La kaba, myu kaba, tara lang ai, teng man ding hpring ai, sari sadang rawng ai, myu jet ai masha baw sang rai yang hparai saboi n'tsa mungkan yawng chye hkra gwi gwi nmai bawngban ai? Anhte lamu ga n'tsa lagaw katsing hte shang kabye manau, annau ni a salu salat hte, n'gun dat nna lu ai ja gumhpraw shabri shabrai hpe sha nna hpa rai annau ni hpe gwi lagut daru zawn, ya dai ni wanleng lam hkan ai gwi shatam hpe wa, jinghku kaja, manam kaja shadu nna shat jaw sha shut ai madu hpe pyi n'chye ginhka ai gwi tam ni a jaw annau ni shinglang makret katut zingrut htu roirip sat hkrum myu shamyit hkrum saga ai.
1990 ning NLD Aung San Suu Kyi ni ra lata poi hta, 93% dang wa sai tim mungdan shimlam simsa lam n'nga shi ai nga ninghpai masu nna duru aya n'jaw ai. Than Shwe hpyen dap kaw nna daru aya matut magra jum kau ai hte, shwe dagon sinpraw lakang hku hkaw hkam hkinghku hkum, salung sala mudaw matdaw wunji wungang mihpaya ni hte rau, manap jau jau hpung kyi kaba ni a lata hta prat ningnan myen mung a hpyen gumshem hkaw hkam aya hpe dang la sai re. Prat dep hkawhkam langai mi a nga ging ai sari sadang ahkaw ahkang ripkawp tara n'chye ai, hpawdam hpawlam, lam ntsa na darat daroi yu maya la nga masha hkaw dung yang me, hpa byin wa na kun? Myit yu yang mu chye mai ai. Jawngma ni NLD Aung San Suu Kyi ni hte nkau mi hpe bawngdung rim sharawng, nkau mi hpe dum n'ta sharen da ai. Dai kaw nna jawng ma ni satnat hpai rawt malan hpang sai re. 1988, 8, 8 Jawngma ni n'gun madun ai ten hta anhte rawt malan hpung ni KIA hku nna htim gasat zing madu nang wa yang shanglawt mai lu ai ngu hpaji jaw ai salang ni nga ai raitim Du kaba n'kau mi gaw myit n hkrum ai a jaw, shanglawt na hpe myit malai wa yu saga ai. Dai kaw nna annau ni a, gyinra de sanat mahku ngoi shagu hte gasat poi byin shagu mare masha ni hpe a'dup a'jin zingri ai. Numma ni hpe shinggin roi ai dum nta kata na ja gumhpraw arung arai sha n'ga, Num ni bahkang n'htu hpatung ningwa, di mala kaw na hkawt, yawng myen ni la kau ya ai. Shanglawt hpe bau ai rai ni re nga majoi magoi lakau ya ai. Dai hpang kaw nna hpyen gumshem hkawhkam Than Shwe hpyen ni gaw baw sang amyu shamyit shamat masing kaba 4 [hpyet 4 hpyet] hpe jahkrat nna asan galaw hpang sai.
1- Myu shamyit shamat masing .
2- Makam htunghkying laili laika Ga shamyit shamat masing.
3- Hpaga bawgring rawt jat galu kaba pat shamyit shamat masing.
4- Malu masha matut mahkai dandi shamyit shamat masing.
N'dai ga baw a n'pu kaw lamang lakying grai law nna mahkrun tam masa hta hkan nna, anhte myu sha bawsang ni hpe atsai awai shamyit kau na ja ja galaw wa sai re.shawg ningnan myu gajau myu shada ga garan hkra kalaw ai mare kahtawng gawt gahkyin kau ai. anhte buga na mare law law hpe gahkyin kau ai. Shingrai prat shanat nga lai wa ai dum n'ta ni hpe ten kadun run kabai kau da ra ai, hpalap sun namsi namsaw sun yisun hkauna dusat yamnga yawng hpe dam kabai kau da nna, hpun kawa shangu tsan ai gangbang pa daleng kaw ginsum yihkyep kaji gap rawng shangun nna, jahkrit shama garen gari rai lusha n'mu, yup n'pyaw, duhka nawng de hkindit kanawng bang hkrum saga ai. Hpangde kring mading re dum n'ta bai lu gap rawng na n'loi mat saga ai . Matsan n'hkun, zingrut htu ai kaw na ,lawt pru lu na n'loi sai. Myen a dip matsan hkrum ai madu mare dingsa ni de nga tam shan tam sha na matu bai wa tim shanglawt hte matut ai kinyu re nga gyit a'dup zingri htawng bang, numma ni simai simaw tam sha sa yang mung shanglawt hte matut ai shang lawt jan re nga, majoi roi , n hkam lu na daram hkam sha ai.Dai zawn myen mung hta n'gun ja dik ai, law dik ai, kaba dik ai, kaichyan dap ni hpe jai lang nna bawsang ginra de shamyit shamat na shang wa ai.
