Slideshow Image 2

GALOI DU MASU NA

Dum ladum hka yawng, chyahkyi a sau sau, nau tin yang gataw ai nga, sum tsan myit kaba, myi kaba, na kaba ni hpe ja ja li li ten tup myit shachyaw sawn dinglun sumru yu nna annau ni a mung masa hpyen masa numshawng  htawt sit na lahkam hpe ten hpring chyawm gyin hparan sa wa ra sai. Moi kaw na annau ni a hpyen ladat gaw [Taukawk a nta nawng] re masa hte sa wa saga ai re, rawt malan ten naw re majaw htawt loi, shamu shamawt loi re ladat masa hte hpyen majan hpe shamyit sa wa yang masam sa na re. Media prat du nga sai re majaw shiga gaw mungkan hpe branglang mu ai jahkring sha mai chyam bra sai re hpe chye ai ladat de du nga sai  hpe mung nmai malap nga ga ai.

             Ya hkyak hkyak myen mung de UN Amu madu kaba Mr. Ban Ki Moon du nga ai re, myen hpyi masu gaw munghpawm simsa lam tam hpung kaba hpe kalang bai hpaw ninghtan tawn sai nga, myen a da shatawt gatset sha chye ai, myit jasat kyang lai len hpe kalang bai madun masu sai, shiga ip tawn nmai, hting grum tawn nmai sai ten, myen galoi du masu lu na ta? Tinang masu ai sadi ndung ai marang a jaw dai ni du annau ni hte gasat ai, dinghku majan byin ai, bawsang yawng rawt malan ai, tiang kasha hpe du masu sharin ai jaw yup n'pyaw, sha n'mu, duhka hkrum nga ai hpe ya du myit malai nlu ai. Myen hpe sharin na malai nam na lagang woi hpe sharin ya yang pyi akyu rawng na re. Map sharin shaga ai sha madung sai. Moi annau ni hpe myen hkaw hkam wa tsun ga yu sai Jinghpaw chyazai ni hpe sharin la na malai n'bang kaw na nye gwi hpe sharin yang pyi grau chye loi akyu nga na re nga. Dai ni annau ni shanhte hpe kalang bai tsun sharin ra sai. Moi annau ni hpe gasat sharin ai shanhte madaw dai ni labau ngam nan hkra byin lai sai, [Gwi ran si chyawng bum--U hka kabu ra si bum nga] dai ni du annau ni shamying tawn sai. Moi mung annau ni madaw shanhte hpe sharin shaga wa sai zawn dai mung sinat hte prat tup matsing tawn hkra gap sharin gap shachyut kau ra sai. U loi a hkyi law, hpa shalaw re myu re hpe dum nna gwi gwi gasat ga.

