawng ai, htawng rawng ai, hkyuk rawng ai, tara je yang hkrum ai hkying lam rai nga sai hte myen hpyen dap ni dumbru dumbra n'ru n'ra byin nga sai ten hta annau ni n'gun kaba shadat dat yang n'htoi du sai. Padang dip la na mahka sha rai sai.
Ya ten annau ni ja ja grau gasat yang gaw Shanglawt gaw teng lu na rai sai ngu mu ai. Mungkan mungdan shagu hte Miwa mung, Kala mung hta shanu nga ai tsaw ra dik ai Chyurum sha ni e. Shaning galu dip sha ai myu shamyit ai roisat ai chyasam hpyen gumshem hpe chyawm gasat shakre na ten du sai. Myu tsaw mung tsaw myit chyawm madun na ten du sai law.
Lu ai atsam htum myit hkrum gumdin nna rau gasat saga law... Shawnglawt... .
Baren Numraw
1 comments:
Jing paw mung hte Sam mung hpe shang last Lu hkra gasat la n Na . N dai Myen ni hpe gawt kaw ga law. Dai hpang United Kachin ngu NA ah the a mung dang ning nan BA I gaw de sa WA GA law ngu n gun jaw mayu AI .
N ndai jing hpaw mung kaw nga ai
myen ni a air port hte base ni yawng hpe ma naw zing kau RA nga AI,
Post a Comment