Dai zawn re ten hta myen a shangun sha hkrum ai, hpung sara kaba n'kau mi ja gumhpraw hpe sha yu ai myitsu n'kau mi jaw KDA-NDAK -Du kaba Zahkung Ting Ying hte Du kaba Mahtu Naw yan gaw kanu KIA kaw nna ran pru myen kaw laknak jahkrat mat nna, myen a shingnan hpyen hpung galaw mat ai. KDA, NDAK Du kaba nkau mi hte hpang hkan nkau mi gaw madu a lu lawm lam kanwang bungli machyu nna miwa lauban ni a ja gumhpraw hpaji arang kaba hte kani hpraw dut shadu ai bungli ni hte mung shawa nkau mi hpe mung kani sun galaw shangun nna makawp maga ya ai. KDA-NDAK Du kaba ni kasha, hpyen ma nkau mi, shanhte up hkang ai ginra ni hta kani lu sha ai grai law mat ai. Hpai dabang hpaw ai, miwa mung na tara n'shang ai gunrai len shalai sha ai, hpun kran dut ginlen sha ai, shawa num dap hpaw nna madu myu shada katsi majan gasat shamyit nang ai.dai gaw shan kata na byet kaba nan rai sai.
Myen gumshem hpyen gaw maga mi de jawngma ni hte NLD ni hpe rim rawng shamyit nna,maga mi de gaw anhte rawt malan bawsang ni hte simsa lam la na gabaw hte grit nyem dik ai masa kaba hte bawsang ni hpe jum jaw shanyi la nna u shoi dun lu hkra, magra kayin shangun lu hkra Hkring mang daju Khyin Nyun hpe marit nammak lawhpa lam law law ntsa de madun masu nna simsa lam la wa sai re, dai ten myen hpyen asuya gaw sut masa yak dik wa sai hte hpyen dap kata nru nra manghkang grai law nga ai re, dai hpe sawn yu nna rawt malan ni hte kara hku tim simsa lam nla nmai ai madang du mat ai, myen mung hkrat sum mahka gachyi mi sha ra nga sai ten anhte bawsang rawt malan hpung malawng simsa lam la kau ai gaw sum kaba nan rai sai.