1-Myen sadi n'dung masu lai wa sai.
Japan hpe sa grau la, English hpe gawt shapraw, kalang bai English hpe sa grau nna Japan hpe bai gasat gawt shapraw kau rai n'hti n'htang sadi n'dung masha law law a asak hte ja gumhpraw arung arai laknak law law hpe gaman lila masu gayin jasum sha lai wa sai. Dai ni Japan gaw myen hpe hka wa mana ra nga ai re. Dai zawn gasat shamyit hkat ai hta annau ni hte bawsang ni gasat lawm ai majaw munghpawm myen mung ngu byin wa ai re.
2- Bawsang ni hpe namlak namnyan shachyai masu ai.
Aung San hpung ni gaw anhte bawsang ni hpe jahkrup jahkra ai lam n'nga ai, English hkaw hkam hpe myen mung shanglawt jaw na lam sa hpyi sai re raitim, English hkaw hkam wa gaw nanhte shanglawt sa hpyi ai hpe bawsang yawng myit hkrum ai kun? ngu bai san yang Aung San hpung ni gaw hpa bai nchye htai ai majaw  bawsang ni hpe wa bawng jahkrup na bai wa sai re.
Anhte bawsang ni hte grai n'wa bawng jahkrup shi yang Aung San hpung ni gaw lawu de na myu kaba mung masa hkrang hpe kata lam shanhte hting grum kata kaw shawng bawng jahkut tawn sai re ngu ngai hku na sawn dum ai. Hpang de tinang hpe jahkrit shama hkrum na, dingbai dingna jaw chye ai yawng hpe shawng shamyit kau na sung sung li li chyawm bawng jahkut tawn sai ngu chye mai ai.
A-Myu kaba ladat hte myen myu langai sha daru up hkang hpe jum tek lu na.
B-Myen ga langai sha shaga lu na'
C-Makam sham langai sha kam sham lu na.
i-Myu langai sha nga hkra ga langai sha shaga hkra makam langai sha nga hkra, myu gayau, ga gayau, makam gayau htung hking gayau, laili laika langai sha lang lu hkra shaning galu ladat jahkrat hpang sai re ngu sawn mai ai. Rawt jat bawngring lam yawng hpe dip pat kau ya na, sutlu nga mai lam, lamu ga gayau jahten kau na, myu shamyit shamat kau na masing kaba shawng jahkrat nna bawsang ni hpe masu hpang na namnyan daw sai. Myu shamyit shamat masing, htunghking laili laika ga shamyit masing, makam shamyit masing, sutlu nga mai maut mahkai shamyit masing.
ii-Anhte bawsang myu shayi ni hpe lu hkungran jang kum hpa shagrau ai, arawng aya jaw ai, Hkristan dinghku makam ni hpe lu jahten jang kum hpa shagrau ai, kata lam kraw sung dik ai ladat ni hpe chyawm bawngban jahkut tawn nna anhte bawsang ni hpe shanglawt chyawm la na bawng jahkrup sai re.
iii-Munghpawm mungdan hku shanglawt hpyi na, myu lakung 1 mi 3 ning hpra gahti galai up hkang na, Panglung gasadi hpe chyawm la sai re Panglung ga sadi hpe matut hti jahpra yu ai shaloi asan chye na re.

Ndai kaw annau ni ja ja li li myit yu ai shaloi myen a namnyan hkalem ai hpe asan  mu chye lu nga ai. Mung up tara shawng n'jahkrat ai, myit san seng ai hte madu mungdaw madu up hkang lu na masing shawng n'jahkrat tawn ai gum san magam ting nyang galai na masing sha tsun ai gaw masu ai maw lanyet rai nga ai. Annau ni a hpyen jaw bu kaba rai nga ai Du Kaba Naw Seng hpe masu hkalem lai wa ai. Shawng lam majan pa de sa jang Du kaba arawng aya shakap ya, dap de bai wa jang agyi gyi jum shakap ya masu rai dip shangun sha lai wa sai gaw labau hta myen gai ta kahtawng she nga hkra byin lai wa sai hte myen mung chyen mi tup zing madu lai wa sai re.
                         Thai mungdan hpe mung myen hkaw hkam ni sa gasat zing nna majoi roi rip sat shamyit ai jaw Thai ni dai ni du kraw hta tsu machyi maroi n'ni nga ma ai re. Shawng de Thai mungdan kaw myen ga myen dangpai pyi nmai shaga n'mai bu ai, Radio pyi myen hku n'mai hpaw ai re. Myen a tara nlang zingrut htu lai wa sai hpe ya dai ni du masin n'si nga ma ai. Maigan mungdan ni hte makau grup yin htingbu mungdan ni hte mung myen gaw hting bu kaja jinghku kaja nre hpe asan mu chye mai nga ai. Ya hkyak hkyak Miwa, Dingdung Korea ni hte matut daw hka wa nga ai, Miwa a ningyun buk ai RGN hpe pyi manap shat sa sha na re nga moi n'dau lai wa sai. Miwa myu sha ni a jit hti galup kau na nga kajai lai wa sai. Jinghku kaja htingbu kaja n're ai gaw dai ni anau ni hte bawsang yawng hte gasat hkrat nga ai hpe sakse hku yu la mai nga ai.

