MATSUN

KIOCC kawn matsun wa,
Lusha gam kyu hpyi ga nga;
April 2 kawn 3,
Suya Dap shagu shagum;
Ya ten Wenyi majan tai,
Kyu hpyi grau shagreng ra sai;
Tai ni masin nsi ai,
Kachin hpe atsai awai;
Manai anut kau masing,
Laknak hkum dingnum jahting;
Laknak kaba myit n dik,
Tsu numla nat hte lasik;
Ahtetlann Outlann ni woi sa,
Kachinland ting she chyam hkra;
Chye ai hpaji yawng hte den,
Sari n dum hkra shachyen;
Anhte kyu grai hpyi majaw,
Shanhte myit ai n byin hkraw;
Raitim, yahte na majan,
Hkrit makran na zawn she san;
Tinang pala tinang si,
Tinang bawm hte tinang di;
Mabyin ni hpe sawk sagawn,
Tsadan lusha shawng bang tawn;

Tsadan lusha sama kaw,
Tsu numla ni shang dagraw;
N dum n dam rai mat jang,
Tinang hkum tinang sha-ang;
Sinat hte gaw gap si wa,
Bawm hte gaw kapaw yai wa;
Kabring kabrawng sai gamawng,
Tsadan nat ni gaja awng.
Marku 9:29 hta, Yesu tsun ai;
"Akyu hpyi ai hte sha n rai yang,
Kaga hpa lai ladat hku mung;
Ndai baw nat hpe,
N shapraw kau lu na re." Nga ai.
Dai majaw,
Ndai lang majan dinghku,
Wenyi majan lachyum pru;
Tsadan hte Karai gasat,
Lusha gam kyu hpyi shajat;
Kachin dang na kam sham ga,
Kam sham myit gaw dang ai....da.
Marku 9:23 hta, Yesu tsun ai;
"Kam sham ai myit
Rawng ai wa a matu,
N mai byin ai lam
Hpa mung n nga ai" da....yaw.

Shanglawt Tsing
(2.4.2012,4:00Am)