JINGHPAW KASA

Karai jaw ya Jinghpaw Laika
Jinghpaw Laika Dr. Ola,
Wenyi Myi Na Chyum Mungga
Mungkan chyam machya chya,
Chyeju Janmau Gupdaru kaba
Karai chyeju Wunpawng Sha.
 
Lai sai duhkra mali kaja
AD - 2009 May 25,
Tawk Hkam Birth Day gintawng ya
Jinghpaw Kasa Media,
Jahtawng htu chyinghkai Computer
3 ning Shanhpyi Jubili she rai sa.
 
Myu tsaw Ninghkring share kaba
Karai jaw atsam shagu hkungga,
Shiga sumla magup sumhpa
Lawan ladan n yup n sha,
Myu sha matu ap nawng ya
Hkungga shagrau arawng la.
 
Wunpawng mungkan amyu sha
Mabyin masa yawng mahkra,
Tengman shiga  mu na kahpra
Akyu hpyi n-gun jat grau wa,
Myu tsaw myit mung htam latsa
Chyeju dum la Jinghpaw Kasa.
 
Myu sha maka tsawm htap hkra
Sai rum annau ni yawng  hkra,
Mungkan mungdan jut shara
Jinghpaw Kasa Dap kaba,
Kasi yu la kanan ka
Chyurum yawng hkra lit kaba.
 
Jinghpaw Kasa maden zinghka
Galu kaba mayat gan-ga,
Pu gang sin dun Wunpawng Sha
Pawn ba garum n-gun jaw ra,
Jaw prat shawng lam lamun latsa
Prat tup dinggrin Karai Wa.

Bumwa Hkri Ma
25/5/2012