Dai ni UNFC mung hpan 3 hku numshawn shaw sa wa yang grau htuk manu na re. Myen a masa hpe grau kata lam grau chye na matu Simsa lam la nna mahkrun tam ai hpung mi.  Simsa lam kachyi mi mung nla ai gasat tik tik re hpung mi, Maigan mungdan ni de UN de sum tang mung masa jahkrup jahkra sa ai hpung mi re hku  sa  nna ja ja mahkrun tam shanglawt hpyi sa wa ra nga ga ai. UNFC n'mai dawhka ai. Hpyen masa hta  chyawm galung nna ra ahkyak dik ai UNFC kata na myu langai ngai garum  hpyi wa yang n'gun hte chyawm gasat shamyit na masing jahtrat ra sai. Shaloi she madu mungdaw lawan lu na re. Shanglawt lu na re.
Dai ni hting nut n'mai sai. Shawng de htu gasat tik tik sha mai na sai.
Awm dawm shanglawt de.

Baren Numraw

3 comments:

w.p shadang said...

ngai n chye na ai 1 gaw AWM DAWM SHANG LAWT ngu ai gaw MUNG DAN HKU I?MUNG HPAWM HKU I?gap hkat jahkring tawn ai UNFC malawm laga amyu rawt malan hpung ni gaw hpyen n gun,lak nak n gun n nga ai majaw re.yawng a lam hpe sagawn yu ga.ga ga chyawm gaw magwi she rim na.sharaw hpe she gamu na nga ma ai..rai tim ngai mu ai hku tsun ga nga yang yawng gaw gap hkat jahkring tawn da n na ya aten K.I.O,K.I.A ni hte myen sawa agyin agang gap hkat nga ai hpe lakap n na mung masa amyat htuk nga ma ai hpe mu ai..ti nang mung dan hpe gap di la she kaja na hpe mu ai.hpyen masa hta myen sawa hpe dang yang gaw hpa rai mung hpawm kaw rau naw nga na ta?ti nang ra ai hku she mai galaw law..dai ni kaw na ga garan sana ngu mung mai tsun sai le.K.K hpe sha kam ga.masha hte masa hpe kam n ra ai.ti nang ra ai hpe K.K kaw marawn hpyi let lu sai ngu shakawn ga.K.K jaw mayu ai gaw AWM DAWM MUNG DAN re ngu kam ga.MUNG HPAWM n re.KACHIN LAND she re.KACHIN STATE n re hpe kam ga...yawng hpe hkung ga jaw dat n ngai....

w.p shadang said...

ra sharawng ai lam chyawm gaw yawng bung na re.rai tim K.K gaw shi jaw mayu ai,shagrau mayu ai wa hpe shawng jaw na re.sin praw,sin na,ding dung,ding da hta K.K hpe n kam sham ai,n chye ai myu kaba rai nga ai MI WA,KALA,MYEN a lapran e matep nga ai K.K hpe chye ai,kam sham ai w.p myu sha ni hpe n law la ai,myu kaji tim mung kan hta n tsa K.K a hpung shing kang dan hkung na matu,K.K hpe kam sham yang K.K teng sha jaw ai ngu ai hpe shadan shadawng na matu K.K gaw ya aten w.p myu sha ni hpe lata la let MUNG DAN jaw na hpe shing ran mu nga sai..yawng gaw TI NANG A MUNG DAN ngu sha ra sharawng na re ngu kam let,,

gunlahpai said...

W.P shadang,,,Mu ai Ning mu Ngai mung madi sha daw ai.grai nan hkrak ai.an hte WP sha ni ra taw la taw ai gaw KACHINLAND she re.KK jaw mayu ai mung KACHIN LAND she re.Mung Hpawm nre...Myen sawa hte n a chya Chyai nga saga..Myen myit chya sat gaw Gwi Tam Gwi mana a Baw Nu ram pyi n ding man ai.Manu n nga ai hpe dum ga....Cyhuju GABA sai..

Post a Comment