1994 hta annau ni mung gaphkat jahkring masat htu kau ai. N'dai ten myitsu nkau mi gaw simsa lam n'la na hpaji jaw wa sai tim ahkyak n'tawn kau ai jaw katsi majan hta hkrat sum hpang na kum la ka shapraw la sai re. Ramma ni kani ya byin mat ai, shayi num sha ni shawa num tai ai. AIDS ana kaba annau ni buga de pang bang la lu sai. Katsi sat ai mawru gaw maroi n'nyi nsen n'ngoi ai du shang tim yawn hkyen myi prwi lwi nhtum na masa kaba hta myen a myu shamyit shamat katsi majan hta n'gun ja ai ramma law law hkrat sum sai. Chyurum ai myu sha ni e A Ka Law…, nga puk marawn garum hpyi tim kadai hkye la na ta? Annau ni a share shagan ninghkring nkau mi hpe mung mara kata tara shut ai lam n'nga ai kaw arum ara sat sharu ai, num ma roi ai, lamu ga zing ai, hkauhting hkauna hkai sun zing ai, Hugawng ga danai ga lamu ga eka sen lam zing ai, lawu ga na lagu lagut dut hpyi sha ai law law hpe anhte lamu ga de asuya gpumhpraw garum nna gawt bang ai, n'tara dik ai hku myen e dang sha tim kara hpung mung ahkyak n'la ya ai, mung shawa ni kamhpa shara madi madun n'lu ai ten re, masa hta ahtu hkra ai nga mu tim n'mu ai, na tim n'na ai zawn hpa rai nga kau ra nga ta? N'sun n'ang roi rip dang sha nga ai sawa myen ni hpe je yang na kadai hpe kam na, shawng lam myit mada shara n'mu nga ai. 2005 October hta kaichyan daju Khyin Nyunt hpung ni yawng hpe rim ai the ru nawng pawt nawng hpyen gumshem shada sat sharu hkat sai, dai zawn myen a sum prat katut ai wa kali latup bang hkrum ai ten shawng lam masing mat taw nga ai,jinghpaw mungkan gaw ashun wa ai, hpaji chye ai ni hte mala hka wa ai ten, myit n'su tim, n chye tim,madu a dai lup dai hpang, hpunhpang wa hpang kaji kawa ni dashi lamu ga n;sum mat u ga nga, myidi shim rai, asak ap nawng nna, myit malai myit hpe sharai, yawn hkyen myi prwi gatsut nna, shabai myit hpe n'gun bai awai la rai, n'ngut shi ai labau jaw ai lit, jiwoi jiwa ni a n'ngut shi ai rawt malan hkrun lam yi ngam hpe matut dating shakut na matu myu hpe sak hta grau tsaw ra ai Ningbaw nkau mi hte share ninghkring nkau mi gaw kalang bai htinggum kaw kridung la nna shamu wa sai ten, nkau mi gaw shat ngam gashun sha hkat nna nang shoi nang sha nga Kabun sha hkru ai shu chyit hte bung ai gaw bung rai, Lasang Awng hpung ni ran pru mat sai.
Ndai kaw UNFC hte seng nna loi naw sanglang dan mayu nngai.Du kaba Lahtaw Zau seng gaw hpunau kayin ni kaw nna masing kaba jahkrat nna, myu hpe hkye na matu, kayin hpyen hpaji sharin wungat sara ni, matut mahkai sharin sara ni hte rau shanglawt hpe hpaw hpang ai, de hpang hpunau Ta Ang [Ba Lawng] ni hpe anhte kaw na shalat ya ai, de hpang hkang hpunau ni hpe shalat ya ai, de hpang Rahkain hpunau,Hkang hpunau, Pa U hpunau, Kaya hpunau, Jawngma hpung ni hpe laknak shakap ya nna annau ni kaw na dinghku de ya htingbyen shapraw dat ai ni re, n'kau mi makam bung ai, n'kau mi makam n bung tin hkam la ai lam bung ai, mung masa hpyen masa pandund bung shajang ga ai re majaw ahkyak ten hta yawng myit hkrum chyalu re. [Tat Pawng Tsu] hpe 1980 lam yan kaw nna hpaw ninghtan let rau chyawm gasat lai wa sai re, kata lam gaw chye mai ai nga ai zawn shim ra ai mung nga na re. Hpa mi nga tim myen hpe rawt malan ai bung ai dip sha dang sha hkrum ai shada re. Bum nga masha ni re.
Annau ni a manu dawdan n lu ahkyak dik ai ya dai ni du nga sai. WP myu sha sa tai ai jet ai jahtawng htu ai,labau lit nga ai, shadang gaw tsaw dik ai shadawn shadang mahkret kaw du nga sai, chyurum ai hpunau ni e Na hkum Na NuWa Na jinghku, Na myu Na mungdan dai lup dai hpang ga hpe kade ram tsaw ra ai kade ram manu shadan ai hpe mahtai jaw na ten du sai. Na myu tsaw mung tsaw sai hpe chyam yu ra sai. Mahtai jaw ra sai. Anhte myit mada let la nga ga ai. Annau ni a hkrit tsang ra dik ai mung masa hpyen masa hpe asan mu chye mai na matu matut nna galoi du masu na? [IV] hpe chyawm dinglun nna mahtai tam yu ga.
Daw Dan U.......!
TEN DU SAI.......!
Baren Numraw
0 comments:
Post a Comment